މާލީ ތަނަވަސްކަން ހުރި ބޭރު މީހުންނަށް ރާއްޖޭގެ ރަށްވެހިންކަން ދިނުމާމެދު ވިސްނުން ރަނގަޅު: މިނިސްޓަރ އަސްލަމް
14 މެއި 2020 | ބުރާސްފަތި 16:18ދުނިޔޭގެ ނިސްބަތުން މުއްސަނދި ފަރާތްތަކުން ރާއްޖޭގެ ރެސިޑެންޓުންގެ ގޮތުގައި އުޅެން ބޭނުންވާ ކަމަށް އަސްލަމް ވިދާޅުވި
ޕްލޭނިންގ މިނިސްޓަރ މުހައްމަދު އަސްލަމް: ބޭރުގެ މުއްސަނދިންނަށް ރާއްޖޭގައި ދިރިއުޅެވޭނެ ފަސޭހަ ގޮތްތަކެއް ހަމަޖެހުން މުހިއްމު ކަމަށް ވިދާޅުވި
މާލީ ތަނަވަސްކަން ހުރި ރާއްޖެއިން ބޭރުގެ ބައެއް ފަރާތްތައް ރާއްޖޭގެ ރަށްވެހިކަމަށް ޝައުގުވެރިވާ ކަމަށާއި އެފުރުސަތު އެފަރާތްތަކަށް ދިނުމާމެދު ވިސްނުން ރަނގަޅު ކަމަށް ނޭޝަނަލް ޕްލޭނިންގ އެންޑް އިންފްރާސްޓަރަކްޗަރ މިނިސްޓަރ މުހައްމަދު އަސްލަމް ވިދާޅުވެއްޖެ އެވެ.ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކައިގެ ކޮމެޓީން ބުރާސްފަތު ދުވަހު ބޭއްވި ބައްދަލުވުމުގައި، ރާއްޖޭގެ އިގްތިޞާދު މައިގަނޑު އިންޑަސްޓަރީ އަކީ ޓޫރިޒަމް ކަމަށް ވެފައި، މިއަދު ދިމާވެގެން މިއުޅޭ ހަލަތަކީ ކުރިއަށް އޮތް ތާނގައިވެސް ދިމާވެދާނެ ހާލެއްކަން މިވަނީ ގަބޫލުކުރަންޖެހިފައިވާއިރު، ހަމައެކަނި ޓޫރިޒަމަށް ބަރޯސާވެގެން ނޫޅެވޭނެކަން މިވަނީ ގަބޫލުކުރަންޖެހިފަ ކަމަށާއި އެހެންކަމުން ރާއްޖޭގެ އިގްތިޞާދު ބައްޓަން ކުރެވިދާނެ އިތުރު ޕްލޭނަކީ ކޮބައިތޯ ސާފު ކުރެއްވުމަށް ރައްޔިތުންގެ މަޖިލީހުގެ ގައުމީ ތަރައްގީ އާއި ތަރިކަ ކޮމިޓީ އިން ބުރާސްފަތި ދުވަހު ވެބް ކޮންފަރެންސް މެދުވެރިކޮށް، ޕްލޭނިންގ އެންޑް ނޭޝަނަލް ޑިވެލޮޕްމަންޓް މިނިސްޓްރީގެ ވެރިންނާ އެކު ބޭއްވި ބައްދަލުވުމުގައި، ހޯރަފުށި ދާއިރާގެ މެމްބަރު އަހުމަދު ސަލީމް ކުރެއްވި ސުވާލަކާ ގުޅިގެން މިނިސްޓަރ އަސްލަމް ވިދާޅުވީ، ރާއްޖޭގައި ދަނޑުވެރިކަން ފުޅާކޮށްގެން، ރާއްޖެއިން ބޭރުން އެތެރެކުރަން ޖެހޭ ކާބޯތަކެއްޗަށް ޑޮލަރުން ކުރަންޖެހޭ ޚަރަދު ކުޑަކުރުމަކީ ވެސް ކުރެވިދާނެ ކަމެއް ކަމަށެވެ. އެހެންނަމަވެސް ޓޫރިޒަމާ އެއްވަރަށް ރާއްޖެއަށް ޑޮލަރު ވައްދާނެ އިންޑަސްޓްރީއަކަށް އެގްރިކަލްޗަރ އިންޑަސްޓްރީ ނުވިނަމަވެސް، ރާއްޖެއަށް ޓޫރިޒަމުން ވަންނަ ޑޮލަރު ރާއްޖެއިން ބޭރުކުރުން މަދުކުރުމަށް ދަރުވެރިކަން ފުޅާކުރުމަކީ ވަރަށް މުހިއްމު ކަމެއް ކަމަށެވެ. އެގޮތުން ހަމައެކަނި ރާއްޖޭގެ ރައްޔިތުންނަށް ބޭނުންވާ މިންވަރަށް ކާބޯތަކެތި ރާއްޖޭގައި އުފެއްދުނު ނަމަވެސް އެއީ ވަރަށް ބޮޑު ކުރިއެރުމެއްކަމަށް އަސްލަމް ވިދާޅުވި އެވެ.
މެމްބަރު ސަލީމްގެ އެސުވާލާ ގުޅިގެން އިތުރަށް މިނިސްޓަރު އަސްލަމް ވިދާޅުވީ، ރާއްޖޭގައި ދިރިއުޅެން ބޭނުންވާ މާލީ ތަނަވަސްކަން ހުރި ފަރާތްތައް އެބަތިބި ކަމަށެވެ.
އަސްލަމް ވިދާޅުވީ، ދުނިޔޭގެ ނިސްބަތުން ވެސް ބޮޑެތި މުއްސަނދިންނަށް ކޮންމެވެސް ގޮތަކުން އެފަރާތްތަކަށް ރާއްޖޭގައި ތިބެވޭނެ ގޮތް ނުވަތަ ރެސިޑެންޓްސްގެ ގޮތުގައި ރާއްޖޭގެ ދިރިއުޅެވޭނެ ގޮތެއް ހޯދުމަކީ މިހާރު ވިސްނާލުން ރަނގަޅު ކަމެއް ކަމަށެވެ. އެއީ އެ ފަރާތްތަކަށް އެފުރުސަތު ދީފިނަމަ، އެ އެމީހުންގެ ފަރާތުން ދިވެހި ރާއްޖެއަށާއި ރައްޔިތުންނަށް ވެސް ފައިދާ ތަކެއް ކުރާނެ ގަބޫލުކުރެވޭތީ ކަމަށްވެސް އަސްލަމް ވިދާޅުވި އެވެ.
އަސްލަމް ވިދާޅުވީ، މިދަންނަވަނީ ކޮންމެހެން، ރާއްޖޭގެ ސިޓިޒަންޝިޕް ދޭވާހަކަ ނޫންކަމަށާއި އިންވެސްޓަރުންނަށް ލުއި ފަސޭހަގޮތްތަކެއް ހޯދާދިނުމަށްޓަކައި އެ ފަރާތްތަކަކީ ރާއްޖޭގެ ރެސިޑެންޓުންގެ ގޮތުގައި ހެދުމުގެ މުހިންމުކަމުގެ ވާހަކަ ކަމަށެވެ.
އަސްލަމް ވިދާޅުވީ، މިއީ އެމަނިކުފާނުގެ އަމިއްލަފުޅު ވިސްނުމެއް ކަމަށާއި މިއީ ސަރުކާރުން ނުވަތަ މަގާމުގެ ހައިސިއްޔަތުން ވިދާޅުވާ ވާހަކައެއް ނޫން ކަމަށެވެ. ނަމަވެސް އަަސްލަމް ވިދާޅުވީ މާލީ ތަނަވަސްކަން ހުރި ރާއްޖޭން ބޭރުގެ ފަރާތްތަކަށް ރެސިޑެންޓުންގެ ގޮތުގައި ރާއްޖޭގައި އުޅުމުގެ ފުރުސަތު ދިނުމަށް ވަރަށް ފުޅާދާއިރާއެއްގައި ވިސްނާ، ކަމާބެހޭ އިދާރާތަކުން މަޝްވަރާކޮށްލުން ވަރަށް ރަނގަޅު ކަމެއް ކަމަށް ފެންނަ ކަމަށެވެ.
