އަފްގާނިސްތާނުގައި ހަރަކާތްތެރިވާ ޓެރަރިސްޓު ޖަމާއަތްތަކާއި ދެކޮޅަށް ހަނގުރާމަ އިއުލާންކޮށްފި
13 މެއި 2020 | ބުދަ 23:39ކާބުލްގައި މެޓަރނިޓީ ހޮސްޕިޓަލަކަށް ބަޑިން ހަމަލާތަކެއް ދީފައިވޭ
އަފްގާނިސްތާނުގައި ދިން ހަމަލާއެއްގައި މީހަކު ޒަހަމް ވެގެން ގެންދަނީ
އަފްގާނިސްތާނުގައި ހަރަކާތްތެރިވާ ޓެރަރިސްޓު ޖަމާއަތްތަކާއި ދެކޮޅަށް އެގައުމުގެ ސަރުކާރުން ހަނގުރާމަ އިއުލާންކޮށްފި އެވެ.
އަފްގާނިސްތާނުގެ ރައީސް އަޝްރަފް ގަނީ ވަނީ، އެ ގައުމުގެ ސަލާމަތީ ބާރުތަކަށް ތާލިބާން ޖަމައާތާއި، އަދި އެހެން ވެސް ޓެރަރިސްޓް ޖަމާއަތްތަކާ ދެކޮޅަށް ހަމަލާ ދިނުމަށް އަމުރުކޮށްފަ އެވެ.
މިގޮތަށް މިކަން ކުރުމަށް ރައީސް ނިންމެވީ އަފްގާނިސްތާންގެ ކާބުލްގައި މެޓަރނިޓީ ހޮސްޕިޓަލަކަށް ބަޑިން ހަމަލާތަކާއި، އެގައުމުގެ ޕޮލިސް މީހެއްގެ ޖަނާޒާގައި އައިސިސް ގުރޫޕުން ދިން ޖާނުން ފިދާވާ ބޮމުގެ ހަމަލާއަކާ ގުޅިގެންނެވެ.
މެޓަރނިޓީ ހޮސްޕިޓަލަށް ދިން ހަމަލާގައި 24 މީހުން މަރުވެފައިވާއިރު، ޕޮލިސް މީހާގެ ޖަނާޒާގައި ދިން ހަމަލާގައި ވެސް 24 އަށްވުރެ ގިނަ މީހުން މަރުވެފައިވާ ކަމަށް އަލްޖަޒީރާގައި ރިޕޯޓުކޮށްފައި ވެއެވެ. އަދި ޖަނާޒާގައި ދިން ޖާނުން ފިދާވެގެން ދިން ހަމަލާގެ ޒިންމާ އައިސިސްއިން ވަނީ ނަގާފަ އެވެ.
އަފްގާނިސްތާނުގައި ހަރަކާތްތެރިވާ ޓެރަރިސްޓު ޖަމާއަތްތަކާއި ދެކޮޅަށް އެގައުމުގެ ސަރުކާރުން ހަނގުރާމަ އިއުލާންކޮށްފައިވާއިރު، ތާލިބާނުން ވަނީ ފެބްރުއަރީމަހު އެމެރިކާއާއެކު ހަދާފައިވާ ސުލްހައިގެ އެއްބަސްވުމެއްގައި އަފްގާނިސްތާނުގެ އެއްވެސް ހިސާބެއްގައި ހަމަލާ ނުދޭނެ ކަމަށް އެއްބަސްވެފަ އެވެ.
މި އެއްބަސްވުމުގައި އަފްގާނިސްތާންގެ ސަރުކާރުން ވެސް ވަނީ ތާލިބާނުންނާ ދެކޮޅަށް އެއްވެސް ހަމަލާއެއް ނުދޭނެ ކަމަށް އެއްބަސްވެފަ އެވެ. ނަމަވެސް މިފަހުން ދިން ހަމަލާތަކުގައި ތާލިބާނުންގެ އަތެއް ވާކަމަށް އެގައުމުގެ ރައީސް ވަނީ ތުހުމަތު ކުރައްވާފަ އެވެ.
