ރިޔާޒް މާލެ ވަޑައިގެންނެވުމުގައި ސުލޫކީ މައްސަލައެއް ނެތް ކަމަށް ކޮމިީޓީން ނިންމައިފި
ރިޔާޒް މާލެ ވަޑައިގެންނެވީ ހުއްދަ ލިބިގެންކަން ފުލުހުންގެ ލިޔެކިޔުމުން އިނގޭ
ތިމަރަފުށީ ދާއިރާގެ މެންބަރު އަބްދުﷲ ރިޔާޒް
މާލޭ ލޮކްޑައުންކޮށްފައި ވަނިކޮށް, ތިމަރަފުށީ ދާއިރާގެ މެންބަރު އަބްދުﷲ ރިޔާޒް މާލެ ވަޑައިގެންނެވުމުގައި ސުލޫކީ މައްސަލައެއް ފާހަގަވެފައި ނެތްކަމަށް ރައްޔިތުންގެ މަޖިލީހުގެ އިމްތިޔާޒް އަދި ސުލޫކް ކޮމިޓީން ނިންމައިފި އެވެ.
ކޮވިޑް-19 އާއި ގުޅިގެން މުޅި ރާއްޖެ ލޮކްޑައުންކޮށް، އެއް ރަށުން އަނެއް ރަށަށް މީހުން ދަތުރުކުރުން މަނާކޮށްފައި ވަނިކޮށް، ތިމަރަފުށީ ދާއިރާގެ މެންބަރު އަބްދުﷲ ރިޔާޒު މާލެ ވަޑައިގެންނެވި މައްސަލަ މަޖިލީހުގެ ކޮމިޓީން ބައްލަވައިދެއްވުމަށް އެދި ހުށަހަޅުއްވާފައިވަނީ ފޮނަދޫ ދާއިރާގެ މެންބަރު މޫސާ ސިރާޖް އެވެ.
ސިރާޖް ހުށަހެޅުއްވި ސިޓީގައި މާލެ ލޮކްޑައުން ކުރެވިފައިވާ ދަނޑިވަޅެއްގައި މާލެ އަންނަން މެންބަރު ރިޔާޒަށް ހުއްދަ ދީފައިވޭތޯ އާއި ހުއްދަ ދީފައިވާ ނަމަ، ހުއްދަދީފައި ވަނީ "ކޮންމެހެން މާލެ އަންނަންޖެހޭ" ޖެހޭ ސަބަބެއް ދިމާވެގެން ތޯ ރައްޔިތުންގެ މަޖިލީހުގެ ކަމާބެހޭ ކޮމެޓީން ބަލާ މިކަން ސާފުކޮށް ދެއްވުމަށް އެދިފައި ވެއެވެ. އަދި މިކަމަކީ މެންބަރުގެ ސުލޫކާ ގުޅޭ އަމަލެއް ކަމުގައި ދެކެވަޑައިގަންނަވާ ކަމަށް ސިރާޖު ފޮނުއްވި ސިޓީގައި ވެއެވެ.
މި މައްސަލަ ބެލުމަށް ބުދަ ދުވަހު ބޭއްވި ކޮމިޓީ ބައްދަލުވުމުގައި ދަނގެތީ ދާއިރާގެ މެންބަރު މުހައްމަދު ނާޒިމް ވިދާޅުވީ ރިޔާޒް މާލެ ވަޑައިގެންނެވީ ހުއްދަ ލިބިގެންކަން ފުލުހުންގެ ފަރާތުން ދީފައިވާ ލިޔެކިޔުންތަކުން އެނގޭ ކަމަށެވެ. އަދި މެމްބަރު ރިޔާޒަށް ހުއްދަ ލިބިފައި ވަނީ "ގޭޖް" ކިޔާ ކުންފުންޏަކުން އެދުނު ހުއްދައިގެ ދަށުން ކަމަށާއި، ރިޔާޒް މާލެ ވަޑައިގަތީ އާންމު ރައްޔިތެއްގެ ހައިސިއްޔަތުން ކަމަށް ނާޒިމް ވިދާޅުވި އެވެ.
ރިޔާޒް މާލެ ވަޑައިގެންފައިވަނީ ނުފޫޒްގެ ބޭނުންކުރައްވައިގެން ނޫންކަން އެނގެން އޮތް ކަމަށާއި އެހެންކަމުން ރިޔާޒްގެ ސުލޫކީ މައްސަލައެއް ނެތް ކަމަށް ކަނޑައެޅައިދިނުމަށް ނާޒިމް ވަނީ ހުށަހަޅުއްވާފަ އެވެ.
ނާޒިމްގެ ހުށަހެޅުއްވުމަށް ވޯޓަށް އެހުމުން އެންމެ މެންބަރެއް ފިޔަވާ ދެން ތިއްބެވި ހުރިހާ މެންބަރުން ވަނީީ ތާއީދު ކުރައްވައި ވޯޓުދެއްވާފަ އެވެ. އަދި ރިޔާޒް މާލެ ވަޑައިގަތުމުގައި ސުލޫކީ މައްސަލައެއް ނެތްކަމަށް ކަނޑައަޅައި އެމައްސަލަ ވަނީ ކޮމީޓީން ނިންމާފަ އެވެ.
ރިޔާޒު މާލެ ވަޑައިގަތުމަށް ހުއްދަ ދެވުމާއި ގުޅިގެން ވަރަށް ގިނަ އާންމު ރައްޔިތުން ވަނީ އެކަމުގެ ނުރުހުން ފާޅުކޮށްފަ އެވެ. އަދި ރިޔާޒު އަށް މާލެ ވަޑައިގަތުމުގެ ހުއްދަ ދެވިގެން ދިޔައީ ކޮން އުސޫލެއްގެ ތެރެއިން ކިހާވަރަކަށް ހާލަތު ބެލުމަށްފަހުގައި ކަމަށް ބުނެ ގިނަ ބަޔަކު ވަނީ ސުވާލު އުފައްދާފަ އެވެ.
މިކަމާއި ގުޅިގެން ފުލުހުން ކުރިން ބުނެފައިވަނީ ރިޔާޒް މާލެ ވަޑައިގަތީ ވަކި ހާއްސަ ހުއްދައެއް ދެވިގެން ނޫން ކަމަށާއި އެއީ އެންއީއޯސީގެ ތެރެއިން ޤާއިމުކުރެވިފައިވާ އުސޫލުތަކާއި އެއްގޮތަށް ދެވިފައިވާ ހުއްދައެއް ކަމަށެވެ.
