ކޮރޯނާވައިރަސް (ކޮވިޑް-19) އާ ގުޅިގެން އިނގިރޭސިވިލާތުން ކަނޑައަޅާފައިވާ ލޮކްޑައުން ގަވާއިދުތަކާ ޚިލާފުވުމުން މިޑްފީލްޑަރު މޯގަން ގިބްސް-ވައިޓް އަށް ފިޔަވަޅު އަޅަން ވުލްވްސް އިން ނިންމައިފި އެވެ.
މިދިޔަ ހަފުތާގައި ގިބްސް-ވައިޓް ވަނީ ލަންޑަނުގައި އޮތް ޕާޓީއެއްގައި ބައިވެރިވެފައެވެ. ސްނެޕްޗެޓް ގައި ދައުރުވި ވީޑީއޯއެއްގައި ގިބްސް-ވައިޓް އޭނާގެ ރައްޓެހިންތަކަކާއެކު ޕާޓީގައި ހަރަކާތްތެރިވާ މަންޒަރު ވަނީ ފެނިފައެވެ.
އިންގްލެންޑުގެ 21 އަހަރުން ދަށުގެ ގައުމީ ޓީމަށްވެސް ކުޅެމުން އަންނަ ގިބްސް-ވައިޓްގެ މައްސަލަ ވުލްވްސް އިން ބަލަމުން އަންނައިރު، އެ ކްލަބުން ބުނީ މިއީ އެޓީމުގ ކުޅުންތެރިއެއްގެ ފަރާތުން ފެނިގެންވާނެ އަމަލެއް ނޫން ކަމަށާއި، އޭނާއަށް ފިޔަވަޅު އަޅާނެ ކަމަށެވެ.
ކޮވިޑް-19 އާ ގުޅިގެން އިނގިރޭސި ޕްރިމިއާ ލީގު މެދުކަނޑާލާފައިވާއިރު، މީގެ ކުރިން ޕްރިމިއާ ލީގުގެ ގިނަ ކުޅުންތެރިންތަކެއްގެ ފަރާތުން ވަނީ ގަވާއިދުތަކާ ޚިލާފު އަމަލުތައް ފެނިފައެވެ.
އިނގިރޭސިވިލާތުން ކަނޑައަޅާފައިވާ ގަވާއިދުތަކާ ޚިލާފުވި ކުޅުންތެރިންނާއި ކޯޗުން:
- ދެ ފަހަރެއްގެ މަތިން ގަވާއިދާ ޚީލާފުވުމުން މެންޗެސްޓާ ސިޓީގެ ޑިފެންޑަރު ކައިލް ވޯކާއަށް ފިޔަވަޅު އަޅަން އެ ކްލަބުން ވަނީ ނިންމާފައި
- އިޖުތިމާއީ ގައިދުރުކަމުގެ ގަވާއިދުތަކާ ޚިލާފަށް އަމަލުކުރުމުން، އާސެނަލްގެ ހުރިހާ ކުޅުންތެރިންނަށް ވަނީ ނަސޭހަތް ދީފައި
- ޓޮޓެންހަމްގެ ކޯޗު ހޯސޭ މޮރީނިއޯ އާއި އެޓީމުގެ ބައެއް ކުޅުންތެރިންގެ ފަރާތުން އިޖުތިމާއީ ގައިދުރުކަމުގެ ގަވާއިދާ ޚިލާފު އަމަލުތައް ފެނުމުން ވަނީ މާފަށް އެދިފައި
- ހޯމް-އައިސޮލޭޝަންގެ ގަވައިދާ ޚިލާފުވުމުން ޗެލްސީން ވަނީ އެޓީމުގެ މޭސަން މައުންޓަށް ނަސޭހަތްތެރި ވެފައި
- ގަވާއިދުތަކާ ޚިލާފަށް މޮއިސް ކީން ޕާޓީއެއް ބޭއްވުމުން، އޭނާ އަށް ފިޔަވަޅު އަޅަން އެވަޓަން އިން ވަނީ ނިންމާފައި
- ލޮކްޑައުން ގަވާއިދާ ޚިލާފުވުމުން އެސްޓަން ވިލާގެ ކެޕްޓަން ޖެކް ގްރީލިޝް ވަނީ މާފަށް އެދިފައި
