ޚާއްސަ ހާލަތްތަކުގައި ދައުވާގެ މުއްދަތު ނުހިނގާ ގޮތަށް ހުށަހެޅި އިސްލާހު ބަލައިގަނެ ދިރާސާކުރުމަށް ކޮމިޓީއަށް

ޚާއްސަ އުސޫލުތައް ހިނގާ ހާލަތްތަކުގައި ދައުވާގެ މުއްދަތު ނުހިނގާ ގޮތަށް ހެދުމަށް ޖިނާޢީ އިޖުރާޢަތުގެ ޤާނޫނަށް އިސްލާހު ގެނައުމުގެ ބިލު މަޖިލީހަށް ބަލައިގަނެ އިތުރަށް ދިރާސާ ކުރުމަށް ޖުޑީޝަރީ ކޮމިޓީއަށް ފޮނުވައިފި އެވެ.

ބުދަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި މިބިލު ބަލައިގަތުމަށް 57 މެންބަރުން ވޯޓު ދެއްވިއިރު ވަކިގޮތަކަށް ވޯޓު ނުދެއްވާ ތިއްބެވީ 4 މެންބަރުންނެވެ.

މިމައްސަލަ ރައްޔިތުންގެ މަޖިލީހަށް ހުށަހެޅުއްވީ ސަރުކާރުގެ ފަރާތުން ފޮނަދޫ ދާއިރާގެ މެންބަރު މޫސާ ސިރާޖެވެ. ސިރާޖު މި އިޞްލާޙު ހުށަހަޅުއްވަމުން ވިދާޅުވީ މި ބިލު ހުށަހެޅުއްވުމުގެ ބޭނުމަކީ ކޮވިޑް-19 އާ ގުޅިގެން ދިވެހިރާއްޖެއަށް ކުރިމަތިވެފައިވާ ޢާންމު ޞިއްޙަތުގެ ކުއްލި ނުރައްކަލުގެ ޙާލަތާއި އެނޫންވެސް އެފަދަ ކުއްލި ނުރައްކަލުގެ ޙާލަތްތަކާއި ކާރިޘާގެ ޙާލަތްތަކުގައި ޢަމަލުކުރާނެ ޚާއްޞަ އުޞޫލުތަކެއް ޖިނާއީ އިޖުރާޢަތުގެ ޤާނޫނު ގައި ބަޔާންކޮށްފައި ނެތުމުގެ ސަބަބުން އެފަދަ ޙާލަތެއްގައި އެ ޤާނޫނުގައި ބަޔާންކުރާ ޢާންމު އިޖުރާޢަތުތައް ހިންގުމަށް ދަތިވާތީ، ކަމާގުޅޭގޮތުން ޢަމަލުކުރާނެ ޚާއްޞަ އިޖުރާއަތުތަކެއް ބަޔާންކުރުމަށްޓަކައި ޤާނޫނަށް ގެންނަންޖެހޭ އިޞްލާޙުތަކެއް ގެނައުން ކަމަށެވެ.

މިބިލު ގައި ބަޔާންވެގެންވާ ޚާއްޞަ އުޞޫލުތައް ހިނގާނީ ޢާންމު ޞިއްޙަތު ރައްކާތެރިކުރުމުގެ ޤާނޫނުގެ ދަށުން ޢާންމު ޞިއްޙަތުގެ ކުއްލި ނުރައްކަލުގެ ޙާލަތެއް އިޢުލާނު ކޮށްފައިވާ ޙާލަތެއްގަ އާއި ކާރިޘާ އާ ބެހޭ ކަންކަން ބެލެހެއްޓުމުގެ ޤާނޫނުގެ ދަށުން ކާރިޘާއެއް އިޢުލާނުކޮށްފައިވާ ޙާލަތެއްގަ އާއި ޤާނޫނު އަސާސީގެ 253 ވަނަ މާއްދާގެ ދަށުން ކުއްލި ނުރައްކަލުގެ ޙާލަތެއް އިޢުލާނު ކޮށްފައިވާ ޙާލަތެއްގަ އެވެ.

ސިރާޖު ހުށަހެޅުއްވި އިޞްލާޙުގައި މިފަދަ ޙާލަތެއް މެދުވެރި ވެއްޖެނަމަ އަދި އެކަން ދެމި އޮތްހާ ހިނދަކު ވަކި މުއްދަތުތަކެއްގައި ނުހިނގާ ޤާނޫނުތަކެއްވެ އެވެ. އޭގެ ތެރޭގައި ޖިނާޢީ އިޖުރާޢަތުގެ ޤާނޫނުގެ 94 ވަނަ މާއްދާ އާއި 84 ވަނަ މާއްދާގައި ބަޔާންކުރާ މުއްދަތުތައް ހިމެނެއެވެ.

ޖިނާޢީ އިޖުރާޢަތުގެ ޤާނޫނުގެ 94 ވަނަ މާއްދާ އަކީ ދަޢުވާ ކުރުމާއި ބެހޭ މާއްދާ އެވެ. އެ މާއްދާގައި ބުނެފައިވަނީ ޖިނާޢީ ކުށެއްގެ ދަޢުވާ ލިބޭ ފަރާތަކީ ޖިނާޢީ އިޖުރާޢަތުގެ ޤާނޫނުގެ 60 ވަނަ މާއްދާގެ ށ ގެ ދަށުން ބަންދު ކުރެވިފައިވާ މީހެއްނަމަ އޭނާ ފަނޑިޔާރެއްގެ ކުރިމައްޗަށް ފުރަތަމަ ހާޟިރުކުރެވޭތާ 30 ދުވަހުގެ ތެރޭގައި އޭނާގެ މައްޗަށް ޕްރޮސިކިއުޓަރ ޖެނެރަލް ދަޢުވާ އުފުލަންވާނެ ކަމަށެވެ.

ސިރާޖު މި ބިލު ހުށަހަޅުއްވަމުން ވިދާޅުވީ މި އިޞްލާޙުގެ ދަށުން ވީޑިއޯ ކޮންފެރެންސް މެދުވެރިކޮށް ޝަރީޢަތް ކުރިޔަށް ގެންދިޔުމުގެ މަގު މި އިޞްލާހާއެކު ފަހިވެގެންދާނެ ކަމަށެވެ.

މިބިލުގައި ބަޔާންކޮށްފައިވާ ޙާލަތްތަކުގަައި ޖިނާޢީ އިޖުރާޢަތުގެ ޤާނޫނުގައި ބަޔާންކޮށްފައިވާ އިޖުރާޢަތުތައް ހިންގަން ހުރަސް އެޅޭ ކަމަށް ފެންނަ ނަމަ ޖިނާޢީ ތަހުޤީޤު ހިންގުމާއި ދަޢުވާކުރުމުގައި ބިލުގައި ބުނެފައިވާ އުޞޫލުތަކަށް ޢަމަލުކުރުމުގެ ބާރު ޕްރޮސެކިއުޓަރ ޖެނެރަލަށް ވަނީ ލިބިދީފައެވެ.

އެފަދަ ޙާލަތެއް މެދުވެރިވެއްޖެ ކަމަށް ފެނިގެން ޝަރީޢަތް ހިންގުމުގެ އުޞޫލުތަކަށް ޢަމަލުކުރަން ނިންމާނީ ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނުންނެވެ.

ޕީޖީ އަދި ޑީޖޭއޭ އިން ނިންމާ ނިންމުން ސަރުކާރުގެ ގެޒެޓުގައި ޝާއިޢުކުރަން ޖެހޭނެކަމަށް ބިލުގައި ބުނެފައިވެ އެވެ.