ދާއިމީކޮށް ގޭގައި ތިބެގެން މަސައްކަތްކުރުމުގެ ފުރުސަތު ޓްވިޓަރ އިން ހުޅުވާލައިފި
މިއީ މިހެން ދާއިމީކޮށް މަސައްކަތްކުރަން ހުޅުވާލި ފުރަތަމަ ކުންފުނި
ޓްވިޓަރ ކުންފުނީގެ އޮފީހެއް: އެންމެ އަވަހަށް ވެސް ހުޅުވާނީ ސެޕްޓެމްބަރުގައި
ގޭގައި ތިބެގެން މަސައްކަތްކުރަން ބޭނުންވާ ހުރިހާ މުވައްޒަފުންނަށް، ގޭގައި ތިބެގެން މަސައްކަތްކުރެވޭނެ އިންތިޒާމުތަކެއް ދާއިމީ ގޮތެއްގައި ހަމަޖައްސަން ޓްވިޓަރ އިން ނިންމައިފި އެވެ.
ގޭގައި ތިބެގެން މަސައްކަތްކުރެވޭނެ ކުރުމުގެ ފުރުސަތު ދިނުމާއެކު، ޓްވިޓަރއިން ވަނީ ކުރިއަށް އޮތް ސެޕްޓެމްބަރު މަހުގެ ކުރިން އެ ކުންފުނީގެ ގިނަ އޮފީސްތައް ނުހުޅުވާނެ ކަމަށް ބުނެފައެވެ. އަދި އެ ތަންތަނުގައި މަސައްކަތްކުރާ މުވައްޒަފުންނަށް މަސައްކަތްކުރާނެ ތަން ކަނޑައެޅުމުގެ އިޚުތިޔާރު ލިބޭނެ ކަމަށް އެ ކުންފުނިން ވަނީ ހާމަކޮށްފަ އެވެ.
މި އަަހަރުގެ ތެރޭގައި ކުންފުނީގެ މުވައްޒަފުން އެއް ތަނެއްގައި ގިނަ ބަޔަކު ތިބޭނެހެން ހިންގާ އިވެންޓްތައް ނޯންނާނެ ކަމަށްވެސް ރިޕޯޓްތައް ބުނެ އެވެ. އަދި ސެޕްޓެމްބަރު މަހުގެ ނިޔަލަށް، ކޮންމެހެން ކުރަން މަޖުބޫރުވެގެން ކުރާ ކުންފުނީގެ ދަތުރެއް ނޫނިއްޔާމުން ނުކުރުމަށް އެ ކުންފުނިން ވަނީ ނިންމާފަ އެވެ.
ޓެކްނޮލޮޖީގެ ވިޔަފާރީގައި ޓްވިޓަރއާ ވާދަކުރާ ފޭސްބުކް އަދި އެލްފެބެޓް އިންކް ގެ މުވައްޒަފުންނަށް ވެސް އަހަރު ނިމެންދެން ގޭގައި ތިބެގެން މަސައްކަތްކުރުމުގެ ފުރުސަތު ދިނުމަށް ވަނީ ނިންމާފަ އެވެ. ނަމަވެސް، މި ނިންމުން ދާއިމީކުރަން އަދި މިހާތަނަކަށް މިއިން ކުންފުންޏަކުން ނިންމާފައެއް ނުވެ އެވެ.
ކުރީގެ ހާލަތަށް ދިރިއުޅުން ބަދަލުވާއިރު، ގޭގައި ތިބެގެން މަސައްކަތްކުރަން، ގިނަ ބަޔަކަށް ލިބުމުގެ ފުރުސަތު ބޮޑުކަމަށް ހުޅަނގުގެ މީޑިއާތަކުން އަންނަނީ ބުނަމުންނެވެ. ހާއްސަކޮށް މި ހާލަތުގެ ތެރޭގައި ގޭގައި ތިބެގެން މަސައްކަތްކޮށްގެން ވަޒީފާގެ ޒިންމާ އަދާކުރުމަށް ހުރަސް އެޅިފައި ނުވާ ޒާތުގެ ވަޒީފާތަކުގައި އުޅޭ މީހުންނަށް އެ ފުރުސަތު ބޮޑު ކަމަށްވެސް އަންނަނީ ބުނަމުންނެވެ.
