ޚާއްސަ އުސޫލުތައް ހިނގާ ހާލަތްތަކުގައި ދައުވާގެ މުއްދަތު ނުހިނގާ ގޮތަށް ހަދަން ހުށަހެޅި ބިލުގެ ބަހުސް ބުދަ ދުވަހުގެ ރައްޔިތުންގެ މަޖިލީހުގެ ޖަލްސާގައި ކުރުމަށް ތާވަލުކޮށްފި އެވެ.

ބުދަ ދުވަހުގެ މަޖިލީހުގެ ޖަލްސާގައި މި މަސައްކަތް ތާވަލުކުރެވިފައިވަނީ އިބްތިދާއީ ބަހުސްގެ ދަށުންނެވެ. އެއީ ކޮވިޑް-19 ގެ ޙާލަތާއި ގުޅިގެން ދިވެހިރާއްޖެ އަށް ކުރިމަތިވެފައިވާ ޢާންމު ޞިއްޙަތުގެ ކުއްލި ނުރައްކަލުގެ ޙާލަތާއި އެނޫންވެސް އެފަދަ ކުއްލި ނުރައްކަލުގެ ޙާލަތްތަކާއި، ކާރިޘާގެ ޙާލަތްތަކުގައި ދަޢުވާގެ މުއްދަތު ނުހިނގާ ގޮތަށް ހެދުމަށް ޖިނާޢީ އިޖުރާޢަތުގެ ޤާނޫނަށް ހުށަހެޅުނު އިސްލާހެކެވެ.

މިމައްސަލަ ރައްޔިތުންގެ މަޖިލީހަށް ހުށަހެޅުއްވީ ސަރުކާރުގެ ފަރާތުން ފޮނަދޫ ދާއިރާގެ މެންބަރ މޫސާ ސިރާޖެވެ. ސިރާޖު މި އިޞްލާޙު ހުށަހަޅުއްވަމުން ވިދާޅުވީ މި ބިލު ހުށަހެޅުއްވުމުގެ ބޭނުމަކީ ކޮވިޑް-19 ފަދަ ހާއްސަ ހާލަތްތަކުގައި އަމަލުކުރާނެ އުޞޫލުތަކެއް ޖިނާއީ އިޖުރާޢަތުގެ ޤާނޫނުގައި ބަޔާންކޮށްފައި ނެތުމުގެ ސަބަބުން ގާނޫނަށް ގެންނަންޖެހޭ ގެނައުން ކަމަށެވެ. މިފަދަ ޙާލަތެއްގައި އެ ޤާނޫނުގައި ބަޔާންކުރާ ޢާންމު އިޖުރާޢަތުތައް ހިންގުމަށް ދަތިވާތީ، ކަމާގުޅޭގޮތުން ޢަމަލުކުރާނެ ޚާއްޞަ އިޖުރާއަތުތަކެއް ބަޔާންކުރަން ގާނޫނު އިސްލާހުކުރަންޖެހޭ ކަމަށް ސިރާޖް ވިދާޅުވި އެވެ.

ބުދަ ދުވަހުގެ ޖަލްސާގައި ތާވަލުކުރެވިފައިވާ އެހެން ކަންކަމުގެ ތެރޭގައި، އިންކަމް ސަޕޯޓް އެލެވަންސާއި ސަރުކާރުގެ ރިލީފް ފަންޑް ފަދަ ޕްރޮގްރާމްތައް ތަންފީޒުކުރުމާއި މެދު ރައްޔިތުންގެ މަޖިލީހުން ދެކޭގޮތް ކަނޑައެޅުމާ ގުޅޭގޮތުން މަޖިލީހުގެ އިޖްތިމާޢީ ކޮމިޓީ އަދި ސަރުކާރުގެ މައްސޫލިއްޔަތު އަދާކުރާ މިންވަރު ބަލާ ކޮމިޓީން ނިންމިގޮތުގެ ރިޕޯޓު ހުށަހެޅުން ހިމެނެ އެވެ.