ދުވާލެއްގެ މައްޗަށް 1000 އަށް ވުރެ ގިނަ ޓެސްޓު ކުރެވޭ ވަރަށް ޓެސްޓިން ކެޕޭސިޓީ އިތުރު ކުރުމުގެ މަސައްކަތް ކުރަމުންދާ ކަމަށް ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ)ން ބުނެފި އެވެ.

އެގޮތުން، އަންގާރަ ދުވަހުގެރޭ އޮތް ނޫސްވެރިންގެ ބައްދަލުވުމުގައި ވާހަކަދައްކަވަމުން އެ ސެންޓަރުގެ ތަރުޖަމާން މަބްރޫކް އަޒީޒް ވިދާޅުވީ މިހާރު ޓަރގެޓްކޮށްފައިވަނީ ދުވާލެއްގެ މައްޗަށް 1000 ޓެސްޓު ހެދުމަށް ކަމަށެވެ.

ކުރިއަށް އޮތް ދެ ހަފްތާ ތެރޭގައި ކުއްލި އަކަށް ކޮވިޑް-19 ގެ ކޭސްތަކުގެ އަދަދުތައް އިތުރުވެދާނެ ކަމަށް އަންދާޒާ ކުރެވޭއިރު ދުވާލެއްގެ މައްޗަށް 1000 ސާމްޕަލް ޓެސްޓުކުރެވިގެން ނޫނީ އެންމެ އެދެވޭ ނަތީޖާ ނުނިކުންނާނެ ކަމަށް ކުރީގެ ޑިރެކްޓަރ ޖެނެރަލް އޮފް ޕަބްލިކް ހެލްތު ޑރ. ޝީނާ މޫސާ ވަނީ ވިދާޅުވެފަ އެވެ.

މި މަހުގެ ތެރޭގައި ޖީންއެކްސްޕަރޓް މެޝިން ކަރޓްރިޖުތަކެއް ރާއްޖެ ގެނެވުމާއިއެކު، ޓެސްޓިންގް ކެޕޭސިޓީ އިތުރު ކުރެވޭނެ ކަން ފާހަގަކުރައްވާ މަބްރޫކް ވިދާޅުވީ އަލަށް ގެންނަން މަސައްކަތް ކުރާ މެޝިންތަކުން ޓެސްޓު ހެއްދުމަށް ވެސް ފަސޭހަވާނެކަމަށެވެ.

މަބްރޫކް ވިދާޅުވީ އަލަށް ގެންނަ މެޝިންތަކުން ޓެސްޓުކުރެވޭ ސާމްޕަލްގެ އަދަދު ވެސް އިތުރުވާނެ ކަމަށާއި، ޓެސްޓު ކުރުމަށް ބޭނުންވާ ލެބޯޓްރީ ޓެކްނިޝަނުންވެސް މަދުވާނެ ކަމަށެވެ. އަދި މި މެޝިންތަކުގެ ސަބަބުން ދުވާލެއްގެ މައްޗަށް ހާހެއްހާ ސާމްޕަލް ނެގެންވާނެ ކަމަށެވެ.

މަބްރޫކް މީގެކުރިން ވިދާޅުވެފައިވަނީ ދުވާލެއްގެ މައްޗަށް 600 ޓެސްޓު ކުރުމަށް މަސައްކަތް ކުރަމުންދާ ކަމަށެވެ. އަދި 600 ޓެސްޓު ކުރުމުގެ އަމާޒަށް ވާސިލުވުމަށް ބޭނުންވާ މެޝިންތައް މި މަހުގެ 16 ވަނަ ދުވަހު ރާއްޖެ ގެނެވޭނެ ކަމަށް ލަފާ ކުރެވޭ ކަމަށެވެ.

ހެލްތު މިނިސްޓްރީގެ ފަރާތުން ކުރަމުންދާ މަސައްކަތުގެ ތެރެއިން 25،000 ޖީން އެކްސްޕާޓް ކާޓްރިޖް ޑަބްލިއުއެޗްއޯގެ ފަރާތުން ހޯދުމަށް ދަނީ މަސައްކަތް ކުރަމުންނެވެ. އަދި ކަރޓްރިޖްތައް މިމަހުގެ ފަހުކޮޅު ލިބޭވަރުވާނެ ކަމަށް ލަފާކުރެވޭ ކަަމަށްވެސް މީގެކުރިން މަބްރޫކް ވަނީ ވިދާޅުވެފަ އެވެ.

ޓެސްޓު ކުރެވޭ އަދަދު މަދުވުމަކީ ރާއްޖެއަށް ދިމާވެފައިވާ އެންމެ ބޮޑު އެއް ގޮންޖެހުމެވެ. އަދި މިކަން ހައްލުކުރުމަށް، ޓެސްޓިންގ ކެޕޭސިޓީ އިތުރުކުރުމަށް ގިނަގުނަ މަސައްކަތްތަކެއް ސަރުކާރުން ދަނީ ކުރަމުންނެވެ.