ޓްރީޓޮޕް ހޮސްޕިޓަލަށް ދިޔަ މީހަކު ޕޮޒިޓިވްވީއޭ ބުނެވުނީ އޮޅުމަކުން

ޓްރީޓޮޕް ހޮސްޕިޓަލް (ޓީޓީއެޗް) އަށް ޑޮކްޓަރުން ދިޔަ މީހަކު ކޮވިޑް-19 އަށް ޕޮޒިޓިވްވި ކަމަށް ބުނެވުނީ އޮޅުމަކުން ކަމަށް ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) އިން ބުނެފި އެވެ.

އެންއީއޯސީ ގައި ސިލްސިލާކޮށް ބާއްވާ ނޫސްވެރިންގެ ބައްދަލުވުމުގެ ތެރެއިން ބުދަ ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ އެޕިޑަމޮލިޖިސްޓް ޑރ. އިބްރާހިމް އަފްޒަލް ވިދާޅުވީ، ޓީޓީއެޗް އަށް ދައްކަން ދިޔަ މީހަކު ކޮވިޑް-19 އަށް ޕޮޒިޓިވްވެފައިވާ ކަމަށެވެ. އޭނާއަކީ އެހެން ސަބަބަކާއި ހުރެ ޓްރީޓޮޕް ހޮސްޕިޓަލަށް ދައްކަން ދިޔަ މީހަކު ކަމަށް ޑރ. އަފްޒަލް ވިދާޅުވި އެވެ.

އޭގެ ފަހުން ޕްރެސްކޮންފަރެންސް ނިމެން ކައިރިވެފައިވަނި ކޮށް ރައީސް އޮފީހުގެ އަންޑަރ ސެކެރެޓަރީ އަދި އެންއީއޯސީގެ ތަރުޖަމާނު މަބްރޫކް އަޒީޒް ވިދާޅުވީ، ޓްރީޓޮޕް ހޮސްޕިޓަލް އަށް ގެންދިޔައީ ކޮވިޑް-19 އަށް ޕޮޒިޓިވްވެގެން ހުޅުލޭ އައިލެންޑް ހޮޓެލް(އެޗްއައިއެޗް) ގައި އެޑްމިޓް ކޮށްފައި އޮތް މީހެއް ކަމަށެވެ.

ކޮވިޑް-19 ޖެހުނު މީހުންގެ ތެރެއިން ހާލު ދެރަވާ މީހުންނަށް ދަނީ ޓީޓީއެޗްގައި ފަރުވާ ދެމުންނެވެ. އެ ހޮސްޕިޓަލުގައި 11 މީހަކަށް ދަނީ ފަރުވާދެމުންނެވެ. އޭގެ ތެރެއިން ދެ ބިދޭސީއަކަށް ފަރުވާދެމުން އަންނަނީ ވެންޓިލޭޓަރުގައި އެވެ. އެއީ 54 އަހަރުގެ ފިރިހެނަކާއި 29 އަހަރުގެ ފިރިހެނެކެވެ.

ކޮވިޑް-19 ޖެހޭ މީހުންގެ ތެރެއިން އެންމެ ހާލު ދެރަވާ މީހުންނަށް ފަރުވާދެނީ ވެންޓިލޭޓަރުގެ އެހީގަ އެވެ. މި ބަލި ޖެހުމުން ނޭވާލާ ނިޒާމަށް ހަމަލާދެ އެވެ. އަދި މި ބަލި ޖެހިގެން ސީރިއަސްވާ މީހުންގެ ތެރޭގައި ގިނައީ، ނޭވާލާ ނިޒާމަށް ތަފާތު އެކިއެކި ކަންކަން ދިމާވާ މީހުންނެވެ.