ޖިނާއީ ބޮޑެތި މައްސަލަތައް ތަޙްޤީޤްކުރުމުގައި ޢަމަލުކުރާނެގޮތުގެ އިރުޝާދެއް ޕީޖީން އެކުލަވާލައިފި

ޖިނާއީ ބޮޑެތި މައްސަލަތައް ތަޙްޤީޤްކުރުމުގައި ޢަމަލުކުރާނެގޮތުގެ އިރުޝާދެއް ޕްރޮސިކިއުޓަރ ޖެނެރަލް އެކުލަވާލައްވައި އެއަށް އަމަލު ކުރެއްވުމަށް މޯލްޑިވްސް ޕޮލިސް ސާރވިސް އަށް އަންގަވައިފި އެވެ.

ޕީޖީ އޮފީހުން މި އުސޫލު އެކުވަލާލާފައި ވަނީ ޤާނޫނުއަސަސާސީގެ 223 ވަނަ މާއްދާގެ (ރ) ގެ ދަށުން ޖިނާއީ ކުށެއް ކަމަށް ތުހުމަތުކުރެވޭ ޢަމަލުތަކާ ގުޅިގެން ބަލާ ބެލުންތަކާއި ހިންގާ ތަޙުޤީޤުތައް ބަލައި އެ ކަންކަން ހިންގަނީ ޤާނޫނާ އެއްގޮތަށްތޯ ބެލުމަށް ޕްރޮސިކިއުޓަރ ޖެނެރަލްއަށް ލިބިދޭ ބާރުގެ ދަށުންނެވެ.

Advertisement

މި އުސޫލުގެ މަގުސަދަކީ ޖިނާއީ ޢަދުލުގެ ނިޒާމު އިތުރަށް ހަރުދަނާކުރުމާއި މޯލްޑިވްސް ޕޮލިސް ސަރވިސްއިން ތަޙްޤީޤްކުރާ ޖިނާއީ ބޮޑެތި މައްސަލަތަކާ ގުޅިގެން ޢަމަލުކުރަންޖެހޭ ގޮތުގެ އިރުޝާދެއް އެކުލަވާލުމެވެ. އަންގާރަ ދުވަހުން ފެށިގެން މި އުސޫލަށް ޢަމަލުކުރުމަށް މޯލްޑިވްސް ޕޮލިސް ސަރވިސްއަށް ޕްރޮސިކިއުޓަރ ޖެނެރަލް ވަނީ އަންގަވާފަ އެވެ.

ޕީޖީ އޮފީހުން ބުނީ "ޖިނާއީ ބޮޑެތި މައްސަލަތަކުގައި ޢަމަލުކުރާނެ ގޮތުގެ އިރުޝާދު" ގެ ދަށުން، ޤާނޫނު ނަންބަރު: 32/2015 (ޓެރަރިޒަމް މަނާކުރުމުގެ ޤާނޫނޫ) ގެ ދަށުން ތަޙްޤީޤްކުރާ މައްސަލައަކާއި، ޖިނާއީ ބޮޑެތި މައްސަލަތަކާ ގުޅިގެން މީހަކު ބަންދުކުރެވިފައިވާނަމަ، މަދުވެގެން ހަފްތާއަކު އެއް ފަހަރު މައްސަލައިގެ ތަޙްޤީޤްގައި ހޯދިފައިވާ ކުރިއެރުންތަކާއި، ތަޙްޤީޤްގައި ކުރުމަށް ޤަޞްދުކޮށްފައިވާ ކަންކަން އެނގޭގޮތަށް، ތަޙްޤީޤްގެ މިސްރާބު ޕްރޮސިކިއުޓަރ ޖެނެރަލްއާ ޙިއްޞާކުރަން ޖެހެ އެވެ.

އަދި އެފަދަ މައްސަލައެއްގެ ތުހުމަތުކުގައި މީހަކު ހައްޔަރުކޮށްފައި ނުވާނަމަ، ނުވަތަ ހައްޔަރުކުރުމަށްފަހު ދޫކޮށްލާފައިވާނަމަ ކޮންމެ 15 ދުވަހަކުން މި ކަންކަން ޕްރޮސިކިއުޓަރ ޖެނެރަލްއާ ޙިއްޞާކުރަން ޖެހެ އެވެ.

މި އިރުޝާދުގެ ދަށުން ޖިނާއީ ބޮޑެތި މައްސަލަތަކުގެ ތަޙްޤީޤް ނިންމުމަށްފަހު ޕްރޮސިކިއުޓަރ ޖެނެރަލްގެ އޮފީހަށް ހުށަހަޅާއިރު، އެ މައްސަލައިގެ ތަޙްޤީޤް ކުރިއަށްދިޔަ ގޮތާއި، މިސްރާބު ހުރި ގޮތާއި، ތަޙްޤީޤަށް ހޯދިފައިވާ އަސާސީ މަޢުލޫމާތާއި، ހޯދިފައިނުވާ މަޢުލޫމާތަކީ ކޮބައިކަމާއި، އެ މަޢުލޫމާތު ހޯދިފައި ނުވާ ސަބަބާއި، އެ މައްސަލައާ ގުޅިގެން އިތުރަށް ސާފުކުރަންޖެހޭ ކަމެއް ވާނަމަ އެކަންކަން ހިމެނޭ ބަޔާނެއް ތަޙްޤީޤްކުރިފަރާތުން ހުށަހަޅަންޖެހެ އެވެ.

އޭގެ އިތުރުން، މައްސަލައިގެ ވަށައިގެންވާ ކަންކަމުގެ ތެރެއިން އަދަބަށް އަސަރުކޮށްފާނެ ކަންކަމުގެ މަޢުލޫމާތާއި، މައްސަލާގައި ހިމެނޭ ހެކިންނަށް ނުރަނގަޅު ނުފޫޒެއް ފޯރާފާނެކަމުގެ އިޙްތިމާލު އޮތްނަމަ، އެކަމުގެ މަޢުލޫމާތާއި، އެ މައްސަލައާ ގުޅޭގޮތުން ތަޙްޤީޤްކުރި ފަރާތުން ދެކޭގޮތް ބަޔާންކުރަންޖެހެ އެވެ.

މި އިރުޝާދާއި ގުޅޭ ގޮތުން ޕީޖީ ކުރައްވާފައިވާ ޓްވީޓްގައި ގިނަ އޮފިސަރުންތަކެއް ފުރިހަމަ މަސައްކަތްތަކެއް ކުރައްވަމުންދާކަން ވަނީ ފާހަގަ ކުރައްވާފަ އެެވެ.

މި އިރުޝާދުގެ ބޭނުމަކީ އޮނިގަނޑުގެ ތެރެއަށް ފެއްތުން ކަމަށާއި އެއް އަމާޒަކަށް ވާސިލްވުމަށް ފުލުހުންނާއި ވީހާވެސް ގާތުން ޕްރޮސެކިއުޓަރުން މަސައްކަތް ކުރައްވަން ޖެހޭ ކަމަށް ޕީޖީ ވިދާޅުވި އެވެ. ތަފާތު ކުރުމެއް ނެތި މައްސަލަތައް ބެލުމަކީ ހޯދައިދެވޭ އިންސާފެއްކަން ޕީޖީ ވަނީ ފާހަގަ ކުރައްވާފައެވެ.