ޓްރީޓޮޕް ހޮސްޕިޓަލަށް ޑޮކްޓަރަށް ދައްކަން ދިޔަ މީހަކު ޕޮޒިޓިވްވެއްޖެ
12 މެއި 2020 | އަންގާރަ 17:39އެމީހާއަކީ އެހެން ސަބަބަކާއި ހުރެ ޑޮކްޓަރަށް ދައްކަން ދިޔަ މީހެއް
ޓްރީޓޮޕް: ހޮސްޕިޓަލަށް ދައްކަން ދިޔަ މީހަކު ވަނީ ޕޮޒިޓިވްވެފައި
ޓްރީޓޮޕް ހޮސްޕިޓަލަށް ޑޮކްޓަރަށް ދައްކަން ދިޔަ މީހަކު ކޮވިޑް-19 އަށް ޕޮޒިޓިވްވެއްޖެ އެވެ.
އެކަން ހާމަކުރެއްވީ އެންއީއޯސީގައި ބޭއްވި ނޫސްވެރިންގެ ބައްދަލުވުމުގައި އެޗްޕީއޭގެ ޑރ. އިބްރާހިމް އަފްޒަލް އެވެ. ޑރ އަފްޒަލް ވިދާޅުވީ، އެހެން ސަބަބަކާއި ހުރެ ޓްރީޓޮޕް ހޮސްޕިޓަލަށް ދައްކަން ދިޔަ މީހަކު ކޮވިޑް-19 އަށް ޓެސްޓު ކުރުމުގެ އެ މީހާ ބައްޔަށް ޕޮޒިޓިވްވެފައިވާ ކަމަށެވެ.
އިތުރު މައުލޫމާތެއްް ޑރ. އަފްޒަލް ހާމައެއް ނުކުރައްވަ އެވެ. ރާއްޖޭގެ އާއްމުންގެ ތެރޭގައި ކޮވިޑް-19 އޮތް މިންވަރު ބެލުމުގެ ގޮތުން އެޗްޕީއޭއީން ދަނީ އެކި ސަރަހައްދުތަކުން ރެންޑަމް ސާމްޕަލް ނަގަމުންނެވެ.
އެންއޯއީސީން ބުނެފައިވާ ގޮތުން މިހާތަނަށް 200 ރެންޑަމް ސާމްޕަލް ވަނީ ނަގާފަ އެވެ. އަދި ކުރިޔަށް އޮތްތަނުގައި ދުވަލަކު ނެގޭ ސާމްޕަލް ތަކުގެ އަދަދު އިތުުރުކުރުމުގެ މަސައްކަތް ކުރަމުންދާ ކަމަށް އެންއީއޯސީން ވަނީ ބުނެފަ އެވެ.
ރާއްޖޭގައި ކޮވިޑް-19 އަށް 904 މީހަކު ވަނީ ޕޮޒިޓިވްވެފައެވެ. އޭގެ ތެރެއިން އެންމެ ގިނައީ ބަންގްލަދޭޝް އަށް ނިސްބަށްވާ މީހުންނެވެ. މި ބައްޔަށް ދިވެހިންގެ ތެރެއިން 304 މީހަކު ވަނީ ޕޮޒިޓިވްވެފައެވެ.
