މަޝްހުރޫ ވިޔަފާރިވެރިޔާ ގާސިމް އިބްރާހިމްގެ ވީމިޑިއާ ކުންފުނީގެ މުވައްޒަފުންގެ އޭޕްރިލް، މޭ އަދި ޖޫން މަހު މުސާރައިގެ ގޮތުގައި 2222 (ދެހާސް ދުއިސައްތަ ބާވީސް) ރުފިޔާދޭ ގޮތަށް ނިންމައިފި އެވެ.

ވީމީޑިއާ ހިންގާ އައިލެންޑް ބްރޮޑްކާސްޓިން ކުންފުނިން އަންގާރަ ދުވަހު މުވައްޒަފުންނަށް ފޮނުވި ސަރކިއުލާއެއްގައި ބުނީ، ކޮވިޑް-19 ގެ ބަލިމަޑުކަން ރާއްޖެއިން ފެނުމާއި ގުޅިގެން، ޓޫރިޒަމްގެ ސިނާއަތުން މައި ކުންފުންޏަށް ވަންނަމުން ދިޔަ އާމްދަނީ ލިބުން އެއްކޮށް ހުއްޓި، އެކަމުގެ ސަބަބުން ކުންފުނި ހިންގުމަށާއި މުވައްޒަފުންނަށް ދޭންޖެހޭ އުޖޫރައާއި އިނާޔަތްތައް ދިނުމުގައި ވަރަށް ބޮޑެތި ދަތިތަކާއި ކުރިމަތިލާން ޖެހިފައިވާ ކަމަށެވެ.

މި ހާލަތުގައި ކުންފުނި ދެމެހެއްޓުމަށްޓަކައި ކުރެވުނު މަސައްކަތުން، އާމްދަނީ އިތުރުކުރެވޭނެ އެއްވެސް އަލި މަގެއް މި ވީހާތަނަށް ފެނިފައިނުވާތީއާ ކުންފުނީގެ އޮޕަރޭޝަންސް ވަގުތީ ގޮތުން ހުއްޓާލަންޖެހޭ ދަރަޖައަށް ކަންކަން ގޮސްފައިވާކަން ހިތާމައާއިއެކު ފާހަގަކުރާ ކަމަށް ވީ މީޑިއާއިން ވަނީ ހާމަކޮށްފަ އެވެ.

އެ ކުންފުނިންން އަންގާރަ ދުވަހު ހަމަޔަށް، ކުރިން ކަނޑައަޅާފައިވާ ގޮތަށް އޭޕްރީލް މަހުން ފެށިގެން މުސާރަ ވަކިވަރަކަށް އުނިކޮށްގެންވެސް ދެވޭނެ އެއްވެސް ގޮތެއް ނެތުމާއިއެކު އޭޕްރިލް، މޭ އަދި ޖޫން މަހު މުސާރައިގެ ގޮތުގައި ދެވޭނެ ކަމަށް ބެލެވެނީ ކޮންމެ މުވައްޒަފަކަށްވެސް 2222 (ދެހާސް ދުއިސައްތަ ބާވީސް) ރުފިޔާ ކަމަށެވެ.

މިހާލަތުގައި ކުންފުނީގެ ހިންގުން ވަގުތީ ގޮތުން މެދުކަނޑާލަން ޖެހުނަސް ކުރިއަށް އޮތް ތިން މަހަށް ކަނޑައެޅިފައިވާ މުސާރައާއި ރޯދަމަހުގެ އިނާޔަތުގެ ފައިސާ އެ މުވައްޒަފެއް ގެބޭންކް އެކައުންޓަށް ޖަމާކޮށް، އެކަން މުވައްޒަފުންނާއި ހިއްސާކުރެވޭނެ އެވެ.

އެ ގޮތަށް ނިންމީވެސް މިހާލަތުގައިވެސް އެއްވެސް މުވައްޒަފަކު ވަޒީފާއިން ދޫކޮށްލަން ބޭނުން ނުވާތީއާއި، ކުންފުންޏަށް އެއްވެސް ފައިސާއެއް ހޯދުނަސް، އެ ފައިސާ ހަމަހަމަ އަށް ހުރިހާ މުވައްޒަފުންގެ މެދުގައި ހިއްސާކުރުމުގެ މަގްސަދުގައި ކަމަށް ކުންފުނިން ބުންޏެވެ.

ނަމަވެސް، ޖޫން މަހުގެ ނިޔަލަށް އިގްތިސާދު މިހާލަތުން އަރައިނުގަނެވި އާމްދަނީ ލިބޭނެ ގޮތެއް ނުފެނިއްޖެނަމަ މުވައްޒަފުންގެ ވަޒީފާއާ މެދު ގޮތެއް ނިންމާ އެކަން ކޮންމެމުވައްޒަފަކަށްވެސް އަންގަމުން ގެންދާނެ ކަަމަށް ވީ މީޑިއާއިން ނެރެފައިވާ ބަޔާނެއްގައި ބުންޏެވެ.

ވީމީޑިއާ ބެހޭ ގޮތުން އެ ކުންފުނިން ބަޔާނެއް ނެރެފައިވާއިރު، އެ ކުންފުނީގެ ގިނަ އަދަދެއްގެ މުވައްޒަފުން މި އަހަރުގެ ތެރޭގައި ވަނީ ވަކިކޮށްފައި އެވެ. އަދި މިހާރު ތިބި މަދު މުވައްޒަފުންގެ މާޗް މާހުގެ މުސާރައިން އެއްބައި ދީފައިވާއިރު ނިމިގެންދިޔަ އެޕްރީލް މަހުގެ މުސާރައާއި ރަމަޟާން މަހުގެ އެލަވެންސް އަދި ދީފައެއް ނުވެ އެވެ.