އިންޑިއާއިން ރާއްޖެއަށް ދެއްވާ އެހީތެރިކަމަށް ރައީސުލްޖުމްހޫރިއްޔާ ޝުކުރު އަދާ ކުރައްވައިފި
އިންޑިއާއިން ރާއްޖެއަށް ޒަރޫރީ ކާބޯތަކެތި ފޯރުކޮށްދީފައިވޭ
އިންޑިއާއިން ރާއްޖެއަށް އެކި ގޮތްގޮތުން އެހީވަމުންދާއިރު، ރައީސް ޞާލިޙު ވަނީ އިންޑިއާގެ ބޮޑުވަޒީރު ނަރެންދްރަ މޯދީއާއި އިންޑިއާގެ ރައްޔިތުންނަށް ޝުކުރު ދަންނަވާފައި
ކޮވިޑް-19 ގެ ބަލިމަޑުކަމުން އަރައިގަތުމަށް އަވައްޓެރި އިންޑިއާއިން ރާއްޖެއަށް ވެދެމުންދާ އެހީތެރިކަން ފާހަގަ ކުރައްވައި އެކަމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު ޝުކުރު އަދާ ކުރައްވައިފިއެވެ.
ކޮވިޑް-19 އާ ގުޅިގެން ޖަޒީރާ ޤައުމުތަކަށް ކުރިމަތިވެފައިވާ ގޮންޖެހުންތަކުން އަރައިގަތުމަށް އެހީވުމަށް "މިޝަން ސާގަރު" ގެ ނަމުގައި އިންޑިއާއިން ލޯންޗުކުރި ޙަރަކާތުގައި އަންގާރަ ދުވަހު ފުރަތަމަ މަންޒިލެއްގެ ގޮތުން ރާއްޖެއަށް ޒަރޫރީ ކާބޯތަކެތި ފޯރުކޮށްދީފައިވާއިރު، ރައީސް ޞާލިޙު ކުރެއްވި ޓްވީޓެއްގައި ވަނީ އެކަމަށް ޝުކުރު އަދާ ކުރައްވާފައެވެ.
އެކަމާ ގުޅޭގޮތުން ރައީސް ޞާލިޙު ކުރެއްވި ޓްވީޓެއްގައި ވިދާޅުވީ، ކޮވިޑް-19 ގެ މި ބަލިމަޑުކަމުގެ ތެރޭގައި އިންޑިއާއަކީ ރާއްޖޭގެ ޙަޤީޤީ ރަޙުމަތްތެރިއެއް ކަމަށެވެ. ޚާއްޞަ ގޮތެއްގައި އިންޑިއާގެ އަސްކަރީ މަނަވަރެއްގައި ރާއްޖެއަށް އަންގާރަ ދުވަހު ފޯރުކޮށްދިން ޒަރޫރީ ކާބޯތަކެއްޗަކީ މި ދަނޑިވަޅަށް ނުހަނު ބޭނުންތެރި އެހީއެއްކަން ރައީސް ފާހަގަ ކުރެއްވިއެވެ.
ރައީސް އިތުރަށް ވިދާޅުވީ، އިންޑިއާއިން ރާއްޖެއާމެދު ބަހައްޓާ ގާތްކަމަށްޓަކައި އިންޑިއާގެ ބޮޑުވަޒީރު ނަރެންދުރަ މޯދީއާއި އިންޑިއާގެ ރައްޔިތުންނަށްވެސް ޚާއްޞަ ޝުކުރެެއް އަރިސްކުރައްވާ ކަމަށެވެ.
އިންޑިއާއިން ރާއްޖެއަށް ގެނައި 580 ޓަނުގެ އެހީގެ މި ޝިޕްމަންޓުގައި 200 ޓަނުގެ ހަނޑޫ، 140 ޓަނުގެ ގޮދަން ފުށް، 90 ޓަނުގެ ހަކުރު އަދި 120 ޓަނުގެ ރީނދޫ މުގުގެ އިތުރުން 26 ޓަނުގެ ފިޔާ ހިމެނޭނެ ކަމަށް ރާއްޖޭގައި ހުންނަ އިންޑިއާ ހައި ކޮމިޝަނުން ބުނެފައިވެއެވެ.
ރާއްޖެއަށް މިތަކެތި ފޯރު ކޮށްދިނުމަށްފަހު، މި މަނަވަރު އިތުރު 4 ޤައުމަކަށް ދަތުރު ކުރުމަށް ހަމަޖެހިފައިވެއެވެ. އެއީ މޮރީޝަސް، ސީޝެލްސް، މަޑަގަސްކަރ އަދި ކޮމޮރޯސްއެވެ.
އިންޑިއާއިން ވަނީ ފާއިތުވެދިޔަ ދެ މަސް ދުވަހުގެ ތެރޭގައި އެކި ގޮތްގޮތުން ދިވެހިރާއްޖެއަށް އެހީތެރިކަން ފޯރުކޮށްދީފައެވެ. އެގޮތުން ޞިއްޙީ މާހިރުންގެ ޓީމެއް ރާއްޖެއަށް ފޮނުވުމާއި، ބޭހުގެ ޝިޕްމެންޓްތައް ފޮނުވުމާއި، ވޫހާންގައި ތާށިވެފައި ތިބި ދިވެހިން އަނބުރާ ރާއްޖެ އަށް ގެނެސްދިނުމުގައި އެހީތެރިވުމާއި، ކޮވިޑް-19 ބަލިމަޑުކަމުން ސަލާމަތް ވުމުގައި އިންޑިއާއިން ބޭނުން ކުރާ އުކުޅުތަކާއި ޢިލްމު ހިއްސާކުރުން ހިމެނެއެވެ.
