ކޮވިޑް-19 އާއި ގުޅިގެން ރަށްރަށަށް ދާން ބޭނުންވާ މީހުންގެ އަދަދު 10،000ށް ވެސް އަރާނެކަމަށާއި މި ދަނޑިވަޅުގައި ކެއްތެރިކަން އިސްކުރެއްވުމަށް ޓުއަރިޒަމް މިނިސްޓަރ އަލީ ވަހީދު އިލްތިމާސްކުރައްވައިފި އެވެ.

ރާއްޖެޓީވީގެ ކޮވިޑް-19 ކަވަރޭޖަށް ދެއްވި ހާއްސަ ބަސްތީގަތުމެއްގައި މިނިސްޓަރ އަލީ ވަހީދު ވިދާޅުވީ، މާލެ ސިޓީގައި ބަލި ކޮންޓްރޯލްކުރުމަށް އަޅާފައިވާ ފިޔަވަޅުތަކުގެ ސަބަބުން ރަށަށް ދާން ބޭނުންވާ ފަރާތްތަކަށް ތަކްލީފްތަކާއި ކުރިމަތިލާންޖެހޭކަން ގަބޫލުކުރާކަމަށާއި އެންމެ ފުރަތަމަ ލިސްޓު ލިބުން އިރު 1000 މީހުންވެސް ލިސްޓުގައި ނެތްކަމަށެވެ.

ނަމަވެސް މިހާރު ރަށަށް ދާން ބޭނުންވާ މީހުންގެ އަދަދު 5000ށް އަރާފައިވާކަމަށާއި ކުރިޔަށް އޮތް ތަނުގައި ދާން ބޭނުންވާ މީހުންގެ އަދަދު 10،000ށް ވެސް އަރާނެކަމަށް އަލީ ވަހީދު ވިދާޅުވި އެވެ. މިނިސްޓަރ ވަނީ ރަށަށް ދާން ބޭނުންވާ ފަރާތްތައް ކެއްތެރިކަން އިސްކުރުމަށް މިނިސްޓަރ އިލްތިމާސްކުރައްވާފަ އެވެ.

މިނިސްޓަރ އިތުރަށް ވިދާޅުވީ، ތާށިވެފައި ތިބި ފަރާތްތައް އުޅެމުންދަނީ ވަރަށް ދަތި ހާލުގައިކަން ގަބޫލުކުރައްވާކަމަށާއި ނަމަވެސް، ރަށަށް ގޮސްގެން ބަލި ފެތުރި ކޮންޓްރޯލް ނުކުރެވިއްޖެނަމަ އިތުރަށް ދަތިވާނެކަމަށެވެ.

ސަރުކާރުގެ އަމާޒަކީ މިހާރު ހަމަޖެހިފައިވާ 1000 ކަރަންޓީން ޖާގައިގައި 14 ދުވަހު ހަމަކުރުމަށްފަހު ޓެސްޓްގެ ނަތީޖާ ނެގެޓިވްވުމުން އެފަރާތްތަކަށް ރަށަށް ދެވޭނެ އިންތިޒާމް ހަމަޖެއްސުމެވެ. ރަށަށްދާން ބޭނުންވެގެން މިހާރު އެދިފައިވާ ފަރާތްތައް "ކްލިއަރ" ކުރަމުން ދާނެކަމަށް އަލީ ވަހީދު ވިދާޅުވި އެވެ.

ކުރިޔަށް އޮތް ދެ ހަފްތާގައި ހާލަތު ބަދަލުވެ، ރަށްރަށުގައި ހުރި ފެސިލިޓީސްތަކަށް ދިއުމުގެ ހުއްދަ މެޑިކަލް ބޯޑުން ދެއްވައިފިކަމުގައިވާނަމަ، ރަށްރަށުގައި ހުންނަ ގެސްޓްހައުސްގައި ކަރަންޓީންވެ 14 ދުވަސް ހަމަކޮށް ނެގެޓިވްވުމުން ރިލީޒްކުރާ ޕޮލިސީއާއި ހަމަޔަށް ދާނެ ކަމަށް އަލީ ވަހީދު ވިދާޅުވި އެވެ.

ރަށްރަށުން މާލެ އައިސް ތިބި މީހުންގެ ތެރެއިން އެނބުރި ރަށަށް ދާން ބޭނުންވާ 5000 މީހުން މިހާރު ނަން ނޯޓުކޮށްފައި ވެއެވެ. މީގެ ތެރޭގައި އިސްކަންދެވޭ ތަރުތީބެއް އޮންނައިރު، މިހާރު ރަށަށް ދާން އެދެވޭ ފަރާތްތަކުގެ ލިސްޓުގައި ބައެއް ފަރާތްތައް ނުހިމެނޭ ކަމަށް ބުނެ އެ ފަރާތްތަކުން ވަނީ ކަންބޮޑުވުން ފާޅުކޮށްފަ އެވެ.