ޖޫން 12 ގައި ސްޕެނިޝް ލީގު ފެށޭނެ ކަމަށް އުންމީދު ކުރަން: ޓެބާސް
11 މެއި 2020 | ހޯމަ 20:18ސްޕެއިންގެ ދެ ޑިވިޝަނުން ފަސް ކުޅުންތެރިއަކު ވަނީ ކޮވިޑް-19 އަށް ޕޮޒިޓިވްވެފައި
ލަލީގާގެ ރައީސް ހަވިއޭ ޓެބާސް: ސްޕެނިޝް ލީގު އަލުން ފަށަން އަންނަނީ މަސައްކަތް ކުރަމުން
މެދުކަނޑާލާފައިވާ ސްޕެނިޝް ލީގު ޖޫން މަހުގެ 12 ވަނަ ދުވަހު ފެށޭނެ ކަމަށް އުންމީދު ކުރާ ކަމަށް ލަލީގާގެ ރައީސް ހާވިއޭ ޓެބާސް ވިދާޅުވެއްޖެ އެވެ.
ކޮރޯނާވައިރަސް (ކޮވިޑް-19) އާ ގުޅިގެން މިދިޔަ މާޗު މަހު ސްޕެނިޝް ލީގުގެ ކުޅުން ހުއްޓާލި ނަމަވެސް، މިމަހުގެ ހަތަރުވަނަ ދުވަހުން ފެށިގެން ކުޅުންތެރިން އެކަނި ތަމްރީނުތައް ހެދުމުގެ ހުއްދަ ސްޕެއިން ސަރުކާރުންވަނީ ދީފަ އެވެ. އެއާއެކު ބާސެލޯނާ، ރެއާލް މެޑްރިޑް އަދި އެތުލެޓިކޯ މެޑްރިޑްގެ ކުޅުންތެރިން ވަނީ ތަމްރީނުތަކަށް ނުކުމެފައެވެ.
ސްޕެނިޝް ލީގު އަލުން ފަށަން ތައްޔާރު ވަމުންދާއިރު، ސްޕެއިންގެ ފުރަތަމަ ޑިވިޝަނާއި ދެވަނަ ޑިވިޝަނުގެ ހުރިހާ ކުޅުންތެރިން ވަނީ ކޮވިޑް-19 އަށް ޓެސްޓު ކޮށްފަ އެވެ. އެއާއެކު ދެ ޑިވިޝަނުން ފަސް ކުޅުންތެރިއަކު ވަނީ ކޮވިޑް-19 އަށް ޕޮޒިޓިވްވެފަ އެވެ.
ލަލީގާގެ ރައީސް ހަވިއޭ ޓެބާސް ވިދާޅުވީ ލީގު އަލުން ފަށަން މަސައްކަތް ކުރަމުން އަންނަނީ ކްލަބުތަކަށް ލިބޭނެ މާލީ ގެއްލުންތަކުން ސަލާމަތްކުރުމުގެ ގޮތުންނެވެ. ލީގުގެ މެޗުތައް ފަށަން ގިނަ ކްލަބުތަކުން އެއްބަސްވެފައިވާ ކަމަށާއި އަންނަ ޖޫން މަހުގެ 12 ވަނަ ދުވަހު ލީގު ފެށޭނެ ކަމަށް އުންމީދު ކުރާ ކަމަށްވެސް ވަނީ ވިދާޅުވެފަ އެވެ.
ސްޕެނިޝް ލީގު އަލުން ފަށާނެ ތާރީޚެއް އަދި ކަނޑައަޅާފައި ނުވާއިރު، ރިޕޯޓުތައް ބުނާ ގޮތުން ލަލީގާގެ ވިސްނުމަކީ މި މަހު 18 ވަނަ ދުވަހު ޓީމުތަކުގެ ހުރިހާ ކުޅުންތެރިން އެކުގައި ތަމްރީނުތައް ހަދަން ފެށުމަށްފަހު، އަންނަ ޖޫން މަހު ލީގު ކުރިއަށް ގެންދިޔުމެވެ.
އަދި ސީޒަން ފުރިހަމަ ކުރަން ހުރިހާ މަސައްކަތެއް ކުރާނެ ކަމުގެ ޔަގީންކަން ލަލީގާއިން ޔުއެފާއަށް ދީފައިވާ ކަމަށްވެސް ރިޕޯޓުތައް ބުނެ އެވެ.
