އިތުރު މީހެއްގެ ބަލި ފަސޭހަވެއްޖެ، ޖުމްލަ 31 ރިކަވަރީ
11 މެއި 2020 | ހޯމަ 17:09ޖުމްލަ 863 މީހަކު ވަނީ ޕޮޒިޓިވްވެފައި
ކޮވިޑް-19 އަށް ޓެސްޓުކުރުން
ކޮވިޑް-19 ޖެހިފައިވާ މީހުންގެ ތެރެއިން އިތުރު މީހެއްގެ ބަލި ފަސޭހަވެއްޖެ ކަން ހާމަކޮށްފި އެވެ.
ބަލިން ފަސޭހަވެފައިވަނީ ކޭސް 95 (MAV0095) ކަމަށް އެންއީސީގައި ބޭއްވި ނޫސްވެރިންގެ ބައްދަލުވުމުގައި ޑރ. އިބްރާހިމް އަފްޒަލް ވިދާޅުވި އެވެ. މި މީހާއަކީ AMD ކްލަސްޓަރއަށް ނިސްބަތްވާ 38 އަހަރުގެ ބަންގްލަދޭޝް ފިރިހެނެކެވެ. އެ މީހާ ޕޮޒިޓިވްވީ ކަމަށް ރިޕޯޓްކޮށްފައިވަނީ 22 އޭޕްރިލް ގައެވެ.
މިއާއެކު، ރާއްޖެއިން ބަލިން ފަސޭހަވި މީހުންގެ ޖުމްލަ އަދަދު ވަނީ 31ށް އަރާފަ އެވެ. ރާއްޖެއިން ބަލިން ފަސޭހަވާ މީހުންގެ އަދަދު އުޅެނީ ބައްޔަށް ޕޮޒިޓިވްވާ މީހުންގެ އަދަދުތަކާ އަޅާކިޔާއިރު، ވަރަށް ދަށެވެ. ޖުމްލަ ރިކަވަރީ ރޭޓު އުޅެނީ ގާތްގަނޑަކަށް ތިން އިންސައްތައިގަ އެވެ.
ރާއްޖެއިން ރިޕޯޓްކުރެވިފައިވާ ކޭސްތަކުގެ އަދަދަށް ބަލާއިރު، އަވަށްޓެރި ސްރީލަންކާއާ ގާތްކުރާ އަދަދަކަށް ރާއްޖެއިން ވަނީ ބަލި ފެނިފަ އެވެ. އާބާދީގެ ނިސްބަތުން ބަލާއިރު، ދެކުނު އޭޝިއާ ސަރަހައްދުން އެންމެ ގިނަ އަދަދެއްގެ ޕޮޒިޓިވް ކޭސްތައް ރިޕޯޓްކުރެވިފައިވަނީ ދިވެހިރާއްޖެއިންނެވެ.
