ލޮކްޑައުންއާ ޚިލާފުވެގެން މިހާތަނަށް 169 ދިވެހިން ފުލުހުންގެ ބެލުމުގެ ދަށަށް ގެނެސްފި
11 މެއި 2020 | ހޯމަ 12:43200ށް ވުރެ ގިނަ ބިދޭސީން ފުލުހުންގެ ބެލުމުގެ ދަށަށް ގެނެސްފައިވޭ
މާލެސިޓީ މަގުތައް ފުލުހުން ދަނީ އަބަދު ވެސް ފޯރިމަރަމުން
ލޮކްޑައުންނާ ޚިލާފުވެގެން މިހާތަނަށް 169 ދިވެހިން ފުލުހުންގެ ބެލުމުގެ ދަށަށް ގެނެސްފިއެވެ.
ހޯމަ ދުވަހު ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި ހޯމް މިނިސްޓަރު ޝައިޚް އިމްރާން ޢަބްދުﷲ ވިދާޅުވީ އޭޕްރީލް 15ގައި މާލެސިޓީ ލޮކްޑައުން ކުރި ފަހުން މިހާތަނަށް 169 ދިވެހިން ފުލުހުންގެ ބެލުމުގެ ދަށަށް ގެނެސްފައިވާއިރު، 200ށް ވުރެ ގިނަ ބިދޭސީން ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ. އަދި 3067 ފަރާތެއް ޖޫރިމަނާ ކޮށްފައިވާ ކަމަށް މިނިސްޓަރު ވިދާޅުވިއެވެ.
މިނިސްޓަރު އިމްރާން ވިދާޅުވީ ލޮކްޑައުންއާ ހިލާފުވެގެން ފިޔަވަޅު އެޅުމަކީ ކުރަން ބޭނުންވާ ކަމެއް ނޫން ކަމަށެވެ. ނަމަވެސް ހުރިހާ ރައްޔިތުންގެ ސަލާމަތާ ރައްކާތެރިކަން ކަށަވަރުކުރުމަށްޓަކައި ކޮންމެހެން އަޅަންޖެހިގެން އަޅާފައިވާ ފިޔަވަޅުތައްކަން މިނިސްޓަރު ފާހަގަކުރެއްވިއެވެ.
މާލެ ސިޓީ އެންމެ ފުރަތަމަ ލޮކްޑައުން ކޮށްފައިވަނީ އޭޕްރީލް މަހުގެ 15 ވަނަ ދުވަހު މާލެއިން ކޮވިޑް-19 އަށް ޕޮޒިޓިވްވި މީހެއް ފެނުމާއެކުގަ އެވެ. އޭގެފަހުން އޭޕްރީލް 17 ވަނަ ދުވަހު އޭޕްރީލް 30 އާ ހަމައަށް ލޮކްޑައުންގެ މުއްދަތު އިތުރުކުރިއެވެ. އަދި އެފަހުން މެއި މަހުގެ 14 ވަނަ ދުވަހާ ހަމައަށް ލޮކްޑައުންގެ މުއްދަތު ވަނީ އިތުރުކޮށްފަ އެވެ.
