ބިދޭސީން ގެންގުޅޭ ބޮޑެތި ކުންފުނިތަކުގެ އެހީއަށް ސަރުކާރުން އެދިއްޖެ
11 މެއި 2020 | ހޯމަ 12:50ކުންފުނިތަކުގެ އެހީތެރިކަން ހޯދަނީ ބިދޭސީންގެ ކަންކަން އިންތިޒާމު ކުރުމަށް
ހޯމް މިނިސްޓަރު އިމްރާން، ގިނަ ބައެއްގެ އެއްބާރުުލުން ލިބެމުންދާކަން ފާހަގަކުރެއްވި
ބިދޭސީ މަސައްކަތްތެރިން ގެންގުޅޭ ބޮޑެތި ކުންފުނިތަކުގެ އެހީތެރިކަމަަށް ދިވެހި ސަރުކާރުން އެދިއްޖެއެވެ.
ހޯމަ ދުވަހު ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި ހޯމް މިނިސްޓަރު ޝައިޚް އިމްރާން ޢަބްދުﷲ ވިދާޅުވީ މާލެސިޓީގައި އެކަނި ވެސް ގިނަ ޢަދަދެއްގެ ބިދޭސީން ތޮއްޖެހިގެން ދިރިއުޅެމުންދާ ކަމަށާއި، ބިދޭސީންގެ ކަންކަން މެނޭޖުކުރުމަށް އުދަނގޫތައް ކުރިމަތިވާ ކަމަށެވެ.
ނަމަވެސް ކޮވިޑް-19ގެ ވައިރަސް ކޮންޓްރޯލް ކުރުމަށް ބިދޭސީންގެ 'ކޮމިއުނިޓީ' އަށް ޚާއްޞަ ސަމާލުކަމެއްދޭން ޖެހޭކަން މިނިސްޓަރު ފާހަގަކުރެއްވިއެވެ. މިނިސްޓަރު އިމްރާން ވިދާޅުވީ ކުރިއަށް އޮތް މިދުވަސްތަކުގައި އިތުރަށް ސަމާލުވެ، ރައްކާތެރިވުމަށް އެންއީއޯސީން ތަކުރާރުކޮށް އިލްތިމާސް ކުރަމުންދާ ކަަމަށާއި، މިދަނޑިވަޅުގައި ގިނަ ބައެއްގެ އެއްބާރުލުން ބޭނުންވާ ކަމަށެވެ.
ކޮވިޑް-19 ކޮންޓްރޯލްކޮށް ނައްތާލުމަށް ސަރުކާރުން ކުރަމުންދާ މަސައްކަތުގެ ދަށުން ބިދޭސީންގެ ކަންކަން ވެސް ޚާއްސަ ގޮތެއްގައި މޮނިޓަރ ކުރަމުންދާ މިދަނޑިވަޅުގައި ބިދޭސީ މަސައްކަތްތެރިން ގެންގުޅޭ ބޮޑެތި ކުންފުނިތަކުގެ ބޮޑު އެހީތެރިކަމާ އެއްބާރުލުން ބޭނުންވާ ކަމަށް މިނިސްޓަރު އިމްރާން ވިދާޅުވިއެވެ.
މިނިސްޓަރު އިމްރާން ވިދާޅުވީ އިތުރަށް އެޅޭނެ ފިޔަވަޅުތަކާއި، ޢަމަލުކުރާ އުޞޫލުތައް އިތުރަށް ހަރުދަނާ ކުރުމާ ގުޅޭ ގޮތުން ކަމާބެހޭ ފަރާތްތަކާއެކު މަޝްވަރާތައް ކުރިއަށް ގެންދާ ކަމަށެވެ.
ރާއްޖޭގައި މިހާތަނަށް ކޮވިޑް-19 އަށް ޕޮޒިޓިވްވި މީހުންގެ ތެރެއިން ގިނަ ޢަދަދެއްގެ މީހުންނަކީ ބިދޭސީންނެވެ. އޭގެ ތެރޭގައި މިފަދަ ތަންތަނުން ފެނިފައިވާ ކްލަސްޓަރތައް ގިނަ އެވެ. އަދި މިފަދަ ބައެއް ތަންތަނުން ނެގި ސާމްޕަލްތަކުގެ 100 އިންސައްތަ ޕޮޒިޓިވްވެފައިވާ ކަމަށް މީގެކުރިން ވަނީ ހާމަވެފަ އެވެ.
މިތަންތަނުގައި ދިރިއުޅޭ މީހުންނަށް ސަރުކާރުން ގާއިމުކޮށްފައިވާ ކަރަންޓީން ފެސިލިޓީސްތަކަށް ބަދަލުކުރުމުގެ މަސައްކަތް ވަނީ ފަށާފަ އެވެ. އެގޮތުން ހުޅުމާލެ ފޭސް 2، ގުޅިފަޅު އަދި ވިލިވަރުގައި އަންނަނީ ބިދޭސީންނަށް ޚާއްޞަކޮށްގެން ކަރަންޓީނު ފެސިލިޓީތައް ހަދަމުންނެވެ.
މިހާރު ހުރި ބިދޭސީ ކަރަންޓީން ފެސިލިޓީތަކުގައި 612 މީހަކު އެބަތިއްބެވެ. އަދި މީގެ ތެރެއިން 475 މީހުންނަކީ ތޮއްޖެހިގެން އުޅޭ ތަންތަނުން އައިސޮލޭޝަނަށް ގެންދެވޭ މީހުން ކަމަށް ކޮވިޑް-19 ޓާސްކް ފޯސްގެ ތަރުޖަމާނު މަބްރޫކް ޢަޒީޒް ވަނީ ވިދާޅުވެފަ އެވެ.
އޭގެ އިތުރުން މާލޭގައި އުޅޭނެ ތަނެއް ނެތި، ވަކި ވަޒީފާއެއް އަދާ ނުކުރާ މީހުން އެހެން ތަނަކަށް ބަދަލުކުރުމަށް އެޗްޕީއޭއިން ކުރަމުންދާ މަސައްކަތުގެ ތެރެއިން 566 ބިދޭސީއަކު އެފަދަ އެކޮމަޑޭޝަން ތަކަށް ބަދަލުކުރެވިފައިވާކަމަށްވެސް މަބްރޫކް ވިދާޅުވެފައި ވެއެވެ.
