"މާލެ ސަރަޙައްދުގައި އެވްރެޖްކޮށް 900-1000 އާ ދެމެދުގެ އަދަދަކަށް ގޭހުގެ ޑެލިވަރީގެ ޚިދުމަތްތައް ފޯރުކޮށްދެވޭ"
މިދަނޑިވަޅުގައި ރައްޔިތުންގެ ކިބައިން ކެތްތެރިވުމަށް ވަރަށް ބޮޑަށް އެދިވަޑައިގަންނަވާ
މޯލްޑިވް ގޭހުގެ ލުއި ފުޅިތަކެއް، ޚިދުމަތް ނުކެނޑި ފޯރުކޮށްދޭނެކަމުގެ ޔަގީންކަން އެ ކުންފުނިން ދީފައިވޭ
މާލޭ ސަރަޙައްދުގައި ދުވާލެއްގެ މައްޗަށް އެވްރެޖްކޮށް 900އާ 1000އާ ދެމެދުގެ އަދަދަކަށް ޑެލިވަރީގެ ޚިދުމަތް ފޯރު ކޮށްދެވޭކަމަށް މޯލްޑިވްސް ގޭސް ގެ އެކްޓިންގ މެނޭޖިންގ ޑިރެކްޓަރ އަލީ އިކްރާމް ވިދާޅުވެއްޖެއެވެ.
ރާއްޖެޓީވީގެ ކޮވިޑް-19 ކަވަރޭޖަށް ދެއްވި ޚާއްސަ އިންޓަރވިއުއެއްގައި އިކްރާމް ވިދާޅުވީ، ގްރޭޓަރ މާލެ ސަރަޙައްދުގައި އެވްރެޖްކޮށް 900 އާ 1000އާ ދެމެދުގެ އަދަދަކަށް ޑެލިވަރީގެ ޚިދުމަތްތައް ފޯރުކޮށްދެވޭ ކަމަށެވެ. އަދި މި ދަނޑިވަޅުގައި ރައްޔިތުންގެ ކިބައިން ކެތްތެރިވުމަށް ވަރަށް ބޮޑަށް އެދިވަޑައިގަންނަވާ ކަމަށާއި، ކުރިއަށް އޮތް ތަނުގައި "ކޭޝް-ލެސް" ކޮށް މަސައްކަތް ކުރުމަށް ނިންމާފައިވާއިރު، އެކަމުގެ ސަބަބުން މަސައްކަތްތަކަށް ކޮންމެސް ވަރެއްގެ އަވަސްކަމެއް އަންނާނެކަމަށް އުއްމީދު ކުރެވޭކަމަށް އޭނާ ވިދާޅުވިއެވެ.
އޭގެ އިތުރުން، މިވަގުތު މަސައްކަތްތަކުގައި ބޮޑެތި ގޮންޖެހުންތަކެއް އެބަހުރި ކަން ފާހަގަކުރައްވައި އިކްރާމް ވިދާޅުވީ، ޚާއްސަކޮށް ހުޅުމާލޭގައި މަސައްކަތް ކުރާ މުވައްޒަފެއް ޕޮޒިޓިވްވި ހިސާބުން ހުޅުމާލޭގެ ހުރިހާ މުވައްޒަފުން ކަރަންޓީން ކުރަން ޖެހުނު ކަމަށެވެ. އަދި އެކަމުގެ ސަބަބުން ޚިދުމަތް ފޯރުކޮށްދިނުމަށް މާލެއިންވެސް މުވައްޒަފުން ގެންދަން ޖެހުނު ކަމަށް އޭނާ ވިދާޅުވިއެވެ.
އެގޮތުން ހުޅުމާލޭގައި މަސައްކަތް ކުރި 15 ސްޓާފުން ކަރަންޓީން ކުރަން ޖެހުނުކަން ފާހަގަކުރައްވައި އިކްރާމް ވިދާޅުވީ، މިހާރު ހުރިހާ ސްޓާފުންގެވެސް ސާމްޕަލް ނެގިފައިވާ ކަމަށެވެ. އަދި އެކަމުގެ ސަބަބުން މަސައްކަތުގެ ސްޕީޑް ވަރަށް ބޮޑަށް ލަސްވެގެން ދިޔަ ކަން އޭނާ ފާހަގަ ކުރެއްވިއެވެ.
އޭގެ އިތުރުން، އަތޮޅު ތެރެއިން މައްސަލަތައް ދިމާވާ ރަށްރަށުގައިވެސް 1 ދުވަސް ތެރޭގައި އެކަން ހައްލުކޮށް ޑެލިވަރީގެ ޚިދުމަތްތައް ހަމަޖެއްސުމަށް މަސައްކަތް ކުރައްވަމުން ގެންދަވާކަން އިކްރާމް ފާހަގަ ކުރެއްވިއެވެ.
