އާ ނިޒާމުގެ ތެރެއިން ކްރިމިނަލް ޖަސްޓިސްއަށް އިންޤިލާބީ ބަދަލެއް އަންނާނެކަމަށް އުންމީދު ކުރަން: ޕީޖީ
ވަކީލުންނަށް މިހާރު ގޭގައި ތިއްބަވައިގެން ވީޑިއޯ ކޮންފަރެންސް މެދުވެރިކޮށް ޝަރީއަތްތަކުގެ ބައިވެރިވެވޭނެ
ޕީޖީ އޮފީހުގެ ގާނޫނީ ވަކީލެއް ވީޑިއޯ ކޮންފަރެންސް މެދުވެރިކޮށް އަޑުއެހުމެއް ބައިވެރިވެވަޑައިގެން: މިނިޒާމަކީ ޚަރަދު ކުޑަވެފައި، އަވަސްވެފައި، ފަސޭހަތަކެއް ލިބިދޭ ނިޒާމެއް ކަމަށް ޕްރޮސެކިއުޓަރ ޖެނެރަލް
ކޮވިޑް-19 ބަލިމަޑުކަމާއި ގުޅިގެން ރާއްޖޭގެ ޖިނާޢީ ޢަދުލުގެ ނިޒާމަށް ގެނެސްފައިވާ ބަދަލުތަކާއި އަދި އިތުރަށް މި ނިޒާމު ހަރުދަނާ ކުރެވި، ޖިނާއީ ޢަދުލުގެ ނިޒާމަށް އިންޤިލާބީ ބޮޑު ބަދަލެއް އައުމަކީ ވަރަށް ބޮޑަށް އުންމީދު ކުރައްވާ ކަމެއް ކަމަށް ޕްރޮސެކިއުޓަރ ޖެނެރަލް (ޕީޖީ) ޙުސައިން ޝަމީމު ވިދާޅުވެއްޖެ އެވެ.
ރާއްޖެޓީވީގެ ކޮވިޑް-19 ކަވަރޭޖްގެ ތެރެއިން ވީޑިއޯ ކޮންފަރެންސްކޮށް ދެއްވި އިންޓަވިއުއެއްގައި ޕީޖީ ޝަމީމު ވިދާާޅުވީ، މާލެ ޞަރަޙައްދު ފުރަބަންދު ކުރުމާގުޅިގެން ޕީޖީ އޮފީހުން ހުއްދަދޭ ވަކީލުންނަށް ގޭގައި ތިއްބަވައިގެން ޝަރީޢަތް ތަކުގެ މަޖިލީހަށް ވަދެވޭ ގޮތަށް ހަމަޖައްސާފައިވާ ކަމަށެވެ. ޝަމީމު ވިދާޅުވީ، ރާއްޖޭގެ ކޮންމެ ހިސާބެއްގެ ކޯޓެއްގައި އަޑުއެހުމެއް ބޭއްވި ނަމަވެސް މިހާރު ޕީޖީ އޮފީހުގެ ޤާނޫނީ ވަކީލުން މަސައްކަތް ކުރެއްވޭނެ ގޮތަށް ތައްޔާރަށް ތިއްބެވި ކަމަށެވެ.
ނަމަވެސް ޝަމީމު ވަނީ، މާލެ ފުރަބަންދު ކުރުމާއި ގުޅިގެން ކޯޓަށް ހުށަހެޅިފައި ހުރި މައްސަލަތައް ހިންގުމުގައި ލަސްތަކެއް ހުރި ކަމަށާއި، ޚާއްޞަކޮށް ޝަރީޢަތް ނިމެންދެން ބަންދުކޮށްފައިވާ މީހުންގެ އިބްތިދާޢީ އަޑުއެހުންތައް ފަދަ އަޑު އެހުންތައް ނުހިނގާތީ އެކަމާއި ކަންބޮޑުވުން ފާޅުކުރައްވާފަ އެވެ.
ކްރިމިނަލް ކޯޓުގެ ޝަރީޢަތްތައް މެދުކެނޑިފައި އޮތުމަށްފަހު، މި ހަފުތާއިން ފެށިގެން ޝަރީޢަތް ނިމެންދެން ބަންދުކޮށްފައި ތިބި މީހުންގެ މައްސަލަތަކުގެ ތެރެއިން ކުރިޔަށް ގެންދެެވެން ހުރި މައްސަލަތައް ވީޑިއޯ ކޮންފަރެންސް މެދުވެރިކޮށް ކުރިޔަށް ގެންދިޔުމަށް ކްރިމިނަލް ކޯޓުން ވަނީ ނިންމާފައެވެ.
ޕީޖީ ޝަމީމު ވިދާޅުވީ، އެންމެ ފުރަތަމަ ކުރިޔަށް ގެންދާނީ ޙުކުމް ކުރަން ހުރި މީހުންނާއި، ޚުލާސާ ބަޔާން ހުށައަޅާ ހިސާބުގައި މައްސަލަ ގޮސްފައި ހުރި މީހުންގެ މައްސަލަތައް ކަމަށެވެ. އެ ބައި ނިމުމުން ދެން ކުރިޔަށް ގެންދާނީ ހެކިން ހާޒިރުކުރަން ޖެހޭ މައްސަލަތަކުގެ ތެރެއިން ސިފައިންނާއި، ފުލުހުންނާއި، ކަސްޓަމްސް އާއި ދައުލަތުގެ މުއައްސަސާތަކުގައި ތިބި މީހުން ހާޒިރުކޮށްގެން ގެންދަން ޖެހޭ މައްސަލަތައް ކަމަށެވެ.
ކޮވިޑް-19 އާ ގުޅިގެން ރައްކާތެރި ކަމެއްގެ ގޮތުން ޝަރީޢަތްތައް ވަނީ މަޑުޖައްސާލާފަ އެވެ. ޕީޖީ ވިދާޅުވީ، މިހާރު ވިޑިއޯ ކޮންފަރެންސް މެދުވެރިކޮށް ޝަރީޢަތްތައް ހިންގުމަށް ގޮތަށް ޕީޖީ އޮފީހުގައި ފަސް ނިޒާމެއް ޤާއިމު ކުރެވިފައިވާނެ ކަމަށެވެ. އެހެން ކަމުން ރާއްޖޭގެ ހުރިހާ ޞަރަޙައްދެއްގައި ވީޑިއޯ ކޮންފަރެންސް މެދުވެރިކޮށް ޝަރީޢަތްތައް ކުރިޔަށް ގެންދެވޭނެ ގޮތަށް އިންތިޒާމުތައް ރާވާފައިވާ ކަމަށެވެ.
މިއީ ފުރުޞަތެއްކަން ފާހަގަކުރައްވަމުން ޕީޖީ ޝަމީމު ވިދާޅުވީ، އަތޮޅުތަކުގެ ރަށްތަކުގެ ކޯޓުތަކަށް ހުށަހެޅިފައިވާ މައްސަލަތަކުގެ ތެރެއިން ޝަރީޢަތުގެ ކުރިން ބާއްވާ އިބްތިދާޢީ އަޑުއެހުންތައް ވީޑިއޯ ކޮންފަރެންސް މެދުވެރިކޮށް ކުރިއަށް ގެންދެވިއްޖެނަމަ ވަރަށް ބޮޑުތަނުން ޚަރަދު ކުޑަކުރެވިގެންދާނެ ކަމަށެވެ. އަދި ޝަރީޢަތްތައް ހިންގުމަށް ފަސޭހަތަކެއް ލިބި، އަވަސް ވެގެންދާނެ ކަމަށްވެސް ޝަމީމު ވިދާޅުވި އެވެ.
ޕީޖީ ޝަމީމު ވިދާޅުވީ، އެއް ރަށުން އަނެއް ރަށަށް ދަތުރުކުރުމަކީ އެހާ ފަސޭހަކަމަށްކަށް ނުވާއިރު މި ނިޒާމަށް ޢަމަލުކުރަން ފެށުމުން ލުއިތަކެއް ލިބިގެންދާނެ ކަމަށެވެ.
މި ޙާލާތުގައި، ވީޑިއޯ ކޮންފަރެންސް މެދުވެރިކޮށް، ބަންދުގެ މުއްދަތުގެ އަޑުއެހުންތައް ބާއްވާފައިވާއިރު، ފެމިލީ ކޯޓުން ކައިވެންޏެއްވެސް ވީޑިއޯ ކޮންފަރެންސް މެދުވެރިކޮށް ކޮށްދީފައި ވެއެވެ.
