ބިދޭސީން ތޮއްޖެހިގެން ދިރިއުޅެމުން ދިޔަ 30 ތަނަކުން ސާމްޕަލް ނަގައިފި
11 މެއި 2020 | ހޯމަ 00:51ތޮއްޖެހިގެން މާލެ ސަރަހައްދުގައި ބިދޭސީން ދިރިއުޅެމުން އަންނަ 33 ތަނެއް އަންނަނީ މޮނިޓަރ ކުރަމުން
ބިދޭސީ މަސައްކަތްތެރިއެއް: ގިނަ އަދަދެއްގެ ބަޔަކު ދިރިއުޅެނީ ވަރަށް ހާލުގައި
މާލޭގައި ގިނަ ޢަދަދެއްގެ ބިދޭސީން ތޮއްޖެހިގެން ދިރިއުޅެމުން ދިޔަ 30 ތަނެއްގައި އުޅެމުންދިޔަ ހުރިހާ މީހުންގެ ސާމްޕަލްތައް ނަގާ ނިންމާފައިވާ ކަމަށް ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ތަރުޖަމާން މަބްރޫކް އަޒީޒު ވިދާޅުވެއްޖެ އެވެ.
އާދީއްތަ ދުވަހުގެ ރޭ އެންއީއޯސީގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ތަރުޖަމާން މަބްރޫކް އަޒީޒް ވިދާޅުވީ ބިދޭސީން ތޮއްޖެހިގެން އުޅޭ 30 ތަނަކުން ސާމްޕަލް ނެގާފައިވާކަމަށާއި މިހާރު ސާމްޕަލް ނުނެގި ވަނީ މިގޮތަށް ފާހަގަވި 3 ތަނެއްގައި އުޅެމުންދިޔަ މީހުންގެ ކަމަށެވެ.
އެހެން ތަންތަނުގައި އުޅުމުންދިޔަ ހުރިހާ އެންމެންގެ ސާމްޕަލްތަކެއް ނެގިފައިވާއިރު ނަތީޖާ ލިބިފައިވަނީ މީގެތެރެއިން ބައެއް މީހުންގެ ކަމަށާއި އެތަނުން ނަތީޖާ ޕޮޒިޓިވްވި މީހުން އައިސޮލޭޓް ކުރެވިފައިވާ ކަމަށް މަބްރޫކް މީގެކުރިންވެސް ވަނީ ވިދާޅުވެފަ އެވެ. އަދި މިހާރުވެސް ބައެއް ސާމްޕަލްތައް ލެބޯޓްރީގައިވާ ކަމަށް މަބްރޫކް މީގެކުރިން ވިދާޅުވި އެވެ.
ބިދޭސީން ދިރިއުޅޭ ތަންތަން މޮނިޓަރ ކުރަން ފަށާފައިވާއިރު، މާލޭގައި ތޮއްޖެހިގެން ދިރިއުޅޭ ބައެއް ބިދޭސީން ވަނީ ހުޅުމާލެގައި ސަރުކާރުން ގާއިމްކޮށްފައިވާ ވަގުތީ ހިޔާއަށް ބަދަލުކޮށްފައެވެ. މާލޭގައި ކޮވިޑް-19 ފެތުރެމުންދާއިރު ބައްޔަށް ޕޮޒިޓިވްވި މީހުންގެ ތެރޭގައި ގިނަ އަދަދެއްގެ ބިދޭސީން ތިބުމުން އެ މީހުންގެ ތެރެއިން ގިނަ އަދަދެއްގެ ބަޔަކަށް ބަލި ޖެހިދާނެ ކަމުގެ ބިރު މިހާރު ވަނީ ހީވެފަ އެވެ.
ރާއްޖޭގައި ލިޔެކިޔުމެއްނެތި އުޅޭ ބީދޭސީންގެ ތެރެއިން 1500 ބަންގްލަދޭޝް މީހުން ޤައުމަށް ފޮނުވާލުމުގެ މަސައްކަތް މި ހަފުތާގައި ފެށިގެންދާނެ ކަމަށް ރައީސް ސޯލިހު ވަނީ ވިދާޅުވެފަ އެވެ..
