''މަގަރު'' މަނަވަރުން 200އަށް ވުރެ ގިނަ އިންޑިއާ މަސައްކަތްތެރިން ފުރާނެ: އިމިގްރޭޝަން
10 މެއި 2020 | އާދީއްތަ 11:32ވިސާގެ މުއްދަތު ހަމަވެފައި ތިބި މީހުން ހިމެނޭ
އިންޑިއާ ރައްޔިތުން ގައުމަށް ފޮނުވުމުގެ މަސައްކަތް ކުރަނީ
އަވައްޓެރި އިންޑިއާ ރައްޔިތުންގެ ތެރެއިން ރާއްޖޭގައި މިވަގުތު ތާށިވެފައި ތިބި މީހުން އަނބުރާ ގައުމަށް ގެންދަން އައި އެ ގައުމުގެ ކަނޑުގެ އަސްކަރިއްޔާގެ ''މަގަރު'' މަނަވަރުން 200އަށް ވުރެ ގިނަ އިންޑިއާ މަސައްކަތްތެރިން ފުރާނެ ކަމަށް އިމިގްރޭޝަނުން ބުނެފިއެވެ.
ރާއްޖެޓީވީ ކޮވީޑް-19ގެ ޚާއްސަ ކަވަރޭޖަށް ދެއްވި އިންޓަވިއުއެއްގައި ހެޑް އޮފް އެއަރޕޯޓް އިމިގްރޭޝަން އަހްމަދު ވަހީދު ވިދާޅުވީ މިމަނަވަރުގައި ފުރާ މަސައްކަތްތެރިންގެ ތެރޭގައި ވިސާ ހަމަވެފައިވާ ތިބި ގާތްގަނޑަކަށް 25 މީހުން ވެސް ހިމެނޭ ކަމަށެވެ. މަގަރު ނަމަކަށް މިކިޔާ މަނަވަރުން 202 މީހުން އިންޑިއާއަށް ފުރާނެ ކަމަށް ވަހީދު ވިދާޅުވިއެވެ.
މި މަނަވަރުގައި އިންޑިއާ އަށް ދާ ރައްޔިތުން ފުރަތަމަ ޖެހޭނީ ކޮޗިންގައި 14 ދުވަހުގެ ކަރަންޓީނު ފުރިހަމަކުރާށެވެ.
ރާއްޖޭގައި ތިބި އިންޑިއާ ރައްޔިތުންގެ ތެރެއިން އެނބުރި ގައުމަށް ދާން ބޭނުން މީހުން ފޮނުވުމަށް ދިވެހި ސަރުކާރާއެކު ކޮމިޝަނުން ގިނަ މަސައްކަތްތަކެއް ދަނީ ކުރަމުންނެވެ. އެގޮތުން އެމަސައްކަތުގެ ފުރަތަމަ ފިޔަވަހީގެ ދަށުން އައި އަސްކަރީ މަނަވަރު ރާއްޖޭގައި ބަނދަރުކުރީ މިމަހުގެ 7ވީ ބުރާސްފަތި ދުވަހުގެ ވަގުތެއްގައެވެ. އަދި ޖުމުލަ 750 މީހުން ރާއްޖެއިން ފުރީ މިމަހުގެ 8 ވީ ހުކުރު ދުވަހުގެ ހަވީރުގެ ވަގުތެއްގައެވެ.
އިންޑިއާއަށް ގެންދާ މީހުންގެ ތެރެއިން އެންމެ ބޮޑަށް އިސްކަމެއް ދެނީ މާބަނޑު މީހުންނާއި، ވަޒީފާ ގެއްލިފައިވާ މީހުންނާއި، ތާށިވެފައި ތިބި ފަތުރުވެރިން ކަމަށް އިންޑިއާގެ ނޫސްތަކުގައި ރިޕޯޓުކޮށްފައިވެއެވެ. އަދި އެ އެންމެންވެސް ޤައުމަށް އެނބުރި ދިއުމަށް ފަހު 14 ދުވަހުގެ ކަރަންޓީން މުއްދަތެއް ފުރިހަމަކުރަން ޖެހެއެވެ.
އިންޑިއާ ސަރުކާރުން ދަނީ ކޮވިޑް-19 އާ ގުޅިގެން އެކި ޤައުމުތަކުގައި ތާށިވެފައި ތިބި އެ ގައުމުގެ ރައްޔިތުން އަނބުރާ ގައުމަށް ގެންދިއުމަށް ޚާއްސަ އޮޕަރޭޝަނެއް ހިންގަމުންނެވެ.
