މެޑްޓެކާ ހަވާލުކޮށްގެން ގެންނަ ވެންޓިލޭޓަރުތަކުގެ ތެރެއިން 18 ވެންޓިލޭޓަރު ގެނެސްފި
10 މެއި 2020 | އާދީއްތަ 10:06މި 18 ވެންޓިލޭޓަރަކީ މިމަހުގެ 1 ވަނަ ދުވަހު ރާއްޖެ ގެނެވޭނެ ކަމަށް ބުނެފައިވާ 18 ވެންޓިލޭޓަރު
މިއަދު ސްރީލަންކަން އެއަރލައިން ކާގޯއިން ގެނައި 18 ވެންޓިލޭޓަރ: މިއީ މިމަހުގެ އެއްވަނަ ދުވަހު ގެންނަން އޮތް ވެންޓިލޭޓަރުތަކެއް-
މެޑްޓެކް މޯލްޑިވްސް އާ ޙަވާލުކޮށްގެން ހެލްތު މިނިސްޓްރީން ގެންނަ ވެންޓިލޭޓަރުތަކުގެ ތެރެއިން 18 ވެންޓިލޭޓަރު ރާއްޖެ ގެނެސްފި އެވެ.
މެޑްޓެކުން ވެންޓިލޭޓަރުތައް ގެނެސްފައިވަނީ ސްރީލަންކަން އެއަރލައިން ކާގޯ ފްލައިޓެއްގައެވެ. ސްރީލަންކަން އެއަރލައިންގެ ރާއްޖޭގެ އެޖެންޓު އިނަރ މޯލްޑިވްސްގެ މެނޭޖިން ޑިރެކްޓަރ މުޙައްމަދު ފިރާޤު އާދިއްތަ ދުވަހު ހާމަ ކުރައްވާފައިވާގޮތުގައި، މެޑިޓެކުގެ 18 އައިސީޔޫ ވެންޓިލޭޓަރާއި ކޮންމެހެން މިވަގުތަށް ބޭނުންވާ މެޑިކަލް ސާމާނު ރާއްޖެ ގެނެސްފައިވާ ކަމަށެވެ.
މެޑްޓެކާއި ޙަވާލުކޮށްފައިވަނީ 50 ވެންޓިލޭޓަރު ގެނައުމަށެވެ. އެއީ 34 މިލިއަން ރުފިޔާއަށެވެ.
މި 18 ވެންޓިލޭޓަރަކީ މިމަހުގެ އެއް ވަނަ ދުވަހު ރާއްޖެ ގެނެވޭނެ ކަމަށް ރައްޔިތުންގެ މަޖިލީހަށް ފޮނުވި ލިޔުމެއްގައި ހެލްތު މިނިސްޓަރު ޢަބްދުﷲ އަމީން ހާމަކުރައްވާފައިވާ 18 ވެންޓިލޭޓަރު ކަމަށް ވެއެވެ. އަދި އެ ކުންފުންޏާ ޙަވާލުކޮށްފައިވާ ވެންޓިލޭޓަރުތަކުގެ ތެރެއިން 10 ވެންޓިލޭޓަރ 15 މެއި 2020ގައި ރާއްޖެ ގެނެވޭނެކަމަށް އަންގާފައިވާކަމަށް މިނިސްޓަރު ރައްޔިތުންގެ މަޖިލީހުގެ މެންބަރަކު ކުރެއްވި ސުވާލުގެ ޖަވާބުގައި ވިދާޅުވެފައިވެއެވެ. އެކުންފުންޏާއި ޙަވާލުކުރެވިފައިވާ ބާކީހުރި ވެންޓިލޭޓަރުތައް ގެނެވޭނެ ތާރީޚެއް ކަށަވަރުވުމުން މިނިސްޓްރީއާއި ހިއްސާކުރާނެކަމަށް އެކުންފުނިން އަންގާފައިވާކަމަށެވެ.
މީގެ އިތުރުން ނާޑް ޕްރައިވެޓް ލިމިޓެޑް އާއި ޙަވާލުކޮށްފައިވާ 20 ވެންޓިލޭޓަރ އެއުފައްދާ ކުންފުނީގެ ފަރާތުން އުފެއްދުން ލަސްވެފައިވުމުގެ ސަބަބުން އިތުރު ގޮތްތަކެއް ހޯދަމުންދާ ކަމަށް 22 އެޕްރީލް 2020 ގައި މިނިސްޓްރީ އަށް އަންގާފައިވާކަމަށް މިނިސްޓްރީން ބުނެފައިވެއެވެ. އަދި އެގްޒެކިއުޓަރ ޖެނެރަލް ޓްރޭޑިންގ އާއި ޙަވާލުކޮށްގެން ގެނައުމަށް ހަމަޖައްސާފައިވާ 75 ވެންޓިލޭޓަރުގެ ތެރެއިން 10 ވެންޓިލޭޓަރ 1 މެއި 2020ގައި ރާއްޖެ ގެނެވޭނެކަމަށް އަންގާފައިވާކަމަށް މިނިސްޓަރ ވިދާޅުވެފައި ވެއެވެ.
މިނިސްޓަރގެ ޖަވާބުގައި ވަނީ ވެންޓިލޭޓަރު އުފައްދާ ޤައުމުތައް 'ލޮކްޑައުން' ކުރެވިފައިވުމާއެކު، ދަތުރުފަތުރުގެ ދަތިތަކެއް ހުރުމުން ވެންޓިލޭޓަރުތައް ސަޕްލައިކުރުމަށް ކުންފުނިތަކުން ކަނޑައަޅާފައިވާ މުހުލަތުގައި ގެނެއުމަށް ބޮޑެތި ދަތިތަކެއް ހުރިކަމަށް ވިދާޅުވެފައެވެ.
މިނިސްޓަރ ވިދާޅުވީ ދެކުންފުންޏަކާއި ޙަވާލުކޮށްފައިވާ ވެންޓިލޭޓަރުތައް ސަޕްލައި ކުރުމުގައި ލަސްވެދާނެކަމަށް ޤަބޫލުކުރެވޭތީ، އިތުރަށް ހޯދަންޖެހޭ ވެންޓިލޭޓަރު ތަކުގެތެރެއިން 75 ވެންޓިލޭޓަރ ހޯދުމަށް ދުބާއީ ކުންފުންޏެއް ކަމަށްވާ އެކްސެކިއުޓަރ ޖެނެރަލް ޓްރޭޑިންގ އާއި 02 އޭޕްރިލް 2020ގައި މި މަސައްކަތް ޙަވާލުކޮށްފައިވާކަމަށެވެ.
