ބިލު ނުދެއްކޭ ކަސްޓަމަރުންނަށް އުރީންދޫން ލުއި ގޮތްތަކެއް!
ބިލު ތައްޔާރުކުރާ ދުވަހުން ފެށިގެން 02 ދުވަސް ފައިސާ ދައްކަން ލިބޭނެ
އުރީދޫ މޯލްޑިވްގެ ހެޑް އޮފީސް
ކޮވިޑް-19 އާއި ގުޅިގެން މާލީ ދަތިތައް ދިމާވެފައިވާ ކަސްޓަމަރުންގެ ބިލު ނުދެއްކޭ ޙާލަތުގައި، ކަސްޓަމަރުންނަށް ލުއިގޮތްތަކެއް އުރީދޫން ހަމަޖައްސައިދީފި އެވެ.
އުރީދޫން ބުނީ ދިވެހި ރައްޔިތުންނަށް ކޮވިޑް-19އާއި ގުޅިގެން ކުރިމަތިވެފައިވާ މާލީ ދަތިކަމުގައި އެހީތެރިވުމަށް ސަރުކާރުން ކުރައްވަމުން ގެންދަވާ މަސައްކަތަށް އެއްބާރުލުން ދިނުމުގެ ގޮތުން، އުރީދޫ މޯލްޑިވްސްއިން ކަސްޓަމަރުންނަށް ބިލު ދައްކަން ލުއިފަސޭހަކޮށްދިނުމަށް ޚާއްޞަ ފުރުޞަތުތަކެއް ފަހިކޮށްދީފައިވާކަމަށެވެ.
އުރީދޫން ބުނީ މާލީ ދަތިތަކާއި ކުރިމަތިލާންޖެހިފައިވާ ކަސްޓަމަރުން ފައިސާ ދެއްކުމުގެ މުއްދަތު އިތުރުކުރުމަށްhttp://ore.do/billsupportމެދުވެރިކޮށް ރިކުއެސްޓްކުރެވޭނެކަމަށެވެ.
އުރީދޫން ހަމަޖައްސައިދިން ލުއި ގޮތްތަކާއި ގުޅިގެން އިކޮނޮމިކް މިނިސްޓަރ ފައްޔާޒް އިސްމާއިލް ވިދާޅުވީ މި ނާޒުކު ދަނޑިވަޅުގައި، އެންމެހާ ފަރާތްތަކަށްވެސް ރަނގަޅު ފެންވަރުގެ ޚިދުމަތްތަކެއް ފޯރުކޮށްދެވޭކަން ޔަޤީންކުރުމަށްޓަކައި، ސަރުކާރުން ޚިދުމަތްދޭ ފަރާތްތަކާއި ގުޅިގެން ވަރަށް ގާތުން މަސައްކަތްކުރަމުން އަންނަ ކަމަށެވެ. އަދި ޑިޖިޓަލް ޚިދުމަތްތަކުގެ ބޭނުން ކުރިޔަށްވުރެ މުހިންމު ވެފައިވާ މި ދުވަސްވަރު، ކަސްޓަމަރުންނަށް ޚިދުމަތް ފޯރުކޮށްދެވޭކަން ޔަޤީންކުރުމަށްޓަކައި އުރީދޫ މޯލްޑިވްސްއިން މުހިންމު ފިޔަވަޅުތައް އެޅީތީ، އެ ކުންފުންޏަށް ޝުކުރު އަދާކުރާކަމަށް މިނިސްޓަރ ފައްޔާޒް ވިދާޅުވިއެވެ.
އުރީދޫގެ ސީއީއޯ ނަޖީބް ޚާން ވިދާޅުވީ ކޮވިޑް-19ގެ ސަބަބުން، މީގެ ކުރިން ކުރިމަތިލާން ޖެހިފައިނުވާ ގޮންޖެހުންތަކާއި ދުނިޔޭގެ އެކިކަންކޮޅުތަކުގައި ކުރިމަތިލާންޖެހިފައިވާކަމަށެވެ. އަދި ކުންފުންޏަށް ދިމާވެފައިވާ އުނދަގޫތަކުން އަރައިގަތުމަށް މަސައްކަތްކުރަމުން އަންނަ މި ދަނޑިވަޅުގައި، އެންމެ އިސްކަމެއްދޭ ކަމަކީ ކަސްޓަމަރުންނަށް ބޭނުންވާ ކަންކަން ފުރިހަމަކޮށްދީ، އެހީތެރިކަން ފޯރުކޮށްދިނުންކަމަށެވެ.
އުރީދޫ މޯލްޑިވްސްއިން، ބުނިގޮތުގައި އެ ކުންފުނިން ދަނީ ކޮވިޑް-19 ބަލިމަޑުކަމާއި ގުޅިގެން މުޖުތަމަޢަށް ކުރިމަތިވަމުންދާ ދަތިތަކާއި މައްސަލަތަކަށް ލުއިފަސޭހަ ގޮތްތަށް ހޯދާދިނުމުގައި ކެނޑިނޭޅި މަސައްކަތްކުރަމުންނެވެ. އަދި ކަސްޓަމަރުންނަށް ޚާއްޞަ ފުރުޞަތުތަކާއި، އިމަރޖެންސީ ރެސްޕޯންސް ޓީމުތަކަށް ހިލޭ ކަނެކްޝަންގެ އިތުރުންވެސް އެހެނިހެން އެހީތައް ފޯރުކޮށްދެމުންކަމަށް އެ ކުންފުނިން ބުންޏެވެ. މީގެ އިތުރުން، އަވަސް އެހީ އަށް ބޭނުންވެފައިވާ ފަރާތްތަކަށް ލުޔެއް ހޯދައިދިނުމަށް އެކި އެކި ދާއިރާތަކުގެ ޕާރޓްނަރުންނާއި ގުޅިގެން ތަފާތު މަސައްކަތްތަކެއްވެސް ކުރަމުން އަންނަކަމަށްވެސް އެކުންފުނިން ބުނެފައިވެއެވެ.
