ނޮވެލް ކޮރޯނާވައިރަސް (ކޮވިޑް-19) އާ ގުޅިގެން މެދުކަނޑާލާފައިވާ ދެކުނު ކޮރެއާގެ ކޭ-ލީގުގެ ކުޅުން ހުކުރު ދުވަހު އަލުން ފަށައިފިއެވެ.

ލީގު އަލުން ފެށީ، ސަޕޯޓަރުން ދަނޑަށް ނުވައްދައެވެ. ސަޕޯޓަރުންގެ ގޮނޑިތައް ހުސްކޮށް ހުރި ނަމަވެސް، ގޮނޑިބަރީގައި "ވަރަށް އަވަހަށް ބައްދަލުކުރާނަން - ރައްކާތެރިވެ ތިބޭ" މި ފަދައިން ވަނީ މެސެޖެއް ލިޔެފައެވެ. ސަޕޯޓަރުން ދަނޑުގައި ނެތް ނަމަވެސް، ސަޕޯޓަރުންގެ އަޑު ރިކޯޑުކޮށް ދަނޑުގައި ވަނީ އިއްވާފައެވެ.

މާރޗު މަހުގެ ތެރޭގައި މެދުކަނޑާލި ދެކުނު ކޮރެއާ ލީގު އަލުން ފެށިއިރު، މިއީ އޭޝިއާއިން މެދުކަނޑާލި ލީގުތަކުގެ ތެރެއިން ކުޅުން އަލުން ފެށި ފުރަތަމަ ލީގެވެ.

ލީގުގެ ކުޅުން އަލުން ފަށާފައިވާނީ ގަވާއިދުތަކެއް ކަނޑައެޅުމަށްފަހު އެވެ. އެގޮތުން މެޗު ފެށުމުގެ ކުރިން ދެ ޓީމުގެ ކުޅުންތެރިން ސަލާން ކުރުން މަނާކޮށްފައިވާއިރު، މެޗު ކުރިއަށް ދާއިރު، ހުރިހާ އޮފިޝަލުންނާއި ބެންޗުގައި ތިބޭ ކުޅުންތެރިން ތިބެންޖެހެނީ މޫނު މަތީގައި މާސްކް އަޅައި ރައްކާތެރިވެގެންނެވެ.

ލީގުގެ ކުޅުން ފެށުމުގެ ކުރިން މީގެ ކުރިން ވަނީ ދެކުނު ކޮރެއާ ލީގުގެ ހުރިހާ ކުޅުންތެރިންނާއި ކްލަބުތަކުގެ މުވައްޒަފުން ކޮވިޑް-19 އަށް ޓެސްޓު ކޮށްފައެވެ. އެގޮތުން ޖުމުލަ 1،100 މީހަކު ވަނީ ކޮވިޑް-19 އަށް ޓެސްޓުކޮށް ނެގެޓިވް ވެފައެވެ.

ކޮވިޑް-19 ގެ އަސަރު ދެކުނު ކޮރެއާ އަށްވެސް ކުރިއިރު، އެ ގައުމުން މިހާތަނަށް 10،800ށްވުރެ ގިނަ މީހުން ވަނީ މި ވައިރަހަށް ޕޮޒިޓިވްވެފައެވެ. އަދި ކޮވިޑް-19 ޖެހިގެން އެ ގައުމުން 256 މީހަކު ވަނީ މަރުވެފައެވެ.