ޗައިނާއިން އިއްޔެ ކޮވިޑް-19 ޖެހުނީ އެންމެ މީހަކަށް

ޗައިނާގައި ހުކުރު ދުވަހު ކޮވިޑް-19 އަށް ޕޮޒިޓިވް ވެފައިވަނީ އެންމެ މީހެއްކަމަށް އެގައުމުގެ ނޭޝަނަލް ހެލްތު އޮތޯރިޓީން ބުނެފިއެވެ.

އޭގެކުރީ ދުވަހުވެސް އެގައުމުގައި ވައިރަސް ޖެހިގެން ރިޕޯޓްކޮށްފައިވަނީ އެންމެ މީހެކެވެ. ހުކުރު ދުވަހު ވައިރަސް ޖެހިގެން ރިޕޯޓް ކޮށްފައިވަނީ އެގައުމަށް އެތެރެވި މީހެއްގެ ފުށުންނެވެ. އެހެންނަމަވެސް ހުކުރު ދުވަހު ވައިރަސް ހަށިގަނޑުގައި ހުރި ކަމުގެ އަލާމާތެއް ނުފެނި 15 މީހަކު ވަނީ ކޮވިޑް-19 އަށް ޕޮޒިޓިވްވެފައެވެ. އޭގެކުރީ ދުވަހު މިގޮތަށް 16 މީހަކު ވަނީ ފެނިފަ އެވެ.

ކޮވިޑް-19 އެންމެ ފުރަތަމަ ފެނުނު ގައުމަކީ ޗައިނާއަށް ވާއިރު އެގައުމުގައި މިހާރު ވަނީ ވައިރަސް ފެތުރުން ކޮންޓްރޯލްކުރެވިފަ އެވެ. އެހެންނަމަވެސް ވައިރަސް ހަށިގަނޑުގައި ހުރި ކަމުގެ އަލާމާތެއް ނުފެނި ޕޮޒިޓިވްވާ މީހުން ޗައިނާގައި އަދިވެސް އަންނަނީ ފެންނަމުންނެވެ. އެގޮތުން އެފަދަ ދެހާހަށްވުރެ ގިނަ މީހުން މިހާރު ޗައިނާގައި އުޅޭނެކަމަށް ރިޕޯޓްތައް ބުނެއެވެ.

ޗައިނާގައި 82،887 މީހުންނަށް ވައިރަސް ޖެހިފައިވާއިރު ވައިރަސް ޖެހިގެން މަރުވެފައިވަނީ 4633 މީހުންނެވެ.