އާދީއްތަ ދުވަހުން ފެށިގެން ބިދޭސީންނާއި ގުޅޭ އޮންލައިން ބައެއް ހިދުމަތްތައް އެކްސްޕެޓް އޮންލައިން ސިސްޓަމް މެދުވެރިކޮށް ދޭން ފަށާނެކަމަށް އިކޮނޮމިކް މިނިސްޓްރީން ބުނެފިއެވެ.
އިކޮނޮމިކް މިނިސްޓްރީން ބުނީ ސަރުކާރު ބަންދު ކޮށްފައިވާ މުއްދަތު އިތުރުކޮށްފައިވާތީ، މިނިސްޓްރީން އެކްސްޕެޓް އޮންލައިން ސިސްޓަމް މެދުވެރިކޮށް ދެމުންގެންދާ ޚިދުމަތްތައް 10 މެއި (މާދަމާ) އިން ފެށިގެން ހުކުރު އަދި ހޮނިހިރު ދުވަސް ފިޔަވައި ކޮންމެ ދުވަހެއްގެ ހެނދުނު 10:00 ން މެންދުރު 12:00 ށް އެކްސްޕެޓް އޮންލައިން ސިސްޓަމް މެދުވެރިކޮށް ބައެއް ހިދުމަތްތަކަށް އޮންލައިންކޮސް އެޕްލިކޭޝަން ހުށަހެޅުމުގެ އިންތިޒާމް ހަމަޖެހިފައިވާ ކަމަށެވެ.
އެކްސްޕެޓް އޮންލައިން ހިދުމަތްތަކުގެ ތެރޭގައި؛
- ކޯޓާގެ މުއްދަތު އިތުރުކުރުން
- އެމްޕްލޯއިމަންޓް އެޕްރޫވަލްގެ މުއްދަތު އިތުރު ކުރުން
- ވަޒީފާ ދޭފަރާތް ބަދަލުކުރުން
- މަސައްކަތްކުރާ ވާރކް ސައިޓް ބަދަލުކުރުން
- އޮކިއުޕޭޝަން ޗޭންޖް ކުރުން
- އެމްޕްލޯއިމަންޓް އެޕްރޫވަލް ކެންސަލް ކުރުން
- ޑިޕޮސިޓް ރިފަންޑް ކުރުން
މީގެ އިތުރުން، ހުކުރު އަދި ހޮނިހިރު ދުވަސް ފިޔަވައި ކޮންމެ ދުވަހެއްގެ ހެނދުނު 10:00 ން މެންދުރު 14:00 ށް 9199151 ނަންބަރު ފޯނުން އެމްޕްލޯއިމަންޓް އެޕްރޫވަލް އާ ގުޅުންހުރި މައުލޫމާތު ސާފުކުރެވޭނެ ކަމަށް ވެސް އިކޮނޮމިކް މިނިސްޓްރީން ބުނެއެވެ.
ސަރުކާރު ބަންދުކޮށްފައިވާ މުއްދަތުގައި އިކޮނޮމިކް މިނިސްޓްރީން ވިޔަފާރިތަކަށް ފޯރުކޮށްދޭ ބައެއް ޚިދުމަތްތައް 10 މެއި (މާދަމާ) އިން ފެށިގެން، ހުކުރު އަދި ހޮނިހިރު ދުވަސް ފިޔަވައި ކޮންމެ ދުވަހެއްގެ ހެނދުނު 10:00 ން މެންދުރުފަހު 2:00 ށް ފޯރުކޮށްދިނުމަށް ވަނީ ނިންމާފައެވެ.
