މުމްބާއީ ފުލުހުންނަށް ރިތިކް ސެނިޓާއިޒަރ ހަދިޔާކޮށްފި

ކޮވިޑް-19 އާ ގުޅިގެން މުމްބާއީގައި މަސައްކަތްކުރާ ފުލުުސް އޮފިސަރުންނަށް ބޮލީވުޑް ތަރި ރިތިކް ރޯޝަން ސެނިޓައިޒަރ ހަދިޔާކޮށްފިއެވެ.

އެކަމަށްޓަކައި މުމްބާއީ ޕޮލިހުން ވަނީ ރިތިކް އަށް ޝުކުރުއަދާކޮށްފައެވެ. މުމްބާއީ ޕޮލިހުން ކޮށްފައިވާ ޓްވީޓްގައި ބުނެފައިވަނީ ފްރޮންޓް ލައިންގައި މަސައްކަތްކުރާ ފުލުހުންގެ ސަލާމަތާއި ރައްކާތެރިކަމަށްޓަކައި ވެދިން އެހީތެރިކަމަށް ޝުކުރު އަދާކުރާ ކަމަށެވެ.

ރިތިކް ގެންދަނީ ފޮރޮންޓްލައިންގައި މަސައްކަތް ކުރާ ފަރާތްތަކަށް އެކި ގޮތްގޮތުަން އެހީތެރިކަން ފޯރުކޮށްދެމުންނެވެ. މީގެ ކުރިން ވެސް ރިތިކް ވަނީ ބިރިހަންމުމްބާއީ މުނިސިޕަލް ކޯޕަރޭޝަންގައި މަސައްކަތް ކުރާ ފަރާތްތަކަށް މާސްކް ހަދިޔާ ކޮށްފައެވެ.

އަދި ކޮވިޑް ރެސްޕޮންސް ފަންޑަށް އެހީތެރިވުމުގެ ގޮތުން ދާދިފަހުން ބޭއްވި "އައިފޯ އިންޑިއާ" ކޮންސެޓްގައި ވެސް ރިތިކް ބައިވެރިވެފައި ވެއެެވެ.

އިންޑިއާގެ މަޝްހޫރު ގިނަ ފަންނާނުންނާއި، ހޮލީވުޑްގެ ފަންނާނުންވެސް ބައިވެރިވި މި ކޮންސެޓުން ވަނީ 52 ކްރޯޑް ރުޕީސް ހޯދާފައެވެ.