ފުރަބަންދަށް ދޫދިނަސް ފްރާންސްގެ ބޯޑަރުތައް ޖޫން 15އާ ހަމަޔަށް ބަންދު

ފުރަބަންދުގެ ޙާލަތާއި ގުޅިގެން ފްރާންސް ސަރުކާރުން އަޅާފައިވާ ފިޔަވަޅުތައް މެއި މަހުގެ 11 ވަނަ ދުވަހުން ފެށިގެން ލުއިތަކެއް ދޭންފެށިނަމަވެސް އެޤައުމުގެ ބޯޑަރުތައް އަދި ހުޅުވާނުލާނެކަމަށް އެޤައުމުގެ އިންޓީރިއަރ މިނިސްޓަރ ކްރިސްޓޮފް ކެސްޓޭނަރ ވިދާޅުވެއްޖެއެވެ.

ނޫސްވެރިންގެ ބައްދަލުވުމުގައި ވާހަކަ ދައްކަވަމުން ކްރިސްޓޮފް ވިދާޅުވީ ކޮވިޑް-19 އާ ގުޅިގެން އެންމެ ފުރަތަމަ އަޅާ ފިޔަވަޅަކީ ބޯޑަރުތައް ބަންދުކުރުން ކަމަށާއި އެހެންކަމުން ބޯޑަރުތައް ހުޅުވާލެވޭނީ އަދި ފަހުންކަމަށެވެ. ރައްކާތެރިކަމުގެ ގޮތުން އަޅަންޖެހޭ އެންމު މުހިންމު ފިޔަވަޅު ދަމަހައްޓަންޖެހޭ ކަމަށާއި އެކަން ބަދަލުނުކުރާނެކަމަށް ކްރިސްޓޮފް ވިދާޅުވިއެވެ. އެގޮތުން ބޯޑަރުތައް ޖޫން މަހުގެ 15 އާ ހަމައަށް ބަންދުކޮށްފައި ހުންނާނެކަމަށް ކްރިސްޓޮފް ވިދާޅުވިއެވެ.

ފްރާންސަކީ ޔޫރަޕުގެ ޤައުމުތަކުގެ ތެރެއިން ކޮވިޑް-19 ގެ އަސަރު އެންމެ ބޮޑަށް ކޮށްފައިވާ އެއް ޤައުމެވެ. އެ ޤައުމުގައި އިޢުލާނުކޮށްފައިވާ ފުރަބަންދަށް މަޑު މަޑުން ދޫދޭން ވަނީ ފަށާފައެވެ. އޭގެ ތެރޭގައި މި މަހު 11 އިން ފެށިގެން ޕްރައިމަރީ ސްކޫލްތައް ހުޅުވުމާއި، ބައެއް ފިހާރަތަކާއި އޮފީސްތައް އަލުން ހުޅުވާލުން ހިމެނެއެވެ. ނަމަވެސް ބޭރުގައި އުޅޭއިރު އަދި ވަކިން ޚާއްޞަކޮށް ބަހުގެ ޚިދުމަތް ހޯދާއިރު ފޭސް މާސްކް އަޅަން ވަނީ މަޖުބޫރު ކޮށްފައެވެ.

ފްރާންސްގައި މިހާތަނަށް 174,791 ވައިރަސް ޖެހިފައިވާއިރު 25,987 މީހުން ވަނީ މަރުވެފަ އެވެ.