ރަށްރަށަށް އަވަސް އަރުވާލައިގެން ދަތުރުކުރުން: އާޚިރުގައި ނިކުންނަ ނަތީޖާ މާ ގޯސްވާނެ
8 މެއި 2020 | ހުކުރު 03:58އެކި ސަބަބުތަކާހުރެ އަތޮޅުތެރޭގެ ވަރަށް ގިނަ ފަރާތްތައް މާލޭގައި ތާށިވެފަ އެބަތިބި
މާލޭގައި ތާށިވެފައި މީހުން ރަށަށް ގެންދިއުމުގައި މޯލްޑިވިއަންގެ ހިއްސާ ވަރަށް ބޮޑު
ރަށަރަށަށް އަވަސް އަރުވާލައިގެން ދަތުރުކުމުން ނިކުންނަ ނަތީޖާ މާ ގޯސްވާނެކަމަށް ނޭޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ)ގެ ތަރުޖަމާނު މަބްރޫކް އަޒީޒް ވިދާޅުވެއްޖެއެވެ.
މާލެސިޓީ ފުރަބަންދުކޮށް، ކޮމިއުނިޓީ ސްޕްރެޑްއެއް އޮތްކަމަށް ޞިއްޙީ މާހިރުން ބުނެފައިވާ ދަނޑިވަޅެއްގައި ބުރާސްފަތި ދުވަހުގެ ރޭ އެންއީއޯސީގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ކޮވިޑް-19 ޓާސްކްފޯސްގެ ތަރުޖަމާނު މަބްރޫކް ޢަޒީޒް ވިދާޅުވީ އަވަސް އަރުވާލައިގެން ރަށްރަށަށް ދަތުރުކުރުމުން ނިކުންނަ ނަތީޖާ ގޯސްވެދާނެކަމަށެވެ. މަބްރޫކް ވިދާޅުވީ ކޮމިއުނިޓީ ސްޕްރެޑެއް އޮތް ތަނަކުން ރަށްރަށަށް ފުރާާއިރު ބަލަންޖެހޭ ގިނަ ކަންތައްތަކެއް އެބަހުރިކަމަށާއި ރަށްރަށުގައި ކަރަންޓީން ކުރުމަށްފަހު އެފަރާތްތައް މޮނިޓަރ ކުރެވޭނެ ރަނގަޅު އިންތިޒާމްތަކެއް ހުރިތޯ ބަލަންޖެހޭކަމަށެވެ.
މަބްރޫކް ވިދާޅުވީ މާލެއިން ގިނަ ބަޔަކު ފުރާއިރު، ހަމަހަމަކަމާއި އެކު މިކަން ކުރެވޭނެ އިންތިޒާމުތަކެއް ހަމަޖައްސަން ޖެހޭކަމަށެވެ. އެގޮތުން އެންމެ ގިނައިން މީހުން ގެންދެވޭނެ ޢަދަދަކާ މީހުން ދިއުމުގެ ސަބަބުން ރަށަށް އޮތީ ކިހާވަރެއްގެ ނުރައްކަލެއްތޯ ބަލަންޖެހޭކަމަށެވެ. މަބްރޫކް ވިދާޅުވީ ރަށްރަށް ދިއުމުގެ އިންތިޒާމުތައް ހަމަޖައްސާއިރު ލަސްތަކެއް އުޅޭނެކަމަށާއި އެންމެ އިސްކަމެއް ދޭ އެއް ކަމަކީ ރާއްޖޭގައި ބަލި ފެތުރޭ މިންވަރު ކޮންޓްރޯލްކުރުންކަމަށެވެ. އަދި އެއްފަހާރާ އެއްވަގުތެއްގައި މީހުން ބަދަލުކުރުމަށް މަސައްކަތް ކުރުމަަކީ އޭގެ ސަބަބުން މުޅި ރާއްޖެއަށް މި ބަލި ފެތުރުމުގެ ނުރައްކާ ބޮޑުވެދާނެ ކަމަކަށް ވާތީ އެންއީއޯސީން މޮނިޓަރ ކުރެވޭ މިންވަރަށް މީހުން ގެންދިއުމުގެ މަސައްކަތް ކުރަމުންދާކަމަށެވެ.
މަބްރޫކް ވިދާޅުވީ މިހާރު އެންމެ އިސްކަމެއް ދެނީ ވަގުތީގޮތުން މާލެ އައިސް ތިބި މީހުންނަށްކަމަށެވެ. އަދި އޭގެތެރެއިންވެސް އެންމެ މުހިންމީ ބޭސްފަރުވާއަށް އައިސް ތިބި ފަރާތްތަކަށް އަނބުރާ ރަށަށް ފޮނުވާލުންކަމަށެވެ. އަދި އެކިއެކި ބޭނުމަށް މާލެއަށް އައިސް ހުންނާނެ ތަނެއް ނެތި ތިބި މީހުންނާއި ރިސޯޓުތަކުން އައިސް ރަށަށް ނުދެވި ތާށިވެފައިތިބި މީހުންނަށްވެސް އިސްކަންދެއްވާނެ ކަމަށެވެ.
މަބްރޫކް މިހެން ވިދާޅުވެފައިވާއިރު، ރާއްޖެއިން ކޮވިޑް-19 ގެ ކޮމިއުނިޓީ ސްޕްރެޑެއް ފެނިފައިވާ މި ޙާލަތުގައި މާލެއިން ބޭރަށް ދިއުމަކީ ކޮށްގެން ވާނެ ކަމެއް ނޫންކަމަށް ހެލްތު މިނިސްޓަރ ޢާބްދުﷲ އަމީން ވަނީ މީގެކުރިން ވިދާޅުވެފައެވެ.
