ބަލި ކޮންޓްރޯލް ކުރެވޭނީ ސާރޖް ކޮންޓްރޯލް ކުރެވިގެން، ނައްތާލެވޭނެ ދުވަހެއް ނޭނގޭ: ޑރ ޝީނާ
ސަރޖް ކޮންޓްރޯލް ކުރުމަށް ގިނަ މަސައްކަތްތަކެއް ކުރަންޖެހޭ: ޑރ. ޝީނާ
ޑރ ޝީނާ މޫސާ، އިން
ބަލި ކޮންޓްރޯލް ކުރެވޭނީ ސާރޖް ކޮންޓްރޯލް ކުރެވިގެންކަމަށާއި، ބަލި ނައްތާލެވޭނެ ދުވަހެއް ނޭނގޭކަމަށް ޑރ ޝީނާ މޫސާ ވިދާޅުވެއްޖެ އެވެ.
އެންމެ ފަހުގެ އަންދާޒާތަކަށް ބަލާއިރު، ކުރިއަށް އޮތް ދެތިން ހަފުތާގެ ތެރޭގައި ސަރޖެއް (ފެންނަ ކޭސްތައް ކުއްލިއަކަށް އިތުރުވުން) އަންނާނެ އެވެ. މިއާއެކު އެއް ދުވަހުގެ ތެރޭގައި 1523 އިންފެކްޝަންސް އުޅޭނެ ކަމަށް ޑރ. ޝީނާ ވަނީ ވިދާޅުވެފަ އެވެ. މި ދުވަސް އަންނާނެ ކަމަށް ލަފާކޮށްފައިވަނީ، މި މަހުގެ ފަހުކޮޅުގަ އެވެ.
ލޮކްޑައުން ކުރުމާއެކު ޓްރޫ ޕީކް ނުފެންނާނެ ކަމުގައި ޑރ. ޝީނާ އަދި ޑރ. އިބްރާހިމް އަފްޒަލް ވެސް ވަނީ ވިދާޅުވެފަ އެވެ. އަދި މާލެ ސިޓީ ފުރަބަންދު ކުރުމާއި ގުޅިގެން ޕީކް ވަރަށް ބޮޑުތަނުން ދަށް ކުރެވިއްޖެ ކަމަށް ޑރ. ޝީނާ ފާހަގަކުރެއްވި އެވެ. ނަމަވެސް، މިހާރުގެ ޓްރާންސްމިޝަން ރޭޓަށް ބަލާއިރު މެއި މަހުގެ 31 ގައި ސަރޖެއް އަންނާނެ ކަމަށް ވަނީ އަންދާޒާކޮށްފަ އެވެ.
ފުރަބަންދު ކުރުމާއި ގުޅިގެން ފެންނަ ކޭސްތަކުގެ އަދަދު މަދުވީ ނަމަވެސް، ކޭސް ލޯޑަށް ބަލާފައި ފެންނަ ކޭސްތަކުގެ އަދަދު މަދު ނޫންކަމަށް ޑރ. ޝީނާ ވިދާޅުވި އެވެ.
ކުއްލިއަކަށް ފެންނަ ކޭސްތަކުގެ އަދަދު އިތުރުވާން ދިމާވާ މައިގަނޑު ސަބަބުތަކުގެ ތެރޭގައި އެއްތަނެއްގައި ބައިވަރު މީހުން އުޅޭ ތަންތަނުން (ކޮމިއުނަލް ލިވިންގ) ފެންނަ ކޭސްތަކުގެ އަދަދު އިތުރުވުން ހިމެނެ އެވެ. އަދި މި ހާލަތުގައި ދިރިއުޅެނީ ބިދޭސީން ނޫން ކަމަށާއި، ދިވެހިން ވެސް މި ހާލަތުގައި ދިރިއުޅޭކަން ޑރ. ޝީނާ ފާހަގަކުރެއްވި އެވެ.
ބަލި ފެތުރޭ މިންވަރު ކޮންޓްރޯލް ކުރެވޭނީ ސަރޖް ކޮންޓްރޯލް ކޮށްގެން ކަން ފާހަގަކުރައްވާ، ޑރ. ޝީނާ ވަނީ މިހާރަށް ވުރެ ވެސް ބޮޑަށް ރައްކާތެރިވާން ގޮވާލާފަ އެވެ. އެގޮތުން އަތް ދޮވުމަށާއި އިޖުތިމާއީ ގައިދުރުކަން ބެހެއްޓުމަށް ހާއްސަ ސަމާލުކަމެއް ދިނުމަށް އިލްތިމާސްކުރެއްވި އެވެ.
