ޑރ ޝީނާގެ އަންދާޒާ: މި މަހުގެ 31 ވަނަ ދުވަހު ޕީކަށް ދާނެ، 1600 ކޭސް ފެންނާނެ
7 މެއި 2020 | ބުރާސްފަތި 17:46އެއް ދުވަހުގެ މަތިން 36 މީހަކަށް ހޮސްޕިޓަލުގައި ފަރުވާދޭންޖެހޭނެ ކަމަށް ބެލެވޭ
ޑރ ޝީނާ މޫސާ
މި ހިނގާ މެއި މަހުގެ 31 ވަނަ ދުވަހު ޕީކަށް ދާނެކަމަށް ބެލެވޭކަމަށާއި އެ ދުވަހު އެކަނި 1600 ކޭސް ފެންނާނެކަމަށް އަންދާޒާކުރެވޭކަމަށް ޑރ. ޝީނާ މޫސާ ވިދާޅުވެއްޖެ އެވެ.
ބުރާސްފަތި ދުވަހުގެރޭ އެންއީއޯސީގައި ބޭއްވި ނޫސްވެރިންގެ ބައްދަލުވުމުގައި ޑރ. ޝީނާ ވަނީ ފާއިތުވެދިޔަ ދެ ހަފުތާގެ ތެރޭގައި އެއްކުރެވިފައިވާ މައުލޫމާތުގެ މައްޗަށް ބިނާކޮށް، އަލަށް ތައްޔާރުކޮށްފައިވާ އިންފެކްޝަން މޮޑެލް ހިއްސާކޮށްފަ އެވެ. އެގޮތުން، ފުރަބަންދުކޮށްފައި އޮތުމާއި ގުޅިގެން ޓްރޫ ޕީކަކަށް ނުދިޔަ ކަމުގައިވީ ނަމަވެސް، ކުރިޔަށް އޮތް ދެ ހަފުތާގެ ތެރޭގައި ސަރޖެއް (ކުއްލިއަކަށް ފެންނަ ކޭސްތަކުގެ އަދަދު އިތުރުވުމެއް) އަންނާނެ ކަމަށް އަންދާޒާކޮށްފައި ވެއެވެ.
ޕްރޮޖެކްޓަޑް އިންފެކްޝަންސް (ވައިރަސްއަށް ޕޮޒިޓިވްވާ މީހުން ފެންނަ އަދަދުގެ އަންދާޒާ) ހިއްސާކުރައްވަމުން ޑރ. ޝީނާ ވިދާޅުވީ، އެ ދުވަހު އެ އަދަދަށް އިންފެކްޝަންސް މުޖުމަތަމައުގެ ތެރޭގައި އުޅުނު ކަމުގައިވީ ނަމަވެސް، އޭގެ ތެރެއިން ދެނެގަނެވޭނީ މަދު އަދަދެއްގެ ކޭސްތަކެއް ކަމަށެވެ.
ޓެސްޓިންގ ކެޕޭސިޓީ މި ވަގުތު ހުރިގޮތުން، މުޖުތަމައުގެ ތެރޭގައި ބަލިފެތުރިފައިވާ މިންވަރު ދެނެގަންނަން އުނދަގޫވާނެ ކަމަށް ޑރ. ޝީނާ ވިދާޅުވި އެވެ. އަދި އެންމެ ޕީކް ވެގެން އަންނަ ދުވަހު ދެނެގަނެވޭނީ މީގެ ތެރެއިން މަދު އަދަދެއް ކަމަށް ވިދާޅުވި އެވެ.
