ކޮވިޑް-19 ގެ ރިލީފް ފަންޑުގެ އެހީއަށް އެދި، ވިޔަފާރި ހިންގާ 764 ފަރާތަކުންނާއި އަމިއްލަ މަސައްކަތްކުރާ 403 ފަރާތަކާއެކު ޖުމުލަ 1167 ފޯމު ހުށަހަޅާފައިވާ އިކޮނޮމިކް މިނިސްޓަރ ފައްޔާޒު އިސްމާއީލް ވިދާޅުވެއްޖެ އެވެ.
ނޭޝަނަލް އިމަރޖެންސީ އޮޕަރޭޝަން ސެންޓަރުގައި ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި އިކޮނޮމިކް މިނިސްޓް ފައްޔާޒު ވިދާޅުވީ، ކޮވިޑް-19 ރޯގާ މާލެ ޞަރަަޙައްދުގައި ފެތުރެން ފެށުމާއެކު މާލެ ޞަރަޙައްދު ފުރަބަންދުކުރުމާއި ގުޅިގެން އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން (އެސްޑީއެފްސީ) ހުށަހެޅިފައިވާ އެ އެފޯމުތައް ޕްރޮސެސްކުރަން އުނގަދޫތަކާ ކުރިމަތިވި ކަމަށެވެ. އައި އެސްޑީއެފްސީގެ ބައެއް މުއައްޒަފުން ކަރަންޓީނަށް ނުވަތަ އަމިއްލައަށް އައިސޮލޭޝަނަށް ދާންޖެހުން ފަދަ ކަންކަން ވެސް ކުރިމަތިވި ކަމަށެވެ.
މީގެއިތުރުން ފައްޔާޒު ވިދާޅުވީ، މާލެ ޞަރަޙައްދު ފުރަބަންދުކޮށްފައިވާތީ، ފޯމުތައް ހުށަހަޅާފައިވާ ފަރާތްތަކުގެ އިތުރު މަޢުލޫމާތު ހޯދަން، ނުވަތަ މަޢުލޫމާތު ކަށަވަރުކުރުމަށް، ވަރަށް ބޮޑު ދަތިކަމެއް ދިމާވި ކަމަށެވެ. ނަމަވެސް ފައްޔާޒު ވިދާޅުވީ، އެސްޑީއެފްސީއިން ކަރަންޓީނަށް ނުވަތަ އަމިއްލަ އައިސޮލޭޝަނަށް ދިޔަ ފަރާތްތައް މަސައްކަތަށް ނިކުމެފައިވާތީ، މިހާރު ފޯމުތައް ޕްރޮސެސް ކުރުމުގެ މަސައްކަތް ތަންކޮޅެއް އަވަސްމިނެއްގައި ކުރިއަށްދާ ކަމަށެވެ.
ފައްޔާޒު ވިދާޅުވީ، ރިލީފް ފަންޑުގެ ލޯނަށް އެދިފައިވާ 1167 ފަރާތުގެ ތެރެއިން، 38 ފަރާތަކަށް މިއަދާ ހަމައަށް ލޯނު ދޫކޮށްފައިވާކަމަށެވެ.
މިނިސްޓަރު ފައްޔާޒު ވިދާޅުވީ، މިހާރު މަސައްކަތް ކުރަމުންދަނީ ކުރިއަށް އޮތް ހަފުތާގެ ތެރޭގައި ލޯނަށް އެދިފައިވާ ފަރާތްތަކުގެ ތެރެއިން %90 މަސައްކަތް ނިންމުމަށް ކަމަށެވެ. އަދި މިހާތަނަށް އެދިފައިވާ ލޯނުތަކުގެ ތެރެއިން 53 ލޯނެއް ރިޖެކްޓްކޮށްފައިވާކަމަށާ، އަދި މިހާތަނަށް އެޕްރޫވް ކުރެވިފައިވަނީ 203 ލޯނެއްކަމަށްވެސް މިނިސްޓަރ ވިދާޅުވިއެވެ.
މިނިސްޓަރ ފައްޔާޒު ވިދާޅުވީ، މިކަންކަން ކުރުމުގައި ސަރުކާރުން ޢަމާޒުކޮށްފައިވަނީ ޢާމްދަނީ ހުއްޓި ގޮތްހުސްވެފައިވާ މީހުންނަށް ގޮތްތަކެއް ހޯދައި ދިނުމަށް ކަމަށެވެ. އަދި ލޯނުތައް ދޫކުުރުމުގައިވެސް އެންމެބޮޑު އިސްކަމެއްދެނީ މިކަންކަމަށް ބެލުމަށްފަހު ކަމަށާއި އަދި އެންމެ ބޮޑަށް މިކަމުގައި ބަލަމުންދާނީ ކޮވިޑް-19އާ ގުޅިގެން، އޭގެ އަސަރު އެންމެބޮޑަށް ކޮށްފައިވާ ފަރާތްތަަކައް ކަމަށްވެސް ފައްޔާޒު ވިދާޅުވިއެވެ.
