ރާއްޖޭގައި ތިބި އިންޑިއާ މީހުން ގެންދަން އައި މަނަވަރު ބަނދަރުކޮށްފި
7 މެއި 2020 | ބުރާސްފަތި 08:07މިއީ ފުރަތަމަ ފިޔަވަހީގެ ދަށުން އައި މަނަވަރެއް
ރާއްޖޭގައި ބަނދަރުކޮށްފައި އޮތް އިންޑިއާގެ އަސްކަރީ މަނަވަރު
ކޮވިޑް-19އާ ގުޅިގެން ރާއްޖޭގައި ތާށިވެފައި ތިބި އިންޑިއާގެ ރައްޔިތުންގެ ތެރެއިން ޤައުމަށް ދާން ބޭނުންވާ މީހުން ގެންދިއުމަށް އައި އެޤައުމުގެ އަސްކަރިއްޔާގެ މަނަވަރު ރާއްޖޭގައި ބަނދަރުކޮށްފިއެވެ.
މިމަނަވަރު ބަނދަރުކުރީ ބުރާސްފަތި ދުވަހުގެ ވަގުތެއްގައެވެ.
ރާއްޖޭގައި ހުންނަ އިންޑިއާ އެމްބަސީން ބުނީ މިއީ ރާއްޖޭގައި ތިބި އިންޑިއާ ރައްޔިތުންގެ ތެރެއިން އެނބުރި ޤައުމަށް ދާން ބޭނުން މީހުން ފޮނުވުމަށް ދިވެހި ސަރުކާރާއެކު ގިނަ މަސައްކަތްތަކެއް ކުރެވޭ ކަމަށެވެ. އެމަސައްކަތުގެ ފުރަތަމަ ފިޔަވަހީގެ ދަށުން އައި އަސްކަރީ މަނަވަރެއް ކަމަށް އެމްބަސީން ބުނެއެވެ.
ރާއްޖޭގައި ތިބި އިންޑިއާގެ ގާތްގަނޑަކަށް 200 އެއްހާ ރައްޔިތުން މިމަނަވަރުގައި ޤައުމަށް ދާނެއެވެ. އިންޑިއާއަށް ގެންދާ މީހުންގެ ތެރެއިން އެންމެ ބޮޑަށް އިސްކަމެއް ދެނީ މާބަނޑު މީހުންނާއި، ވަޒީފާ ގެއްލިފައިވާ މީހުންނާއި، ތާށިވެފައި ތިބި ފަތުރުވެރިން ކަމަށް އިންޑިއާގެ ނޫސްތަކުގައި ރިޕޯޓުކޮށްފައިވެއެވެ.
މާލެއިން އިންޑިއާގެ ކެރެލާ ސްޓޭޓްގެ ކޮޗިން އަށްދާއިރު، އެންމެން 14 ދުވަހުގެ ކަރަންޓީން މުއްދަތު ފުރިހަމަކުރަން ޖެހެއެވެ.
އިންޑިއާގެ ރައްޔިތުން ގެންދިއުމުގެ މަސައްކަތް ފަށާފައިވާއިރު، އިންޑިއާއިން ދަނީ ރާއްޖެއަށް ކޮވިޑް-19އާ ގުޅިގެން ވަރަށް ބޮޑަށް އެހީތެރިކަން ފޯރުކޮށްދެމުންނެވެ. އިންޑިއާގައި ތިބި ބައެއް ދިވެހިން ރާއްޖެއަށް ގެނައުމަށް އެހީތެރިވެދީފައިވާއިރު، އިންޑިއާގެ 9 ސިޓީއެއްގައި ތިބި 200 ދިވެހިން އަންނަ ހަފުތާގައި ރާއްޖެއަށް ގެންނާނެ ކަމަށް ފޮރިން މިނިސްޓްރީން ބުނެފައިވެއެވެ.
