ދަނޑުވެރިކަމުގެ ބޭނުމަށް އެތެރެކުރެވޭ ބާވަތްތައް އިތުރުކުރުމަށް މުދާ އެތެރެކުރާ ފަރާތްތަކުން އެދޭކަމަށް މޯލްޑިވްސް ކަސްޓަމްސް ސަރވިސަސްއިން ބުނެފިއެވެ.

ބުދަ ދުވަހު ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޗީފް ކަސްޓަމްސް އޮފިސަރ އަލީ ޒުބައިރު ވިދާޅުވީ، އެކްސްޕޯޓް އިމްޕޯޓް ޤާނޫނުގެ ދަށުން މިހާރުވެސް ދަނޑުވެރިކަމަށް ގެނެވޭ ބާވަތްތަކުން ޑިއުޓީ މަޢާފު ކޮށްދީފައިވާއިރު، ޑިއުޓީ މަޢާފުކޮށްދެނީ ދަނޑުވެރިކަމަށް މުދާ އިމްޕޯޓްކުރާ ފަރާތްތަކުގެ ގޮތުގައި މިނިސްޓްރީ އޮފް ފިޝަރީޒް އެންޑް އެގްރިކަލްޗަރގައި ރަޖިސްޓްރީވެފައިވާ ފަރާތްތަކަށް ކަމަށެވެ.

އެގޮތުން ދަނޑުވެރިކަމުގެ ބޭނުމަށް އެތެރެކުރެވޭ ތަކެތިން އިމްޕޯޓް ޑިއުޓީ މަޢާފުކޮށްދޭއިރު، އެ ލިސްޓުގައި ހިމެނޭ ބާވަތްތައް އިތުރުކުރުމަށް އިމްޕޯޓަރުން އެދޭކަން ފާހަގަކުރައްވައި ޢަލީ ވިދާޅުވީ، ލިސްޓުގައި ހިމެނޭ ބާވަތްތައް މަދުވުމުގެ ސަބަބުން މުދާ އެތެރެކުރާ ފަރާތްތަކަށް ދަތިތަކާ ކުރިމަތިވާ ކަމަށެވެ.

އެއާއެކު ކުރިއަށް އޮތް ތަނުގައި ކަމާބެހޭ ފަރާތްތަކާއި މަޝްވަރާ ކުރައްވައި ފިޝަރީޒް މިނިސްޓްރީން ކަނޑައަޅާފައިވާ ލިސްޓަށް ގެންނަން ޖެހޭ ބަދަލުތައް ގެނައުމުގެ މަސައްކަތް ކުރައްވާނެކަމަށް އޭނާ ވިދާޅުވިއެވެ.

ކޮވިޑް-19އާ ގުޅިގެން އިޤުތިޞާދު ވަރަށް ބޮޑަށް ދަށްވެފައިވާ މިދަނޑިވަޅުގައި ރަށްރަށުން ދަނޑުވެރިކަން ކުރިއެރުވުމަށް އަންނަނީ ގިނަ މަސައްކަތްތައްތަކެއް ކުރަމުންނެވެ. އެގޮތުން ބައެއް ރަށްރަށުގައި ދަނޑުބިމުގެ ކުލިން %50 އުނިކޮށްފައިވާއިރު، އަދި އަލަށް ދަނޑުވެރިކަން ކުރުމަށް ނުކުންނަ ފަރާތްތަކަށް ޚާއްޞަ ސަމާލުކަމެއްދީ އެފުރުޞަތު ފަހިކޮށްދޭނެކަމަށް ސަރުކާރުންވެސް ވަނީ ބުނެފައެވެ.