އިންޑިއާއިން އެކްސްޕޯޓްކުރުން މަނާކޮށްފައިވާ ކޮވިޑް-19ގެ ޓެސްޓިންއަށް ބޭނުންކުރާ ބައެއް ރީއެޖެންޓްސް އެތެރެކުރުމުގެ ހުއްދަ ދީފި
6 މެއި 2020 | ބުދަ 17:53މިތަކެތި ގެނައުމުގެ މަސައްކަތް ސަރުކާރުން ދަނީ ކުރަމުން
ފޮރިން މިނިސްޓަރ އަބްދުﷲ ޝާހިދު އާއި އިންޑިއާ ސަފީރު ސަންޖޭ ސުދީރު
ކޮވިޑް-19ގެ ޓެސްޓިންއަށް ބޭނުންކުރާ ބައެއް ރީއެޖެންޓްސް އިންޑިއާއިން އެކްސްޕޯޓްކުރުން މަނާކޮށްފައި އޮތުމަށްފަހު، މިތަކެތި ރާއްޖެއަށް މިހާރު ލިބޭނެ އިންތިޒާމް އެޤައުމުން ހަމަޖައްސައިފިއެވެ.
ފޮރިން މިނިސްޓްރީން ބުނީީ އެ މިނިސްޓްރީއިން އިންޑިއާގެ ކަމާބެހޭ ފަރާތްތަކާއެކު ކުރެވުނު މަސައްކަތުން ރާއްޖެއަށް މިވަގުތު ބޭނުންވެ، އަދި ސްޓޭޓް ޓްރޭޑިންގ އޯގަނައިޒޭޝަން (އެސް.ޓީ.އޯ) އިން ކުރިން އޯޑަރު ދީފައިވާ ޓެސްޓް ކިޓްތަކާ، ރީއެޖެންޓްސް އަދި ވައިރަލް ޓްރާންސްޕޯޓް މީޑިއަމްތައް މިހާރު ރާއްޖެއަށް އެތެރެކުރުމަށް އިންޑިއާއިން ވަނީ ހުއްދަ ދީފައިކަމަށެވެ.
އަދި މިތަކެތި ރާއްޖެއަށް ގެނައުމުގެ ހުއްދަ ލިބުމާ ގުޅިގެން، ރާއްޖެއަށް ގެނައުމަށް ކުރަން ޖެހޭ މަސައްކަތް ސަރުކާރުން ގެންދަނީ ކުރަމުން ކަމަށެވެ.
ރާއްޖެއިން ކޮވިޑް-19 އާ ދެކޮޅަށް ކުރަމުންދާ މަސައްކަތުގައި މީގެ ކުރިންވެސް މިގޮތަށް އިންޑިއާއިން އެކްސްޕޯޓްކުރުން މަނާކޮށްފައިވާ ބައެއް ތަކެތި ރާއްޖެއަށް އެތެރެކުރުމަށް އެޤައުމުން ލުއިތަކެއް ދީފައިވާކަން މިނިސްޓްރީން ވަނީ ފާހަގަ ކޮށްފައި ވެއެވެ.
އަދި މިފަދަ ދަނޑިވަޅުތަކުގައި އިންޑިއާއިން ފޯރުކޮށްދެމުންދާ އެހީތެރިކަމަށް ބޮޑުވަޒީރު ނަރެންދްރަ މޯދީއަށާއި، ޚާރިޖީ ވަޒީރު ޑރ. އެސް. ޖައިޝަންކަރުގެ އިތުރުން އިންޑިއާ އިން ރާއްޖެއަށް ކަނޑައަޅުއްވާފައި ހުންނަވާ ސަފީރު ސަންޖޭ ސުދީރުއަށް މިނިސްޓަރ އޮފް ފޮރިން އެފެއަރޒް އަބްދުﷲ ޝާހިދު ވަނީ ޝުކުރު އަދާކުރައްވާފައެވެ.
