އެކުވެރި ގައުމުތަކުން ޒަރޫރީ ބޭހައި ކާބޯތަކެތި ދިވެހި ރުފިޔާއިން ގަނެވޭނެ އިންތިޒާމު ހަމަޖެއްސުމަށް ލަފާދީފި

ކޮވިޑް-19 ރޯގާއާ ގުޅިގެން ކުރިމަތިވެފައިވާ އިޤުތިޞާދީ އަޑިގަޑުން އަރައިގަތުމަށާއި ގައުމުގެ އިޤުތިޞާދު ނެގެހެއްޓުމަށް ބޭރުގެ ފަރާތްތަކުގެ އެހީތެރިކަމަކީ ވަރަށް މުހިންމު ދައުރެއް އަދާކުރާނެ ކަމެއް ކަމަށްފެންނާތީ، ބޭރުގެ ފަރާތްތަކުގެ އެހީތެރިކަމަށް އެދުމަށާއި އަދި މަޝްވަރާތައް ކުރުމަށް ސަރުކާރަށް ލަފާދިނުމަށް، ޤައުމީ ސަލާމަތާއި ޚާރިޖީ ގުޅުންތަކުގެ ކޮމިޓީން ނިންމާފައިވާ ރިޕޯޓް ރައްޔިތުންގެ މަޖިލީހުން ފާސްކޮށްފި އެވެ.

ރައްޔިތުންގެ މަޖިލީހުގެ ބުދަ ދުވަހުގެ ޖަލްސާގައި، ކޮވިޑް-19 ރޯގާ ފެތުރުނަ ނުދިނުމަށް ސަރުކާރުން އަޅާ ފިޔަވަޅުތަކުގެ ސަބަބުން ޢާއިލާތަކާއި ވިޔަފާރިތަކުގެ ޢާމްދަނީއަށް އަންނަ ނުރަނގަޅު ބަދަލުތަކުން އަރައިގަތުމަށް، ސަރުކާރުން ހިންގުމަށް ނިންމާފައިވާ ޕްރޮގުރާމް ތަންފީޒުކުރުމަށް މަޖިލީހުން ދެކޭގޮތް ކަނޑައެޅުމާ ގުޅޭގޮތުން، ރައްޔިތުންގެ މަޖިލީހުގެ މެދުހެންވޭރު ދާއިރާގެ މެންބަރު އަދި މަޖިލީހުގެ މެޖޯރިޓީ ލީޑަރު ޢަލީ ޢާޒިމް، 30 މާރޗު 2020 ގައި، ރައްޔިތުންގެ މަޖިލީހަށް ހުށަހަޅާފައިވާ މައްސަލައާ ގުޅިގެން، ޤައުމީ ސަލާމަތާއި ޚާރިޖީ ގުޅުންތަކުގެ ކޮމިޓީން ދިރާސާކޮށް ނިންމިގޮތުގެ ރިޕޯޓު ފާސްކޮށްފައިވަނީ ވޯޓުގައި ބައިވެރިވި 69 މެންބަރުންގެ އިއްތިފާޤުންނެވެ.

މި ރިޕޯޓުގައި، 6 ހުށަހެޅުމެއް ސަރުކާރަށް ހުށަހަޅާފައިވެއެވެ. އެގޮތުން، ތިން ވަނަ ހުށަހެޅުމެއްގެ ގޮތުގައި ވަނީ، ކޮވިޑް-19 ރޯގާއާ ގުޅިގެން ކުރިމަތިވެފައިވާ، އިޤުތިޞާދީ އަޑިގަޑުން އަރައިގަތުމަށާއި ޤައުމުގެ އިޤުތިޞާދު ނެގެހެއްޓުމަށް ބޭރުގެ ފަރާތްތަކުގެ އެހީތެރިކަމަކީ ވަރަށް މުހިންމު ދައުރެއް އަދާކުރާނެ ކަމަކަށްވާނެ ކަމަށެވެ. އަދި ރާއްޖެއާ ރަޙުމަތްތެރި އެކުވެރި ޤައުމުތަކުން ބޭހާއި ކާބޯތަކެއްޗާއި އަދިވެސް އެހެނިހެން ޒަރޫރީ ތަކެތި، ދިވެހި ފައިސާއިން ރާއްޖެއަށް ގަނެވޭނެފަދަ އިންތިޒާމު ހަމަޖެއްސޭތޯ އެފަރާތްތަކާއެކު މަޝްވަރާކޮށް، އެކަން ހަމަޖެއްސުމަށް މަސައްކަތް ކުރުމަށް ސަރުކާރަށް ލަފާދީފައި ވެއެވެ.

މީގެއިތުރުން، ރާއްޖެއިން ބޭރުގެ ޤައުމުތަކުންނާއި ބޭރުގެ އަމިއްލަ ޖަމާޢަތްތަކާއި، ބައިނަލްއަޤުވާމީ ޖަމްޢިއްޔާތަކުން ރާއްޖެއަށް ލިބެން ހަމަޖެހިފައިވާ ލޯނާއި ހިލޭ އެހީއާއި އަދިވެސް އެހެނިހެން އެހީތެރިކަން ހޯދުމަށް މަޝްވަރާކުރުމަށްވެސް ކޮމެޓީން ލަފާދީފައި ވެއެވެ. އަދި ރާއްޖެއިން ބޭރުން ނަގާފައިވާ ލޯނުތައް، ޤައުމުގެ އިޤުތިޞާދީ ޙާލަތު ރަނގަޅުވަންދެން ފަސްކޮށްދިނުމަށް ވެސް މަޝްވަރާކުރުމަށް ލަފާދީފައި ވެއެވެ.

ޤަވާއިދާ ޅިލާފަށް އުޅޭ ބިދޭސީންނާ ގުޅޭގޮތުން ކޮމެޓީން ހުށަހަޅާ ކަންތަކެއްވެސް ވެއެވެ. އޭގެ ތެރޭގައި މޮނީޓަރިންގ ނިޒާމު ހަރުދަނާކޮށް، އެމްބަސީތަކާ ވާހަކަދައްކައިގެން ޤަވާއިދާ ޚީލާފަށް އުޅޭ ބިދޭސީން ވީހާވެސް އަވަހަކަށް ފޮނުވޭނެ އިންތިޒާމު ހަމަޖެއްސުމަށް ސަރުކާރަށް ލަފާ ދިނުމަށްވެސް ކޮމެޓީގެ ރިޕޯޓުގައި ވެއެވެ.