ސައުދީގައި ކޮވިޑް-19 ޖެހުނު މީހުންގެ އަދަދު ތިރީސް ހާހަށް

ސައުދީ ޢަރަބިއްޔާގައި ކޮވިޑް-19 ޖެހުނު މީހުންގެ ޢަަދަދު 30،000ށްވުރެ މައްޗަށް އަރައިފިއެވެ.

ސައުދީ ޢަރަބިއްޔާގެ ޞިއްޙަތާބެހޭ އިސް މަސްއޫލުވެރިންނާއި ޙަވާލާދީ ގަލްފުގެ މީޑިއާތަކުން ރިޕޯޓުކުރާގޮތުގައި، ފާއިތުވެ ދިޔަ 24 ގަޑީއިރު 1،595 މީހުން ވައިރަސްއަށް ޕޮޒިޓިވްވެ، ޕޮޒިޓިްވީ މިހުންގެ ޢަދަދު މިހާރު ވަނީ 30,251ށް އަރާފައެވެ.

ސަޢުދީ ޢަރަބިއްޔާގެ ޞިއްޙަތާބެހޭ ވުޒާރާގެ ތަރުޖަމާނު ޑރ. މުޙައްމަދު އަލް-އަބްދުލް ޢަލީ ވިދާޅުވީ، އަންގާރަ ދުވަހު ޕޮޒިޓިވްވީ މީހުންގެ ތެރެއިން %14 މީހުންނަކީ އަންހެނުންކަމަށާއި %86 އަކީ ފިރިހެންުންކަމަށެވެ. އަދި ޕޮޒިޓިވްވީ މީހުންގެ ތެރެއިން ގިނައީ ބިދޭސީންކަމަށެވެ.

ތަރުޖަމާނު ވިދާޅުވީ، އެޤައުމުގައި ކޮވިޑް-19އަށް ފަރުވާ ލިބި، ރަނަގޅުވީ މީހުންގެ ޢަދަދު ދުވަހުން ދުވަހަށް އިތުރުވަމުން އަންނަކަމަށެވެ. އެގޮތުން އަންގާރަ ދުވަހު އެކަނިވެސް 955 މީހުން ފަރުވާއަށް ފަހު ގެއަށް ދޫކޮށްލާފައިވާކަމަށެވެ. އަދި ފަރުވާދީގެން ރަނގަޅުވީ މީހުންގެ ޢަދަދު މިހާރު 5,431ށް އަރާކަމަށް ވިދާޅުވިއެވެ. ކޮވިޑް-19 ގައި މަރުވާ މީހުންގެ ރޭޓުވެސް މިހާރު ދަށް ކުރެވިފައިވާކަމަށް އޭނާ ވިދާޅުވިއެވެ. ސައުދީގައި މިހާތަނަށް ކޮވިޑް-19 ޖެހިގެން މަރުވިކަމަށް ރިކޯޑު ކުރެވިފައިވަނީ 200 މީހުންނެވެ.

ސައުދީގައި މިހާރުވެސް 24,620 މީހަކަށް ދަނީ ފަރުވާ ދެމުންނެވެ. އޭގެ ތެރެއިން 143 މީހުންގެ ޙާލު ސީރިއަސްކަމަށް ތަރުޖަމާނު ވިދާޅުވެފައިވެއެވެ.

ސައުދީގައި ވައިރަސް ފެތުރެމުންދާ ޒާތައް ބަލާއިރު އަދިވެސް އެންމެ ގިނަ ކޭސްތައް ފެންނަމުން ދަނީ މައި ސިޓީތަކުންނެވެ. އެގޮތުން އެންމެ ގިނަ ކޭސްތައް ރިޕޯޓުކުރެވިފައިވަނީ ވެރިރަށް ރިޔާދާއި، ޖިއްދާއާއި ، މަދީނާއާއި، ދަމާމްއައި، މައްކާއިންނެވެ.

ސައުދީގެ ޞިއްޙަތާބެހޭ ވުޒާރާއިން ވަނި ޢާންމު އިޖްތިމަޢީ ގައިދުރުކަން އިސްކޮށް، ޞިއްޙީ މަސްއޫލުވެރިން ދެއްވާ އިރުޝާދުތަކައް ކިޔަމަންވުމަށް އިލްތިމާސްކޮށްފައެވެ. ސަލާމަތާއި ރައްކާތެރިކަމުގެ ގޮތުން ސައުދީ ރަސްކަމުގެ ދަރުބާރުގެ ޢަމުރުގެ މަތިން، އެޤައުމުގެ ކަމާބެހޭ އިދާރާތަކުން ހަރުކަށި ފިޔަވަޅު އަޅަމުން ގެންދިޔަ ނަމަވެސް، ބަރަކާތްތެރި ރަމަޟާން މަހާއި ދިމާކޮށް ގިނަ ފިޔަވަޅުތައް ވަނީ ލުއިކޮށްދީފައެވެ.