މަނަދޫން ޕޮޒިޓިވްވި 80 އަހަރުގެ މީހާގެ ތިން ވަނަ ސާމްޕަލް ޕޮޒިޓިވް

މި މަހުގެ 1 ވަނަ ދުވަހު ނ. މަނަދޫން ކޮވިޑް-19 އަށް ޕޮޒިޓިވްވި 80 އަހަރުގެ އުމުރުން ދުވަސްވީ އަންހެން މީހާގެ ތިން ވަނަ ސާމްޕަލް ޕޮޒިޓިވް ކަމަށް ކޮވިޑް-19 ޓާސްކް ފޯހުގެ ތަރުޖަމާނު މަބްރޫކް އަޒީޒު ވިދާޅުވެއްޖެ އެވެ.

މެއި 1 ގައި ނ. އަތޮޅު ހޮސްޕިޓަލުން "ރާއްޖެއެމްވީ" އަށް މަޢުލޫމާތު ދެމުން ބުނީ، އެރަށުން 80 އަހަރުގެ އަންހެނަކު ކޮވިޑް-19 އަށް ޕޮޒިޓިވްވެފައިވާ ކަމަށާއި، އޭނާ ރަށުން ޑޮކްޓަރަށް ދެއްކީ އޭޕްރީލް މަހުގެ 29 ވަނަ ދުވަހުގައި ކަމަށެވެ. އަދި އޭރު އޭނާއަކީ ކޮވިޑް-19 އަށް ޝައްކު ކުރެވިގެން ފަރުވާދިން ބަލިމީހެއް ނޫންކަންވެސް ފާހަގަ ކޮށްފައިވެއެވެ.

އޭގެ އިތުރުން، ބަލި މީހާގެ ޙާލު ބޮޑުވެގެން ބުރާސްފަތި ދުވަހުގެރޭ އޭނާ މާލެ ގެނެވިފައިވާއިރު، ހުން ހުރުމާއެކު އައިޖީއެމްއެޗުން ކޮވިޑް-19 އަށް ޓެސްޓް ކުރި ކަމަށާއި، ޕޮޒިޓިވްވިކަން އެނގިފައިވަނީ ހުކުރު ދުވަހުގެ ހަވީރު ކަމަށް ހޮސްޕިޓަލުން ބުނެފައިވެއެވެ.

އެއީ އެމީހާގެ ފުރަތަމަ ޓެސްޓެވެ. އެ ޓެސްޓަށް ޕޮޒިޓިވްވި ނަމަވެސް ފަހުން ހެދި ޓެސްޓްގެ ނަތީޖާ ވަނީ ނެގެޓިވްވެފައެވެ. އޭގެފަހުން ސާމްޕަލެއް ނަގާފައިވާއިރު އެ ސާމްޕަލްގެ ނަތީޖާ ޕޮޒިޓިވްކަމަށް މަބްރޫކް ވިދާޅުވި އެވެ. އަދި މިމީހާއަށް މިހާރު ދަރުމަވަންތަ ހޮސްޕިޓަލްގެ 11 ވަނަ ފަންގިފިލާގައި ފަރުވާދެމުންދާ ކަމަށް އެޗްޕީއޭގެ އެޕީޑިއޮމޮލޮޖިސްޓް ޑޮކްޓަރ އިބްރާހީމް އަފްޒަލް ވިދާޅުވިއެވެ.

މިކަމާއި ގުޅިގެން މަނަދޫން އެމީހާ އާ ކޮންޓެކްޓްވި މީހުންގެ ސާމްޕަލްތައް ނަގާ ޓެސްޓް ކޮށްފައިވާއިރު އެޓެސްޓްތަކުގެ ނަތީޖާ ނެގެޓިވްކަމަށް މަނަދޫގައި ހުންނަ ނ އަތޮޅު ހޮސްޕިޓަލުން މަޢުލޫމާތުދެ އެވެ. އަންހެން މީހާ ކޮވިޑް-19 އަށް ޕޮޒިޓިވްވުމާއި ގުޅިގެން ނ އަތޮޅު ހޮސްޕިޓަލްގެ 17 ސްޓާފަކު ވަނީ އައިސޮލޭޝަންގަ އެވެ. އަދި މަނަދޫ ވަނީ މޮނިޓަރިންގެ ޙާލަތުގައެވެ.