ރިކަވަރީ ސްކީމްގެ ދަށުން ވިޔަފާރިތަކަށް 45 މިލިއަން ރުފިޔާ ދޫކޮށްފި
ޖުމްލަ 63 ވިޔަފާރިއަކަށް ވަނީ ފިނޭންސުން އެޕްރޫވަލް ދީފައި
ފިނޭންސް މިނިސްޓަރ އަމީރު އަދި ބީއެމްއެލްގެ ސީއީއޯ ޓިމް ސޯޔަރ
ކޮވިޑް-19 އާ ގުޅިގެން ބޮޑެތި ވިޔަފާރިތަކަށް ހާއްސަކޮށްގެން ސަރުކާރުން ގާއިމްކޮށްފައިވާ ރިކަވަރީ ސްކީމްގެ ދަށުން ބޭންކް އޮފް މޯލްޑިވްސް (ބީއެމްއެލް) އިން މިހާތަނަށް 45 މިލިއަން ރުފިޔާ ދޫކޮށްފި އެވެ.
ރިކަވަރީ ސްކީމްގެ ތެރެއިން 45 މިލިއަން ރުފިޔާ ބީއެމްއެލްއިން ދޫކޮށްފައިވަނީ 34 ވިޔަފާރިއަކަށެވެ. ބޭންކުގެ އިވެލުއޭޝަން މަރުހަލާ ނިމުމަށްފަހު، ފިނޭންސް މިނިސްޓްރީން ވަނީ 63 ވިޔަފާރިއަކަށް ލޯން އެޕްރޫވަލް ދީފަ އެވެ. ބާކީ ހުރި ވިޔަފާރިތަކަށް ފައިސާ ލިބިފައި ނުވަނީ، އެ ވިޔަފާރިތަކުން ބޭންކަށް ފޮނުވަން ޖެހޭ ލިޔެކިޔުންތައް ނުފޮނުވައިގެންނެވެ.
ބީއެމްއެލްއިން ވަނީ ބޭންކަށް އަނބުރާ ފޮނުވަން ޖެހޭ ލިޔެކިޔުންތައް ފޮނުވުމާއެކު، ފައިސާ ދޫކުރުމުގެ މަރުހަލާ ނިމޭނެކަން ފާހަގަކޮށްފަ އެވެ. އަދި މިހާތަނަށް އެޕްރޫވަލް ލިބިފައިވާ ވިޔަފާރިތަކުން ވީހާވެސް އަވަހަކަށް މި ލިޔުންތައް ފޮނުވުމަށް ބޭންކުން ވަނީ އިލްތިމާސްކޮށްފަ އެވެ.
ކޮވިޑް-19 އާ ގުޅިގެން ވިޔަފާރިތަކަށް ދިމާވެފައިވާ މާލީ ހީނަރުކަމުން އަރައިގަތުމަށް ސަރުކާރުން ގާއިމްކޮށްފައިވާ ރިކަވަރީ ސްކީމްގެ ދަށުން، ބީއެމްއެލްއިން ލޯނު ދޫކުރުމަށް ހަމަޖެހިފައިވަނީ ރިސޯޓްތަކަށާއި އަހަރެއްގެ މައްޗަށް އާމްދަނީގެ ގޮތުގައި 10 މިލިއަނަށް ވުރެ މަތީގެ އަދަދެއް ހޯދާފައިވާ ވިޔަފާރިތަކަށެވެ.
10 މިލިއަނަށް ވުރެ ދަށުން އާމްދަނީ ލިބޭ ވިޔަފާރިތަކަށް ލޯނު ދޫކުރަން ހަމަޖެހިފައިވަނީ އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން (އެސްޑީއެފްސީ) މެދުވެރިކޮށެވެ. އެސްޑީއެފްސީ މެދުވެރިކޮށް ދޫކޮށްފައިވާ ފައިސާގެ ތަފުސީލެއް މިހާތަނަށް ހިއްސާކޮށްފައެއް ނުވެ އެވެ.
