ކަރަންޓީން ފެސިލިޓީތަކުގައި ތިބި 98 މީހެއްގެ ސާމްޕަލް ނަގައިފި
5 މެއި 2020 | އަންގާރަ 17:38އަންގާރަ ދުވަހު 6 މީހުން ވަނީ ދޫކޮށްލާފައި
ކޮވިޑް-19 ޓާސްކްފޯހުގެ ތަރުޖަމާނު މަބްރޫކު އަޒީޒް
ކަރަންޓީން ފެސިލިޓީތަކުން ދޫކޮށްލުމަށް މިހާރު 98 މީހެއްގެ ސާންޕަލްތައް ނެގިފައިވާ ކަމަށް ކޮވިޑް-19 ޓާސްކް ފޯހުން ބުނެފި އެވެ.
އަންގާރަ ދުވަހުގެރޭ ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި ކޮވިޑް-19 ޓާސްކްފޯހުގެ ތަރުޖަމާނު މަބްރޫކު އަޒީޒް ވިދާޅުވީ، އަންގާރަ ދުވަހު ކަރަންޓީން ފެސިލިޓީތަކުން ޖުމްލަ 06 މީހަކު ކޮވިޑް-19 އަށް ނެގެޓިވްވުމުން ދޫކޮށްލާފައިވާ ކަމަށެވެ.
މަބްރޫކް ވިދާޅުވީ މިހާރު ކަރަންޓީން ފެސިލިޓީތަކުގައި ތިބި މީހުންގެ ތެރެއިން 14 ދުވަސް ހަމަވި، 98 މީހެއްގެ ސާމްޕަލް ނަގާފައިވާ ކަމަށެވެ. އަދި ނަތީޖާ ލިބުމުން ނެގެޓިވްވާނަމަ ދޫކޮށްލާނެ ކަމަށް މަބްރޫކް ވިދާޅުވި އެވެ.
އައިސޮޮލޭޝަން ފެސިލިޓީގެ ގޮތުގައި ބޭނުންކުރަމުންދާ ތަންތަން އިތުރުވެފައިވާކަން ފާހަގަކުރައްވައި މަބްރޫކް ވިދާޅުވީ މިހާރު އައިސޮލޭޝަން ފެސިލިޓީގެ ގޮތުގައި ބޭނުން ކުރަމުންދަނީ ވެލިދޫ އައިސޮލޭޝަން ފެސިލިޓީ، ފަރުކޮޅު އައިސޮލޭޝަން ފެސިލިޓީ، ހުޅުލެ އައިސޮލޭޝަން ފެސިލިޓީ، ދޮނަކުޅި އައިސޮލޭޝަން ފެސިލިޓީ، ބަނޑޮސް އައިސޮލޭޝަން ފެސިލިޓީ، ހުޅުމާލެ ފޭސް 2 އައިސޮލޭޝަން ފެސިލިޓީ، ހިޔާ އައިސޮލޭޝަން ފެސިލިޓީ، އަދި ދަމަވަންތަ ހޮސްޕިޓަލް ކަމަށެވެ.
މީގެއިތުރުން މަބްރޫކް ވިދާޅުވީ މޮނިޓަރިންގެ ހުރި ތަންތަނުގެ ތެރެއިން ތިން ރަށެއް އާންމު ހާލަތަށް ގެނެވިފައިވާ ކަމަށެވެ. އެއީ ހދ.ހިރިމަރަދޫ، ހދ.ކުމުންދޫ އަދި ށ.ގޮއެދޫ ކަމަށް މަބްރޫކް ވިދާޅުވި އެވެ.
