އިގްތިޞާދު ނަގަހައްޓާ ދެމެހެއްޓުމަށް، ތިމާވެއްޓާ ރައްޓެހި ގިނަ ކަންތައްތަކެއް ހިމެނި ކޮމެޓީ ރިޕޯޓު މަޖިލީހުން ފާސްކޮށްފި
5 މެއި 2020 | އަންގާރަ 09:37ރިޕޯޓް ފާސްކުރީ 60 މެމްބަރުންގެ އިއްތިފާގުން
އެންވަޔަރަމަންޓް އެންޑް ކްލައިމޭޓް ޗޭންޖް ކޮމެޓީގެ ބައްދަލުވުމެއްގައި ކޮމެޓީގެ މުގައްރިރު، އަހުމަދު ސަލީމް
ކޮވިޑް-19 ރޯގާ އާގުޅިގެން އިންދަޖެހިފައިވާ، ރާއްޖޭގެ އިޤުތިޞާދު ނަގަހައްޓާ ދެމެހެއްޓުމަށްޓަކައި ގިނަ ކަންތައްތަކެއް ހިމަނައި، ރައްޔިތުންގެ މަޖިލީހުގެ އެންވަޔަރަމަންޓް އެންޑް ކްލައިމެޓް ޗޭންޖް ކޮމެޓީން މަޖިލީހުގެ ތަޅުމަށް ހުށަހެޅި ރިޕޯޓު ފާސްކޮށްފިއެވެ.
ރައްޔިތުންގެ މަޖިލީހުގެ އަންގާރަ ދުވަހުގެ ޖަލްސާގައި އެންވަޔަރަމަންޓް އެންޑް ކްލައިމެޓް ޗޭންޖް ކޮމެޓީގެ ރިޕޯޓު ފާސްކޮށްފައިވަނީ 60 މެންބަރުންގެ އިއްތިފާޤުންނެވެ.
މި ރިޕޯޓަކީ، ކޮވިޑް-19 ރޯގާ ފެތުރުނަ ނުދިނުމަށް ސަރުކާރުން އަޅާ ފިޔަވަޅުތަކުގެ ސަބަބުން ޢާއިލާތަކާއި، ވިޔަފާރިތަކުގެ ޢާމްދަނީއަށް އަންނަ ނުރަނގަޅު ބަދަލުތަކުން އަރައިގަތުމަށް، ސަރުކާރުން ހިންގުމަށް ނިންމާފައިވާ ޕްރޮގުރާމު ތަންފީޒުކުރުމަށް މަޖިލީހުން ދެކޭގޮތް ކަނޑައެޅުމާ ގުޅޭގޮތުން، ރައްޔިތުންގެ މަޖިލީހުގެ މެދުހެންވޭރު ދާއިރާގެ މެންބަރު އަދި މަޖިލީހުގެ މެޖޯރިޓީ ލީޑަރު ޢަލީ ޢާޒިމް، 30 މާރޗު 2020 ގައި، ރައްޔިތުންގެ މަޖިލީހަށް ހުށަހަޅާފައިވާ މައްސަލައާ ގުޅިގެން ތައްޔާރުކުރި ރިޕޯޓެކެވެ.
މިރިޕޯޓުގައި ތިމާވެއްޓަށާއި، އިއާދަކުރަނިވި ހަކަތަ ބޭނުންކުރުމަށް އަދި މިފަދަ ކަންކަމަށް އިސްކަމެއް ދީގެން ސަރުކާރުން ހިންގާ ޕްރޮގުރާމުތައް ހިންގާނެ އުޞޫލުތަކެއްގެ ލަފާ ސަރުކާރަށް ދިނުމުގެ ގޮތުން، 25 ކަމެއްގެ މަށްޗަށް އެންވަޔަރަންމަންޓް އެންޑް ކްލައިމެޓް ޗޭންޖް ކޮމެޓީން ތައްޔާރުކުރި ރިޕޯޓުގައި ފާހަގަކޮށްފައި ވެއެވެ.
މިރިޕޯޓުގައި ފާހަގަކޮށްފައިވާ މުހިންމު ބައެއް ކަންކަމުގެ ތެރޭގައި، ރާއްޖޭގެ ރަށްތަކުގައި ހަކަތައިގެ ފުދުންތެރިކަން ޙާޞިލުކުރުމަށް އިއާދަކުރަނިވި ހަކަތަ އެފެއްދުމަށް ކުރާ މަސައްކަތް ހަލުވިކޮށް، އަދި ޕީއެސްއައިޕީގެ މަޝްރޫއުތަކުގެ ތެރެއިން އިއާދަކުރަނިވި ހަކަތައަށް އިންވެސްޓްކުރުމަށް ފައިސާ ބަދަލުކުރެވެންހުރި މަޝްރޫޢުތައް ބަދަލުކުރުން ހިމެނެއެވެ. އަދި ސޯލަރ ޕެނަލް ހަރުކުރުމަށް ބޭނުންވާ މީހުންނަށް ރަށު ފެންވަރުގައި ލުއި ލޯނު ސްކީމެއް ތަޢާރަފު ކުރުން، ކުރިއަށް އޮތް ތިން އަހަރު، ކޮންމެ އަހަރެއްގެ ބަޖެޓުން ކޮންމެ ކައުންސިލަކަށް 1،000،000ރ (އެއް މިލިއަން ރުފިޔާ) ކަނޑައެޅުން ހިމެނެއެވެ،
މީގެއިތުރުން، ސަރުކާރުން މަސްދޯނިތައް ހަދައި، އެ ދޯނިފަހަރު ބާޒާރަށް ނެރެ، ލުއި ލޯނުގެ ގޮތުގައި މަސްވެރިކަންކުރާ ފަރާތްތަކަށް ދޫކުރުމުގެ އިންތިޒާމު ހަމަޖެއްސުން ހިމެނޭއިރު، ބަންނަން ފަށާފައިވާ ނަމަވެސް ކޮންމެވެސް ސަބަބަކާހުރެ މަސައްކަތް ހުއްޓިފައިވާ މަސްދޯނިތައް ނިންމުމުގައި ސަރުކާރު އެހީތެރިކަން ދިނުން ވެސް ހިމެނެއެވެ. އަދި އޮޑިދޯނި ފަހަރު ބަނުމަށް ބޭނުންކުރާ ސާމާނުން ނަގާ ޑިއުޓީ ކުރިއަށް އޮތް 3 އަހަރަށް މަޢާފުކުރުން ހިމެނޭއިރު، މަސް ފިނިކޮށް ބެލެހެއްޓުމަށް ސްޓޯރޭޖް ކެޕޭސިޓީ ރަށްތަކުގައި އިތުރުކުރުން، އަމިއްލަ ފަރާތްތަކުގެ ބައިވެރިވުން އިތުރުކުރުންވެސް ހިމެނެއެވެ.
ދަނޑުވެރިކަން ފުޅާކުރުމަށް ބިންތައް ކައުންސިލުތަކުން އަވަހަށް ކަނޑައެޅުމަށް އަންގާ، ޝައުޤުވެރުވާ ފަރާތްތަކަށް އެހީތެރިކަން ފޯރުކޮށްދިނުމާއި ރާއްޖޭގެ އެކި ޞަރަޙައްދުތަކުގައި ހުރި އެސްޓީއޯގެ ފިހާތަކަށް ދަނޑުވެރިކަމުގެ ބާވަތްތައް ފަސޭހައިން ވިއްކޭނެ އިންތިޒާމު ހަމަޖެއްސުން ވެސް ހިމެނެއެވެ. އަދި ގަސްކާނާއާއި، އޯގޭނިކް ބޭސް ރާއްޖެއަށް ބޭނުންވާ މިންވަރަށް އުފެއްދުމުގެ ޕްރޮގުރާމު ފެށުމާއި ކާބޯތަކެއްޗާއި، ފެނާއި ކަރަންޓް އިޞްރާފު ނުކުރުމަށާއި، ތިމާވެށި ޙިމާޔަތްކުރުމާ ގުޅޭގޮތުން ޢާންމުން ހޭލުންތެރިކުރުމުގެ ޕްރޮގުރާމެއް މީޑިއާ މެދުވެރިކޮށް ކަމާބެހޭ ވުޒާރާތަކުންނާއި ޔުޓިލިޓީ ކުންފުނިތަކުން ހިންގުންވެސް އެންވަޔަރަންމަންޓް އެންޑް ކްލައިމެޓް ޗޭންޖް ކޮމެޓީ ރިޕޯޓުގައި ފާހަގަކުރައްވާފައި ވެއެވެ.
