ބިލިއަނަރު އޮންގް ހަދިޔާކުރެއްވި 15 ވެންޓިލޭޓަރު ރާއްޖެ ގެނެސްފި
މާސްކު ލިބޭނީ މި މަހު 13 ގައި: ޝާހިދު
ސިންގަޕޫރްގެ ބިލިއަނަރު އޮންގް ބެންގް ސޮންގް
ސިންގަޕޫރްގެ ބިލިއަނަރު އޮންގް ބެންގް ސޮންގް ރާއްޖެއަށް ހަދިޔާކުރެއްވި 15 ވެންޓިލޭޓަރު ރާއްޖެ ގެނެސްފިއެވެ.
އެކަން ހާމަކުރައްވަމުން ފޮރިން މިނސްޓަރު އަބްދުﷲ ޝާހިދު ކުރެއްވާފައިވާ ޓްވީޓެއްގައި ވިދާޅުވީ، އޮންގް ރާއްޖެއަށް ހަދިޔާ ކުރެއްވި 15 ވެންޓިލޭޓަރު ރާއްޖެ އައިސްފައިވާ ކަަމަށެވެ. އަދި އޮންގުގެ ފަރާތުން ހަދިޔާކުރައްވާ 150،000 (އެއްލައްކަ ފަންސާސް ހާސް މާސްކު) މި މަހުގެ 13 ވަނަ ދުވަހު ރާއްޖެ އަންނާނެ ކަމަށް ވިދާޅުވިއެވެ.
ސިންގަޕޫރްގެ މުއްސަނދިންގެ ލިސްޓުގެ 15 ގައި ހިމެނި ވަޑައިގަންނަވާ އޮންގްގެ ހޮޓެލް ޕްރޮޕަޓީސް ލިމިޓެޑް (އެޗްޕީއޭލް) އިން އަންނަނީ ރާއްޖޭގައި ގިނަ އަދަދެއްގެ ރިސޯޓުތަކެއް ހިންގަމުންނެވެ.
މިނިސްޓަރު ޝާހިދު ކުރެއްވި އިތުރު ޓްވީޓެއްގައި ވިދާޅުވީ، ސިންގަޕޫރްގެ ހިއަޕް ހުއަޓް ޕެއިންޓްސް ކޯޕަރޭޝަންގެ ފަރާތުން ރާއްޖެއަށް 5،000 ފޭސްކު މާސްކު ހަދިޔާކޮށްފައިވާ ކަމަށެވެ.
ސިންގަޕޫރުގެ އިތުރުން އެހެނިހެން ގައުމުތަކުން ދަނީ ރާއްޖެއަށް އެހީތެރިކަން ފޯރުކޮށްދެމުންނެވެ. އެގޮތުން ޗައިނާ އިންވެސް ވަނީ ރާއްޖެއަށް ބޭނުންވާ ސިއްހީ އާލާތްތައް ހަދިޔާ ކޮށްފައެވެ. ރާއްޖޭގައި ހިންގާ ވެލާ ޕްރައިވެޓް އައިލެންޑް ރިސޯޓުގެ އޯނަރުންވެސް ވަނީ ދާދި ފަހުން ރާއްޖެއަށް ސިއްހީ ގިނަ އާލާތްތަކެއް ހަދިޔާކޮށްފައެވެ.
