ކޮވިޑް-19އާ ގުޅިގެން މާލެސިޓީ ލޮކްޑައުން ކޮށްފައިވާ މިހާލަތުގައި ޚާއްސަ އެހީތެރިކަން ބޭނުންވާ ގާތްގަނޑަކަށް 700 ވަރަކަށް އާއިލާތަކަށް ކާބޯތަކެތީގެ އެހީތެރިކަން ފޯރުކޮށްދެމުންދާ ކަމަށް ޔޫތް މިނިސްޓަރު އަހުމަދު މަހުލޫފް ވިދާޅުވެއްޖެއެވެ.
ޔޫތް މިނިސްޓްރީން މިމަސައްކަތް ކުރަނީ ޖެންޑާ މިނިސްޓްރީ އަދި ޔުނިސެފް ގުޅިގެންނެވެ. ހޯމަ ދުވަހު ނޭޝަނަލް އިމަރޖެންސީ އޮޕަރޭޝަން ސެންޓަރު (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރު މަހުލޫފް ވިދާޅުވީ ޚާއްސަ އެހީތެރިކަން ބޭނުންވާ ގާތްގަނޑަކަށް 700 ވަރަކަށް އާއިލާއަށް އެހީތެރިވުމުގެ މަސައްކަތް ކުރާއިރު، ދެބައިކޮށްފައި އެއްބަޔަށް މިހާރު ވަނީ ކާބޯތަކެތި ޑެލިވަރީ ކުރެވިފައިވާ ކަަމަށެވެ.
ޑެލިވަރީގެ ޚިދުމަތަށް ދިމާވި ގޮންޖެހުންތަކަށް އަލިއަޅުއްވާލައްވާ މިނިސްޓަރު މަހުލޫފް ވިދާޅުވީ މިހާރު ވަރަށް ބޮޑު ލުއެއް ލިބިފައިވާ ކަމަށެވެ.
އެގޮތުން މި މަސައްކަތް ކުރުމަށް ހުޅުވާލި ފުރުސަތުގައި ވޮލެންޓިއަރ ކުރުމަށް އަމިއްލަށް އިސްނަގާގެން މަސައްކަތް ކުރި ޒުވާން ޓީމަށް މިނިސްޓަރު ވަނީ ވަރަށް ތައުރީފް ކުރައްވާފަ އެވެ. އަދި މިހާރު ވެސް ޔޫތް މިނިސްޓްރީން އެކުލަވާލި ޓީމުން ބުރަ މަސައްކަތްތަކެއް ކުރަމުންދާކަން މިނިސްޓަރު ފާހަގަކުރެއްވި އެވެ.
އެންމެ ބޮޑަށް ދިމާވި މައްސަލައަކީ ޑެލިވަރީގައި ހުރި ގޮންޖެހުންތައް. ވޮލެންޓިއަރުން ހޯދަން ހުޅުވާލިވުމާއެކި 500އާ ގަތްކުރާ އަދަދަށް މީހުން ޝައުގުވެރިކަން ފާޅުކުރި. އެކުލަވާލި ޒުވާން ޓީމާއެކު ދެން އަޅުގަނޑުމެންނަށް ވަރަށް ގިނަ ފިހާރަތަކަށް ގޮސްގެން މަސައްކަތް ކުރިން. ޚާއްސަކޮށް ފުޅާ ދައިރާގައި މިމަސައްކަތް ކުރާ ފިހާރަތަކާއެކު. މިހާރު ޕްރެޝަރ ކުޑަކަން އަޅުގަނޑުމެންނަށް މިމަސައްކަތުގެ ތެރެއިން އިހުސާސް ކުރެވޭ.ޔޫތް މިނިސްޓަރު އަހުމަދު މަހުލޫފް
މިނިސްޓަރު މަހުލޫފް ވިދާޅުވީ އިސްލާމިކް މިނިސްޓްރީގެ އެދުމަކަށް މާލެ ސަރަހައްދުގައި ފަގީރުންގެ ގޮތުގައި ލިސްޓު ކުރެވިފައިވާ 436 ގޭބިސީއަށް ކަދުރު ބެހުމުގެ މަސައްކަތް ކޮށްފައިވާ ކަމަށެވެ. އަދި މިހާތަނަށް ފޯނުން ގުޅުނު މީހުންނަށް ކަދުރު ހަދިޔާކޮށްފައިވާކަން މިނިސްޓަރު ފާހަގަކުރެއްވި އެވެ.
މި މަސައްކަތުގައި ޔޫތް މިނިސްޓްރީން ހަރަކާތްތެރިވާތީ ބައެއް ފާޑުކިއުންތައް އަމާޒުވިކަން ފާހަގަކުރައްވައި މިނިސްޓަރު ވިދާޅުވީ ކަދުރު ބެހުމަކީ ޔޫތް މިނިސްޓްރީން ކުރަންޖެހޭ މަސައްކަތެއް ނޫން ނަމަވެސް މިދަނޑިވަޅުގައި އެހީތެރިކަން ފޯރުކޮށްދޭން ޖެހޭ ކަމަށެވެ. އަދި އިސްލާމިކް މިނިސްޓްރީގެ އެދުމުގެ މަތިން ފޯރުކޮށްދިން އެހީތެރިކަމެއް ކަމަށް މިނިސްޓަރު ވިދާޅުވި އެވެ.
މީގެ އިތުރުން މިނިސްޓަރު މަހުލޫފް ވިދާޅުވީ ކަދުރު ފޯރުކޮށް ނުދެވުނު ގެތަކުގެ ތަފްސީލީ މައުލޫމާތު އިސްލާމިކް މިނިސްޓްރީއާ މިހާރު ހިއްސާކޮށްފައިވާ ކަމަށެވެ.
ޔޫތް މިނިސްޓްރީން ގިނަ މަސައްކަތްތަކެއް ކުރާކަން ފާހަގަކުރައްވައި މިނިސްޓަރު މަހުލޫފް ވިދާޅުވީ ޖެންޑާ މިނިސްޓްރީއާ ގުޅިހެން އެކިއެކި ޚިދުމަތްތައް ދެމުންދާ ކަމަށެވެ. އެގޮތުން ވަގުތީ ހިޔާ ފޯރުކޮށްދިނުމުގެ މަސައްކަތްތަކާއި ބޯހިޔާވަހިކަން ކަށަވަރުކޮށްދިނުމަށް ވެސް މަސައްކަތް ކުރަމުންދާކަން ފާހަގަކުރެއްވި އެވެ.
