ކޮވިޑް19 އާއި ގުޅިގެން ހިންގޭ ޕްރޮކިއުމަންޓްތައް ހިންގުމުގައި ޚާއްސަ ސަމާލުކަމެއް ދިނުމަށް ފިނޭންސް މިނިސްޓްރީން އިލްތިމާސްކޮށް، އަމަލުކުރާނެ އުސޫލެއް އާންމުކޮށްފި އެވެ.

ޕްރޮކިއުމަންޓުތަކުގައި ކޮރަޕްޝަންގެ ހިރާސް ކުޑަކުރުމަށް ފިޔަވަޅު އެޅުމާއި ގުޅިގެން ފިނޭންސް މިނިސްޓްރީން ނެރުނު ލިޔުމުގައި ވަނީ ދިހަ ކަމެއް ފާހަގަކޮށްފަ އެވެ.

އެގޮތުން ދައުލަތުން ޚަރަދުކުރަން ޖެހޭ ކަންކަން ނިންމުމުގެ ބާރު އެއްފަރާތުގައި ނުބޭއްވުމާއި، މަސައްކަތްތަކާ ގުޅޭ އެކި ޒިންމާތައް ވަކިކުރެވި އެކި ފަރާތްތަކާ ޙަވާލުކުރުމަށް ސަމާލުކަމެއް ދިނުމަށް ލިޔުމުގައި ވެއެވެ. އަދި ކޮވިޑް-19 އާ ގުޅިގެން ނިންމާ ނިންމުންތަކާ ގުޅޭ ތަފުސީލުތައް ލިޔެ ކިޔުމުން ފެންނަން އޮތުމާއި އެފަަދަ ލިޔުންތައް ރައްކާތެރިކުރުމަށް ވަނީ އަންގާފަ އެވެ.

މީގެ އިތުރުން، ކޮވިޑް-19 އާ ގުޅޭގޮތުން ކުރަމުންގެންދާ އެންމެހައި ޚަރަދުތަކުގެ ތަފުސީލު މިނިސްޓްރީ އޮފް ފިނޭންސަށް ރިޕޯޓުކުރުމަށާއި، އިމަރޖެންސީ ޕްރޮކިއުމަންޓުގެ ތެރެއިން ޕްރޮކިއުކުރާއިރު އުސޫލުތަކަށް ބަލައިގެން އެކަން ކުރުމަށް އަންގާފައި ވެއެވެ.

އިމަރޖެންސީ އެއްބަސްވުންތައް ހަދާއިރު، މާލިއްޔަތު ގަވައިދުގައިވާ އަސާސީ މިންގަނޑަށް އެއްބަސްވުންތައް ހެދުމަށް ފިނޭންސުން ވަނީ އިލްތިމާސްކޮށްފަ އެވެ. އަދި މަސައްކަތް ޙަވާލުކުރެވޭ ކުންފުނިތަކާއި ފަރާތްތަކަކީ، މާލީ ގޮތުންނާއި ފަންނީ ގޮތުން ގާބިލު ބައެއްތޯ ކަށަވަރުކުރަން އަންގާފައި ވެއެވެ.

މި ލިޔުން ފިނޭންސް އިން ޝާއިއު ކުރީ ކޮވިޑް-19 އާ ގުޅިގެން ދައުލަތުގެ ތަފާތު އެކި މުއައްސަސާތަކުންނާއި އިދާރާތަކުން އަދި އިދާރާތައް އެކުއެކީ ކުރަމުން ގެންދާ އެންމެހައި މަސައްކަތްތަކާއި ކަންކަން، ކުރަމުންގެންދަނީ، ކޮރަޕްޝަނުގެ ޢަމަލުތަކުން ދުރުވެފައިވާ ވެއްޓެއްގައިކަން ޔަޤީންކުރުމަށްޓަކަ އެވެ.

މި ދަނޑިވަޅުގައި ކޮރަޕްޝަންގެ އަމަލުތަކަށް ހުޅުވިފައިވާ ދޮރުތައް އިތުރުކަން ފާހަގަކޮށް، އެންޓި ކޮރަޕްޝަން ކޮމިޝަން (އޭސީސީ) އިން ވެސް ވަނީ ކޮރަޕްޝަންގެ ހިރާސް ކުޑަކުރުމުގެ އިރުޝާދު ނާމާއެއް ޝާއިއުކޮށްފަ އެވެ. އަދި މި އިރުޝާދު ނާމާއަށް ރިއާޔަތްކުރުމަށް ފިނޭންސް މިނިސްޓްރީން ވަނީ އެދިފަ އެވެ.