"ކޮވިޑް-19 ގެ ކާރިޘާގެ ވާހަކަ ތާރީޚުގައި ލިޔެވިގެންދާނީ ނޫސްވެރިންގެ ޚިދުމަތުގެ ވާހަކައާއެކު"

ދުނިޔޭގެ އެކި ކަންކޮޅުތަކުގައި ހަލުވިކަމާއެކު ފެތުރެމުންގޮސް ރާއްޖެއާ ހިސާބަށްވެސް އައިސްފައިވާ ކޮވިޑް-19 ގެ ބަލިމަޑުކަމުގެ ވާހަކަ ރާއްޖޭގެ ތާރީޚުގައި ލިޔެވިގެންދާނީ ނޫސްވެރިންގެ ޚިދުމަތުގެ ވާހަކައާއެކުކަމަށް ކޮވިޑް-19 ޓާސްކްފޯހުގެ ތަރުޖަމާނު މަބްރޫކު ޢަޒީޒް ވިދާޅުވެއްޖެއެވެ.

އާދިއްތަ ދުވަހުގެރޭ ނޭޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި، ނޫސްވެރިކަމުގެ މިނިވަންކަމުގެ ދުވަހުގެ ތަހުނިޔާ އަރިސްކުރަމުން މަބްރޫކު ވިދާޅުވީ، ކޮވިޑް-19 ގެ ބަލިމަޑުކަން ފެތުރެމުންދާ މި ދަނޑިވަޅުގައި މީޑިއާތަކުން ޚަބަރުތައް ގެނެސްދިނުމުގައި ގެއަށް ނުގޮސް ޙަރަކާތްތެރި ވަމުންދާއިރު، ބައެއް ފަރާތްތަކުން ގޭގައި ތިބެގެންވެސް ރައްޔިތުންނަށް ޚަބަރު ފޯރުކޮށްދިނުމުގައި ކުރަމުންދާ މަސައްކަތްތައް ފާހަގަކުރައްވާ ކަމަށެވެ.

މަބްރޫކު ވިދާޅުވީ، ކޮވިޑް-19 ގެ ކާރިޘާގެ ވާހަކަ ތާރީޚުގައި ލިއެވިގެންދާއިރު، ނޫސްވެރިންގެ ޚިދުމަތުގެ ވާހަކަވެސް ލިއެވިގެންދާނެ ކަމަށެވެ. އަދި އެކަމުގައި ނޫސްވެރިންނަށް އެހީތެރިވެދިނުމަށް ލިބިގެންދާ މި ފުރުޞަތަކީ ޙަޔާތުގައިވެސް ލިބިލެއްވި އެންމެ ބޮޑު ފަޚުރުކަމަށް މަބްރޫކު ވިދާޅުވިއެވެ.

އެގޮތުން ނޫސްވެރިން ލިޔާ ލިއުމަކީ މީހެއްގެ ފުރާނަ ސަލާމަތް ކުރެވިދާނެ ވަރުގެ ކަމެއްކަން ފާހަގަކުރައްވައި މަބްރޫކު ވިދާޅުވީ، އެއާއެކު ރަނގަޅު މަޢުލޫމާތު ވަގުތުން ރައްޔިތުންނަށް ފޯރުކޮށްދިނުމާއި، ހާމަކަން ބޮޑު ގޮތެއްގައި ޚަބަރުތައް ގެނެސްދެންޖެހޭ ކަމަށެވެ. އަދި ނޫސްވެރިން ކުރަމުންދާ މަސައްކަތުގައި ތަފާތު ކުރުމެއްނެތި މަޢުލޫމާތު ދެއްވާނެކަން މަބްރޫކު ފާހަގަކުރެއްވިއެވެ.

ކޮވިޑް-19 އާ ގުޅިގެން ރާއްޖޭގެ ބައެއް މީޑިއާތަކުން ސްޓޭޝަންގައި "ލޮކްޑައުން" ވެތިބެ ޚަބަރުތައް ފޯރުކޮށްދެމުން ގެންދާއިރު، ކޮވިޑް-19 އާއި ގުޅިގެން މާލެސިޓީގައި އިޢލާނުކޮށްފައިވާ ފުރަބަންދުގެ ޙާލަތު ނިމެންދެން، ރާއްޖެޓީވީންވެސް ވަނީ މުވައްޒަފުން ރާއްޖެޓީވީ ހިނގަމުންދާ ޢިމާރާތުގައި ތިބުމަށް ނިންމާފައެވެ. މިގޮތުން ފުރަބަންދުގެ މުއްދަތު ނިމެންދެން ސްޓޭޝަންގައި ތިބޭ މުވައްޒަފުން ނޫން މުވައްޒަފުން ދަނީ ގޭގައި ތިބެގެން ޚަބަރު ފޯރުކޮށްދެމުންނެވެ.