ނިޔާވި އާމިނަތު އާދަމްގެ ރިޕޯޓު އަންނަ ހަފުތާގައި ލިބޭނެ: މަބްރޫކް
3 މެއި 2020 | އާދީއްތަ 21:48ސާމްޕަލް ޕޮޒިޓިވްވިކަން އެޗްޕީއޭއިން ހާމަކުރީ މިދިޔަ މަހުގެ 29 ވަނަ ދުވަހު
ކޮވިޑް-19 ޖެހިގެން ރާއްޖެއިން ފުރަތަމަ މަރުވި އާމިނަތު އާދަމް
ކޮވިޑް-19 ގެ ބަލިމަޑުކަމުގައި ރާއްޖެއިން ފުރަތަމަ ނިޔާވި އާމިނަތު އާދަމްގެ ރިޕޯޓު އަންނަ ހަފުތާގައި ލިބޭނެ ކަމަށް ނޭޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގެ ތަރުޖަމާނު މަބްރޫކް ޢަޒީޒު ވިދާޅުވެއްޖެއެވެ.
އާދީއްތަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން މަބްރޫކް ވިދާޅުވީ އާމިނަތު އާދަމްގެ މަރުގެ ރިޕޯޓު ނިމޭނެ ދުވަހުގެ ތާރީޚެއް އަދި ބުނަން ސީދާ ނޭނގޭ ކަމަށާއި، އެހެންނަމަވެސް އަންނަ ހަފުތާ ފެށޭތާނގައި ރިޕޯޓެއްގައި ސިފައިިގަ ލިބިގެންދާނެ ކަމަށެވެ.
ނިޔާވި ފަހުން ކޮވިޑް-19 އަށް އާމިނަތު އާދަމްގެ ސާމްޕަލް ޕޮޒިޓިވްވިކަން އެޗްޕީއޭއިން ހާމަކޮށްފައިވަނީ މިދިޔަ މަހުގެ 29 ވަނަ ދުވަހުއެވެ. އޭނާ ނިޔާވީ އެ ދުވަހު ނޭވާލާން އުނދަގޫ ވެގެން އިންދިރާ ގާނދީ މެމޯރިއަލް ހޮސްޕިޓަލް(އައިޖީއެމްއެޗް) ގެންދިޔަ މަގުމަތީގައ ކަމަށް އެޗްޕީއޭއިން ބުނެއެވެ.
އާމިނަތު އާދަމް ޕޮޒިޓިވްވެފައިވަނީ އެމްއެޗްއޭ ކްލަސްޓަރއާއި ގުޅުންހުރި ކޭސްއެއްގެ ފަރާތުންނެވެ. އަދި މި ކްލަސްޓަރ ފެށިފައި އޮތީ ކޭސް 72 ންނެވެ. ކޭސް 72 ގެ ޕްރައިމަރީ ކޮންޓެކްޓެއްގެ ގޮތުގައި އިނގޭ ކޭސްއަކީ 126 ވަނަ ކޭސްއެވެ. އަދި 126 ވަނަ ކޭސް، 280 ވަނަ ކޭސް (އާމިނަތު އާދަމް) އާއި ބައްދަލުވި މީހާގެ ގޮތުގައި ވަނީ ފާހަގަ ވެފައެވެ.
ކޭސް 72 ގައި ހިމެނޭ މީހާ ޕޮޒިޓިވްވުމާއި ގުޅިގެން ކޭސް 280 (އާމިނަތު އާދަމް) ދިރިއުޅޭ ބިލްޑިންގ މޮނިޓަރިންގގެ ޙާލަތަށް އެޕްރީލް 21 ވަނަ ދުވަހު ގެންގޮސްފައިވެއެވެ. ނަމަވެސް އެޕްރީލް 21 ވަނަ ދުވަހު އެ ބިލްޑިންގ މޮނީޓަރިންގެ ޙާލަތަށް ގެންދެވުނު މައިގަނޑު ސަބަބަކީ އެމްއެޗްއޭގެ 2 ޑްރައިވަރުން އެ ޢިމާރާތުގެ އެހެން ފަންގިފިލާއެއްގައި ދިރިއުޅެމުންދާތީއެވެ. އަދި މިކަން މިގޮތަށް ދަމުން ގޮސް އެޕްރީލް 23 ވަނަ ދުވަހު 126 ވަނަ ކޭސް ގައި ހިމެނޭ މީހާ މި ބައްޔަށް ޕޮޒިޓިވްވިއެވެ.
އަދި ކޭސް 126 ގެ ކޮންޓެކްޓް ޓްރޭސިންގގެ ތެރެއިން 280 ވަނަ ކޭސް (އާމިނަތު އާދަމް) އަކީ ޕްރައިމަރީ ކޮންޓެކްޓެއްގެ ގޮތުގައި ފާހަގަވެފައިވެއެވެ. މި ކޭސް ދެނެގަނެވިފައިވަނީ 25 އެޕްރީލް ގައެވެ. މިކަމާއި ގުޅިގެން އާމިނަތު އާދަމްގެ ގޭގެ މޮނިޓަރިންގެ ޙާލަތުގެ މުއްދަތު އިތުރުކޮށްފައިވެއެވެ.
އާމިނަތު އާދަމްގެ ސާމްޕަލް ނެގުމަށް އިންޓަރނަލް ސިސްޓަމްގެ ތެރެއިން ކަމާބެހޭ ފަރާތްތަކަށް ރިކުއެސްޓް ފޮނުވާފައި އޮތީ 27 އެޕްރީލްގެ ދަންވަރު 3:45 ގައެވެ. އަދި ފަތިހު 5:30 ގައި އައިޖީއެމްއެޗަށް އެ ސާމްޕަލް ވަނީ ގޮސްފައެވެ. ސާމްޕަލްގެ ނަތިޖާ ލިބިފައިވަނީ 29 ވަނަ ދުވަހުގެ މެންދަމު 12:00 ގައި އާމިނަތު އާދަމް ނިޔާވި ފަހުންނެވެ.
އާމިނަތު އާދަމަކީ ދިގުމުއްދަތަކަށް ބޭސް ބޭނުންކުރަމުން ދިޔަ މީހެކެވެ.
