ނ ކެނދިކުޅުދޫގެ މޮނިޓަރިންގ އުވާލައިފި

ކޮވިޑް-19 އާ ގުޅިގެން މޮނިޓަރިންގެ ޙާލަތަށް ގެނެސްފައިވާ ނ ކެނދިކުޅުދޫގެ މޮނިޓަރިންގެ ޙާލަތު އުވާލާފައިވާކަމަށް ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ) އިން ބުނެފިއެވެ.

އާދިއްތަ ދުވަހުގެރޭ ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ކޮވިޑް-19 ޓާސްކްފޯހުގެ ތަރުޖަމާނު މަބްރޫކު އަޒީޒް ވިދާޅުވީ، ނ ކެނދިކުޅުދޫ މޮނިޓަރިންގެ ޙާލަތުން އާންމު ޙާލަތަށް ބަދަލުކުރެވިފައިވާ ކަމަށެވެ. އޭގެއިތުރުން، މިހާރުވެސް 452 މީހުން އައިސޮލޭޝަން ފެސިލިޓީތަކުގައި ތިބި ކަމަށާއި، ކަރަންޓީން ފެސިލިޓީތަކުގައި 1541 މީހުން ތިބިކަން މަބްރޫކު ފާހަގަކުރެއްވިއެވެ.

ކޮވިޑް-19 އާ ގުޅިގެން ރަށްރަށް މޮނިޓަރިންގެ ޙާލަތަށް ގެންދިއުމާއި، މޮނިޓަރިންގ އުވާލުމުގެ ބާރު ލިބިގެންވަނީ ޑިރެކްޓަރ ޖެނެރަލް އޮފް ޕަބްލިކް ހެލްތަށެވެ. އެގޮތުން ކޮވިޑް-19 އިން ރައްކާތެރިވުމުގެ ގޮތުން އާންމު ސިއްޙަތު ރައްކާތެރި ކުރުމުގެ ޤާނޫނުގެ ދަށުން ބެލުމަށް ކަނޑައެޅިފައިވާ ކަންކަން ބަލައިނިމި، މޮނިޓަރިންގ ގެ ޙާލަތު އިތުރަށް ދަމަހައްޓަންޖެހޭ ސަބަބެއް ނެތްކަން ޑީޖީއަށް ފާހަގަކުރެވުމުން ބައެއް ރަށްރަށުގެ މޮނިޓަރިންގ އުވާލަމުންދެއެވެ.

ހޮނިހިރު ދުވަހުގެރޭވެސް 4 ތަނެއްގެ މޮނިޓަރިންގ އުވާލާފައިވާއިރު، އޭގެ ތެރޭގައި ދަރުމަ ދޯނި، އަދި ބ ކެންދޫ، ހއ އުތީމުގެ އިތުރުން، ހއ ދިއްދޫވެސް ހިމެނެއެވެ.

މިހާރުވެސް މާލެ ސަރަޙައްދުގެ އިތުރުން ރާއްޖޭގެ ގިނަ ބައެއް ރަށްރަށް އަދިވެސް މޮނިޓަރިންގެ ޙާލަތަށް ގެނެވިފައިވެއެވެ.