ޗައިނާއިން ދެމުން ގެންދާ އެހީތެރިކަމަށް މިނިސްޓަރ ޝާހިދު ޝުކުރު އަދާކުރައްވައިފި
ޗައިނާގެ ރައީސަށް ފޮރިން މިނިސްޓަރ ވަނީ ޝުކުރު އަދާކުރައްވާފައި
ފޮރިން މިނިސްޓަރ އަބްދުﷲ ޝާހިދު އާއި ޗައިނާ ސަފީރު ޒަންގް ލިޖޯންގް
ކޮވިޑް-19 އާ ގުޅިގެން ދިވެހިރާއްޖެ އަށް ޗައިނާ ދެމުންގެންދާ އެހީތެރި ކަމަށް ފޮރިން މިނިސްޓަރ ޢަބްދުﷲ ޝާހިދު ޝުކުުރު އަދާކުރައްވައިފިއެވެ.
ހޮނިހިރު ދުވަހު މިނިސްޓަރ ޝާހިދު ނެރުއްވާފައިވާ ބަޔާނުގައި ވަނީ މީގެ އެއްމަސް ދުވަސް ކުރިން ވެސް ޗައިނާއިން ރާއްޖޭގައި އޮތް ކޮވިޑް19 ގެ ބަލިމަޑުކަމަށް އެވަގުތަށް އެންމެ ބޭނުންވި ޞިއްޙީ ސާމާނު, ހިލޭ އެހީގެ ގޮތުގައި އެ މުހިންމު ދަނޑިވަޅުގައި ހަދިޔާކޮށް ދެއްވާފައިކަން ފާހަގަ ކުރައްވާފައެވެ. އަދި ހޮނިހިރު ދުވަހު އަނެއްކާވެސް ފުލައިޓެއް ފުރާ, މި ބަލިމަޑުކަމުން ދިފާޢު ވުމަށް ބޭނުންވާ ޞިއްޙީ އާލާތާއި، ވެންޓިލޭޓަރުގެ ދީލަތި އެހީ ޗައިނާއިން ލިބިގެންދާއިރު އެކަމަށްޓަކައި އެޤައުމަށް ހިފެހެއްޓުމެއްނެތި ޝުކުރު ދަންނަވާ ކަމަށް ބަޔާނުގައި ވެއެވެ. މި އެހީތެރިކަން ޗައިނާއިން ލިބިގެން މިދަނީ ރާއްޖޭގެ ކަންކޮޅުތަކުގައި މިބަލި ފެތުރުން އިތުރުވެ, އެހީތެރިކަމަށް ބޭނުން ބޮޑުވެފައިވާ މުހިންމު ދަނޑިވަޅެއްގައިކަންވެސް މިނިސްޓަރ ވަނީ ފާހަގަ ކުރައްވާފައިއެވެ.
އެހެންކަމުން ޗައިނާގެ ރައީސް ޝި ޖިންޕިންގ އަށާއި, ސްޓޭޓް ކައުންސިލަރ އަދި ފޮރިން މިނިސްޓަރ ވަންގް ޒީ އާއި ޗައިނާގެ ލޮބުވެތި ރައްޔިތުންނަށް މިނިސްޓަރ ވަނީ ޝުކުުރު އަދާކުރައްވަފައެވެ.
މީގެ އިތުރުން މި ދަތި ހައްސާސް ދަނޑިވަޅުގައި ރާއްޖެއަށް ދީލަތި އެހީ ފޯރުކޮށްދެއްވި ޗައިނާގެ ޖަމްޢިއްޔާ ޖަމާޢަތްތަކަށާއި, ކުންފުނިތަކަށް, އެ ފަރާތްތަކުން ވެދިން މަދަދާއި ބެހެއްޓެވި ހެޔޮ ގާތްކަމަށްޓަކައިވެސް ވަނީ ޝުކުރު އަދާކުރައްވާފައެވެ.
ޗައިނާ އެމްބަސަޑަރު ޒާންކް ލީ ޒޮންގް, ދިވެހި ރައްޔިތުންނާއި މެދު ޗައިނާއިން ބާއްވާ އެކުވެރިކަމާއި އެއްބާރުލުން ފުރިހަމައަށް ތަމްސީލު ކޮށްދެއްވާކަން މިނިސްޓަރުގެ ބަޔާނުގައި ފާހަގަ ކުރައްވާފައި ވެއެވެ.
މިނިސްޓަރ ވިދާޅުވީ ޗައިނާ ސަރުކާރުން ރާއްޖެއަށް މިއަދު ފޮނުވި ހިލޭ އެހީގެ އިތުރުން, އެޤައުމުގައި ތިބި އެކުވެރި ހެޔޮއެދޭ ފަރާތްތަކުގެ އެހީ ވެސް ލިބިފައިވާ ކަމަށެވެ. އޭގެ ތެރޭގައި ދުނިޔޭގެ މަޤުބޫލު އެހީދޭ ޖަމްޢިއްޔާތަކާއި, ކުންފުނިތަކާއި އަދި ރާއްޖޭގައި މިހާރުވެސް މަސައްކަތްކުރަމުންދާ ޗައިނާގެ ބައެއް ކުންފުނިތައް ހިމެނެއެވެ. އަދި އަލީބާބާ ފައުންޑޭޝަން / ޖެކްމާ ފައުންޑޭޝަން, ޗައިނާ މާރޝަންޓްސް ޕޯޓް ގްރޫޕް ކޯ ލިމިޓެޑް, ޗައިނާ މެޝިނަރީ އިންޖިނިއަރިންގ ކޯޕޮރޭޝަން, ބެއިޖިންގ އާރބަން ކޮންސްޓްރަކްޝަން އިންވެސްޓްމެންޓް އެންޑް ޑިވެލޮޕްމެންޓް ކޯ ލިމިޓެޑް, ޑޮންގފެންގ އިލެކްޓްރިކް އިންޓަރނޭޝަނަލް ކޯޕަރޭޝަން, ޗައިނާ ހާބަރ އިންޖިނިއަރިންގ ކޮމްޕެނީ ލިމިޓެޑް, ޗައިނާ ކޮމިއުނިކޭޝަންސް ސެކަންޑް ނެވިގޭޝަނަލް ބިއުރޯ ސެކަންޑް އިންޖިނިއަރިންގ ކޯ ލިމިޓެޑް އާއި ވާވޭ ޓެކްނޮލޮޖީސް ކޯ ލިމިޓެޑް ހިމެނޭކަން ފާހަގަކުރައްވާފައިވެއެވެ.
ދިވެހި ސަރުކާރުން ކޮވިޑް19 އިން އަރައިގަތުމަށް ކުރަމުން ގެންދާ މަސައްކަތަށް ރާއްޖޭގައި މަސައްކަތް ކުރާ ޗައިނާގެ ކުންފުނިތަކުން ދެއްވާ އެއްބާރުލުމާއި އެހީތެރިކަންވެސް ވަނީ ފާހަގަ ކުރައްވާފައެވެ.
މިގޮތުން ޗައިނާ މެޝިނަރީ އިންޖިނިއަރިންގ ކޯޕަރޭޝަން (ސީއެމްއީސީ) އިން, މިދިޔަ މަހު ވަނީ ކުޑަކުދިންނަށް ޚާއްޞަކޮށްގެން ތައްޔާރުކޮށްފައިވާ 5000 ފޭސް މާސްކު ރާއްޖެއަށް ހަދިޔާ ކޮށްފައެވެ. މީގެ އިތުރުން މިއަދުގެ ފްލައިޓް ޗާޓަރ ކުރުމަށް ޗައިނާ އެމްބަސީއާއި ގުޅިގެން އެފަރާތުން ވަނީ ގިނަގުނަ މަސައްކަތްތަކެއް ކޮށްފައެވެ. ހަމަ އެއާއިއެކު ސަރުކާރުން ޤާއިމުކުރާ އިމަރމަޖެންސީ މަރުކަޒުތައް ބިނާކުރުމުގައި ބެއިޖިންގ އާރބަން ކޮންސްޓްރަކްޝަން ގްރޫޕް (ބީޔޫސީޖީ) އާއި ޗައިނާ ހާބަރ އިންޖިނިއަރިންގ ކޮމްޕެނީ ލިމިޓެޑުން ދަނީ ވަރުބަލިކަމެއް ނެތި މަސައްކަތްރައްވަމުންނެވެ. ރާއްޖޭގައި މިވަގުތު ތިއްބެވި ޗައިނާގެ ފަރާތްތަކުން ފޯރުކޮށްދެއްވާ މިފަދަ އަގުހުރި ޚިދުމަތްތައް ބަލައިގަންނަވާ މިނިސްޓަރ ވަނީ ޝުކުރު އަދާ ކުރައްވާފައެވެ.
ނަމަވެސް އެކީ އެކުގައި ހޭރިޔާކޮށް އަމާން ބަނދަރަކަށް ވާޞިލުވެވޭނެކަމުގެ ޔަޤީންކަން އެބައޮތްކަމަށް ރާއްޖޭގެ ފޮރިން މިނިސްޓަރ ވިދާޅުވިއެވެ.
