ޓްރީ ޓޮޕް ހޮސްޕިޓަލް އޮޕަރޭޝަނަލައިޒް ކުރެވޭއިރު، އެނދުމަތި ކުރަންޖެހޭ ބަލިމީހުންގެ އަދަދު އިތުރުވެދާނެ: އައިޖީއެމްއެޗް
2 މެއި 2020 | ހޮނިހިރު 11:51އެނދުމަތި ކުރަންޖެހޭ ޕޭޝަންޓުންގެ އަދަދު އިތުރުވެގެންދާނެ
އައިޖީއެމްއެޗްއާ ޓްރީޓޮޕް ގުޅިގެން މަސައްކަތް ކުރުމަށް ވަނީ ނިންމާފައި
ޓްރީޓޮޕް ހޮސްޕިޓަލް ދެދުވަހުގެ ތެރޭގައި އޮޕަރޭޝަނަލައިޒް ކުރެވޭއިރު، އެނދުމަތި ކުރަންޖެހޭ ބަލިމީހުންގެ އަދަދު އިތުރުވެގެންދާނެކަމަށް އިންދިރާ ގާނދީ މެމޯރިއަލް ހޮސްޕިޓަލް(އައިޖީއެމްއެޗް) ގެ މެޑިކަލް ޑައިރެކްޓަރ ޑރ. އަލީ ނަޒީމް ވިދާޅުވެއްޖެއެވެ.
ނޭޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި، ޑރ. ނަޒީމް ވިދާޅުވީ މަޝްވަރާތަކަށްފަހު ޓްރީޓޮޕް ހޮސްޕިޓަލާއެކު އެއްބަސްވުމަކަށް އާދެވި މަސައްކަތްތައް ފަށާފައިވާ ކަމަށެވެ.
މިހާރުގެ ކެޕޭސިޓީއަށް އަލިއަޅުއްވާލައްވާ ޑރ. ނަޒީމް ވިދާޅުވީ ޑީއެޗް-11 ގައި އިންޓެންސިވް ކެއަރ ގޮތުގައި ބޭނުން ކުރަނީ 10 އެނދު ކަމަށެވެ. ޑީއެޗް-16 އަކީ މާބަނޑު އަންހެނުންގެ ރެސްޕޮންސްއަށް މީގެ ގާތްގަނޑަކަށް 5 ވަރަކަށް ހަފުތާ ކުރިން އޮޕަރޭޝަނަލައިޒް ކޮށްފައިވާ ތަނެއް ކަމަށް ޑރ. ނަޒީމް ވިދާޅުވިއެވެ. އަދި ވިދާޅުވީ ޑީއެޗް-17 އަކީ ޑީއެޗް-10 އިން ޑައުންގްރޭޑް ކުރާއިރުގައި ބަލިމީހުން ޝިޕްޓްކޮށް ބައިތިއްބަން ހަމަޖައްސާފައި އިންނަ ފްލޯރ އެއް ކަމަށެވެ.
ކޮވިޑް-19އަށް ޕޮޒިޓިވްވާ މީހުންގެ ޢަދަދު އިތުރުވަމުން އަންނާތީ އެނދުމަތި ކުރަންޖެހޭ ބަލިމީހުންގެ ޢަދަދު ދުވަހުން ދުވަހަށް އިތުރުވުމުގެ ފުރުޞަތު އޮތުމުން އެކަމަށްވެސް ތައްޔާރުވަމުން އަންނަކަމަށް ޑރ. ނަޒީމް ވިދާޅުވިއެވެ.
ޑރ. ނަޒީމް ވިދާޅުވީ މިއޮޕަރޭޝަން ކުރިއަށް ގެންދަނީ އައިޖީއެމްއެޗާއި، ޓްރީޓޮޕްގެ ގުޅިގެން ކަމަށެވެ. އެގޮތުން، ބަލި މީހުން ބެލުމުގެ މަސައްކަތުގައި ވެސް ޓްރީޓޮޕްގެ މުވައްޒަފުންގެ އެހީ ހޯދަމުން އަންނަ ކަމަށް ޑރ. ނަޒީމް ވިދާޅުވިއެވެ.
ޑރ. ނަޒީމް ވިދާޅުވީ އައިޖީއެމްއެޗް ޓީމުތައް ބޭނުންވާ ޢަދަދަށް، ޓްރީޓޮޕް ހޮސްޕިޓަލްގެ ޑޮކްޓަރުންގެ ޓީމާ ގުޅެމުންދާނެ ކަމަށެވެ. އެގޮތުން އެތެރެ ހަށީގެ ޚާއްޞަ ޑޮކްޓަރުންނާއި، ޕަލްމޮރޮލޮޖިސްޓުން އަދި ކުޑަކުދިން އެޑްމިޓް ކެރެވުންދާނަމަ، ކުޑަ ކުދިންނަށް ޚާއްސަ ޑޮކްޓަރުންނާއި، މާބަނޑު އަންހެނުން އެޑްމިޓްކުރާނަމަ، އަންހެނުންގެ ޚާއްޞަ ޑޮކްޓަރުން ޙަރަކާތްތެރިވާނެ ކަމަށެވެ.
ޑރ. ނަޒީމް ވިދާޅުވީ އައިޖީއެމްއެޗްގެ ކްލިނިކަލް ފަރުވާގެ ބައި ވަރަށް ބޮޑަށް ބަލަހައްޓަމުންދާ ކަމަށެވެ. އެގޮތުން، ޚާއްޞަ ރޫޓެއް ކަނޑައެޅިގެން ފަރުވާ ދިނުމުގެ މަސައްކަތްތައް ކުރަމުންދާ ކަމަށް ޑރ. ނަޒީމް ވިދާޅުވިއެވެ. ޑރ. ނަޒީމް ވިދާޅުވީ އައިޖީއެމްއެޗް މެޑިކަލް ރެސްޕޮންސް ފުޅާ ވެގެންދާނެ ކަމަށާއި، އިތުރު ފެސިލިޓީސްތައް އައުމުގެ ފުރުޞަތު އަދިވެސް އެބައޮތް ކަމަށެވެ.
އައިޖީއެމްއެޗުން ދޭން ޖެހޭ ސަޕޯޓު ދެމުންދާކަން ފާހަގަކުރައްވައި ޑރ. ނަޒީމް ވިދާޅުވީ ޢާންމު އުޞޫލުން ދެމުން އަންނަ ފަރުވާތައް ނުހުއްޓި ކުރިއަށްގެންދާނެ ކަމަށެވެ. އޭގެ ތެރޭގައި ކޮންމެ ހަފުތާއަކު ދެފަހަރު ނުވަތަ ތިން ފަހަރު ޑައިލިސިސް ފަރުވާ ހޯދާ މީހުންނަށް އެފަރުވާ ދެމުންދާ ކަަމަށް ޑރ. ވިދާޅުވިއެވެ. އަދި ވިދާޅުވީ އޯޕީޑީ މިހާރު މިކުރިއަށް ދަނީ އޮންލައިން ކްލިނިކްތަކުން ކަމަށެވެ. ނަމަވެސް އިމަރޖެންސީ 24 ގަޑިއިރު ހުޅުވިފައިވާ ކަމަށާއި، ޢާންމުކޮށް ޢަމަލުކުރަމުންދާ އުޞޫލުން އެކަންކަން ކުރިއަށްދާ ކަމަށެވެ.
މީގެ އިތުރުން ޑރ. ނަޒީމް ވިދާޅުވީ ރާއްޖޭގެ އެކިކަންކޮޅުތަކުގައި ޤާއިމުކުރެވިފައިވާ ކަރަންޓީން ފެސިލިޓީސްތަކާއި، އައިސޮލޭޝަން ފެސިލިޓީސްތަކުގައި ވެސް އައިޖީއެމްއެޗްގެ މުވައްޒަފުން ޙަރަކާތްތެރިވަމުން އަންނަ ކަމަށެވެ.
